¹ O odra taucoo a tamata sa baobula no medra ilai edra a o dra turaga me dra varoorootai ni edra valevu, me ua ina ni vosa vacacatai a yaca ni Alou ei nai vavuvuli. ² O odra bobula edra vabauti edra odra i liuliu medra ua ni beci edra baleta ni dra veiweani ga. Ia, medra qaravi edra valevu cae, baleta o odra i liuliu medra vuei baleta odra caacaa ni dra vabauta qa dra lomani. A vei a ai mo vavuvulicia qo varotia. ³ E dua e vavulicia e dua tani ai vavuvuli, qa maqa ni dua vata ei na rorogo ni vosa ni oda Turaga o Jisu Karisito, ei nai vavuvuli e lao vata ei na bula va Alou, ⁴ o oya e doadoa qa maqa ni ila e dua a, ia sa dau gutia a veileti ei na vibatainia a vosa wale. Ai e lao mai ina vuvu, a vivala, a vosa vacaca, a dau nanuma ca , ⁵ ei na odra vileti tawa yaga a tamata ei na vaasama ca. E maqa ve edra a dina, qa dra nanumia ni sa a ni yau a lotu. ⁶ Ia sai yau levu a lotu ei na loma re. ⁷ Ni da maqa ni dia mai e dua a i vuravura ai, ia eda na maqa leqa ga ni dua a eda na dia tani rawa. ⁸ Ia e sa tu ve eda magiti ei nai sulu meda loma re ga ina. ⁹ Ia o odra sa gutia medra vutuniyau e dra sa lutu ina dau vere ei nai cori, ei na levu a gagadre ca, qa lialia, qa dau vivacacani, ari sa luvurai ni edra a tamata i na mate ei na rusa. ¹⁰ Ni sa waa ni aca taucoo ga a lomania ai lavo, e dra sa dau ocovia eso qa dra sa vacalai ina i na odra vabauta,qa dra coai edra e na yaluma valevu. ¹¹ Ia, o io a tamata ni Alou, ubu tani mai na a taucoo ai. Ia mo muria a yalododonu, a lotu, a vabauta, a vosota, a yalomalua. ¹² Mo valu ina i valu re ni vabauta. Qumia vare a bula tawa mudu o oya o ma tarogi mai ina, osa vatusa leqa ga ina a vatutusa re ina odra mata a vadainadina e dra sa lelelevu. ¹³ Au sa vaortia ina mata ni Alou, o oya e vavuna me bula tu a a taucoo ga, ei na mata i Karisito Jisu, o oya sa vatusa a vatutusa re i na mata i Ponitio Pailato. ¹⁴ Mo maroro vare ai varo mo ua ni tauvi duka se beitai me yacovia a ona rairai mai a oda Turaga o Jisu Karisito. ¹⁵ Alou ena varaitai ni Karisito mai na gauna dodonu--Alou, a alougata o oya e cecere duaduaga, a Tui ni Tui, eya Turaga ni vi Turaga. ¹⁶ O oya duadua ga e tu ve ea bula tawamudu qa sa tu i na rarama e maqa ni torovi rawa. E maqa ni dua e igavia rawa. Me ona ga a varooroo eya kaukauwa qa maqa ni mudu. Emeni. ¹⁷ Varotia ve edra vutuniayau na gauna ai, medra ua ni doadoa, se vararavi i nai yau, edra maqa ni tu dei. Ia, varoti edra medra vararavi ve ea Alou, o ya e solia tu vayauyau ve eda a a taucoo ga me da marau ina. ¹⁸ Varoti edra me dra velee a a re, me dra vutuniyau ina a re, me dra loma soli qa dau vi vuei. ¹⁹ Me dra binia tu ve edra a yavu re e yaga i na gauna mai muri, me rawa ina ni dra qumia vare no a a e yaga i na oda bula. ²⁰ Tinoci, maroro a a ma sa soli ve io, lao tani mai na talanoa ca qa maqa ni yaga, ei nai vavuvuli tani, dra lawaitainia tu ni vuu. ²¹ E so a tamata edra vatusa tu a a ai qa dra qai calatia ina a vabauta. Me tu ve io a loloma. Emeni.