¹ Ua ni vosa tainia vakaukauwa a qase, ia mo vosa ga ina vamalua me tautauvata ga ve ae tamamu, ve edra gonetagane me tautauvata ve edra tacimu, ² ve edra bui me tautauvata vea tinamu, ve edra goneyalewa me tautauvata vea ea ganemu ena yalo savasava sara. ³ Roovi edra yada, o odra yada dina. ⁴ Ia e dua yada e valuveni se va vuani, me dra vavulicua mada a varoroga ina odra matavuvale, qa medra saumia vare a loloma ve edra i tubutubu, baleta ai e totoa ina mata ni Alou. ⁵ Ia o oya yada dina, e maqa ni vararavi vei dua, e solia taucoo tu a ona vanuinui ve ea Alou qa na maqa ni cegu ni vamamasu qa ereere no ve ea Turaga ina siga ei na bogi. ⁶ Io a yada sa dau gutia marau sa mate ga vetalia ga ni se bula no. ⁷ Varotia leqa ga a ai medra ua ni beitai ina dua a. ⁸ Ia e maqa ni dua e qaravia weana, vabibi a ona vuvale,o oya e caitainia a vabauta sa qai a ca valevu sara mai ve edra maqa ni vabauta. ⁹ Me ua ni digitai a yada se maqa ni yacovia onosagavulu a ona yabai, qa vawati va dua ga, ¹⁰ me rogo ina vuu ni valavala re sa dauqarauni edra gone, e sa dau vacegui edra vulagi, sa vuya a odra la a tamata lotu, e sa gumatua ni velee a caacaa re taucoo ga. ¹¹ Ia o odra yada tamata bula mo vasuai edra, ni dra na garogaro qa maqa ni nanumia Karisito qa dra na mata vawati leqa, ¹² ni dra na civoti ni dra biutia a a madra vabautia i mada. ¹³ Qa dra na yaco leqa ga, me dra vucesa, qa dra vi laoyai i vi valevale. Maqa walega ni dra vucesa, edra dau aya a a maqa betena, qa dra ogaoga ina talanoa e maqa ni iliili. ¹⁴ O ya ana medra vawati a yada e dra tamata bula, medra valuveni, qa qaravia odra vuvale, qa dra ua ni vatara e dua a me vosa vacaca ina a meca. ¹⁵ Ni so e sa vui tani me dra muri Setani. ¹⁶ E dua marama vabauta e notu e so a ona yada, me vuei edra, me ua ni vaogai valevu ina ai soqosoqo lotu, me rawa ni vuei ina o odra yada dina. ¹⁷ O odra qase edra viliutai re medra doai valevu, vauasivi o odra vunautainia a vosa ni Alou qa dau vatavuvuli. ¹⁸ Baleta aya ai volatabu, "Mo ua ni vesu ia a gusu ni bulumakau ni sa buturainia a sila"ia 'Me soli a ena i sau ve ea dau caacaa". ¹⁹ Mo ua ni vabautia e dua sa beitainia a qase e maqa ni rua se tolu ai vadinadina. ²⁰ Vosatainia a tamata i valavala ca i na odra mata a tamata taucoo medra rere ina a ena vo. ²¹ Au sa varoti io ina mata ni Alou ei Karisito Jisu ei na agilosi dra sa digitai tu, nio na maroro ai vunau ai qa maqa ni catia edua qa gutia e dua, qa ua ni velee e dua a ina vidigidigi walega. ²² Ua ni tabaia vasauri edua ina omu liga. Mo ua ni auwai ina odra i valavala ca a tamata tani. Maroroi io mo savasava no. ²³ Ua ni somi wai wale no ga. Ia mo somia valailai a waini baleta a omu ete vata ea mate dau turi io no. ²⁴ E so a tamata a odrai valavalaca sa ilai levu tu, sa matai ve edra i na vilewai. Ia a odra ivalavala ca eso e murimai. ²⁵ Sa veana ina, ai valavala re sa votu levu tu, ia o odra e maqa sa maqa ni tabonai rawa.