¹ A vosa ai e dina, e dua e gutia mei talatala qase, sa gutia a caacaa re. ² Oya ana ai talatala qase e dodonu me ua ni cala, me dua ga a watina, me yalo mamautu, yalo matua, mei valavala dodonu, me dau loma soli, me rawa ni dau vivavulici. ³ Me ua ni dau somi waini, me ua ni dau vi vala, ia me yalo malua ga qa yalo re, me ua ni dau lomania ai lavo. ⁴ Me dau lewai edra vare a ona lewe ni vale, odra luvena medra dau varorogo, qa dra dau varooroo. ⁵ Ia e dua tamata e maqa ni ila se me lewai edra vacava a ona vuvale, ena qai lewa rawa vacava ai soqosoqo lotu ni Alou? ⁶ Me ua ni dua e sa qai lotu ce, me ua ina ni na viavia levu, de lutu i na vei vacacani i Setani. ⁷ E dodonu leqa ga me rogorogo re ve edra i tau dau, de lutu ina a e vosa vacacatai ina ei nai cori ni tevoro. ⁸ O odra leqa ga a Tuirara, e dodonu me dra yalo qaseqase, me dra ua ni vei vaaisini e na vosa, me dra ua ni gutia valevu a somi waini, me dra ua ni dau ocooco. ⁹ Me dra maroro a dina ni vabauta ei na lewa i loma e savasava. ¹⁰ Me dra vatovolei rawa i mada, medra qai viqaravi, medra ua ina ni dra beitai. ¹¹ Me veana leqa ga a watidra,me dra yalo qaseqase,me dra ua ni dau aase, me dra yalo matua, qa dra loma dina ina a taucoo ga. ¹² A tuirara me dua ga a watina, medau qaravi edra vare a luvena vata ea a ona vuvale. ¹³ O odra sa viqaravi vare ina caacaa ni tuirara edra sa vadinadinatai vare i nai vatagede cecere qa dra dei valevu i na vabauta o oya sa tu vei Karisito Jisu. ¹⁴ Au sa vola ve io a a ai, niu namainia meu lao vatotolo waqe ve io, ¹⁵ ia eu na bere valailai, mo ila ai valavala e raorao me dra velee a tamata i na vale ni Alou, o oya ai soqosoqo ni Alou bula, a duru qa vadeitai ina a dina. ¹⁶ Ia sa maqa ni vatitiqatai rawa ni sa vavotui mai a levu ni dina ni a valou: " O oya sa varaitai mai va tamata, sa vadinadina vea a Yalo Tabu, dra sa igavi ae a agilosi, sa vunautai ve edra vi matanitu, sa vabauti ea aso a ai vuravura, sa qai di cae i na vanua vai uu uu."