¹ O mudou a vi weani, oitou sa vayaloqaqatai ni emudou qa vamasuti emudou i na Turaga o Jisu. Ni dou sa ciqomia ai vasala mai ve eitou me mudou valomaretainia a Alou i na omudou i laolao, me ve ana no a omudou i laolao qa me uasivi cae. ² Ni dou sa ila ai vasala ma soli ve emudou i na vuu ni Turaga o Jisu. ³ Ia ni sa loma ni Alou me modou yalo savasava, qa ua ni dau yalewa, ⁴ ia mudou ila yadua me maroroi a omudou gau qa vasavasavatai qa me doai, ⁵ qa me ua ina a dodomo ca [me tautauvata ei edra a ai matanitu tani edra maqa ni ila a Alou]. ⁶ Ia me ua ni dua a tamata me lawai ca ve edra a tacina ena vuu ni a ai. Ni sa dau civotainia a Alou a a ai, me tautauvata a oitou ma vasalataini emudou ina i mada. ⁷ Ni sa maqa ni tarogi eda mai a Alou meda tawa savasava ia meda yalo savasava ga. ⁸ Ia, o oya e bilirainia a a ai e maqa ni bilirainia a tamata, ia, e bilirainia a Alou o oya e solia a ona Yalo Tabu ve io ⁹ I na vuu ni vilomani vavitacini, e maqa ni yaga leqa vei dua me volavola ve emudou, ni sa vavulici emudou tu a Alou me mudou vilomani vai emudou. ¹⁰ E dina sara, ni dou sa velee ai ve edra taucoo a viweani e dra notu i Masitonia. Ia oitou vavinavinaatai ni emudou a viweani, ni dou na gumatua cae leqa ni velee no a a ai. ¹¹ Oitou vavinavinaatainia leqa ga ni dou na gumatua leqa ga ni no malua, qarauna a vi a dou sa nuitai ina, qa mudou caacaa i na o mudou liga, me tautauvata a oitou i varo ve emudou. ¹² Me rawa ina ni dou lao vadodonu i na odra mata o odra mai tuba, qa me ua ni dua a a me leqa ve emudou. ¹³ Oitou maqa ni gutia me varaitai ve eitou a viweani, i na vuudra sa moce tu, me mudou ua ni yaso vai ni erda me tautavata ei edra leqa e so e maqa tu a odra i nuinui. ¹⁴ Ni da sa vabauta ni o Jisu sa mate qa tucae leqa, ni na di edra leqa mai a Alou vata ei Jisu o odra sa mate vata ei ea. ¹⁵ I na vuu ni a ai oitou sa aya ina ve emudou i na vosa ni Turaga, ni o oda sa bula no, o oda sa vo no i na o na lao mai a Turaga, ni da na maqa dina ni lao i mada mai ve edra sa moce tu. ¹⁶ Ni na lao sobu mai lomalagi a Turaga. E na lao ina rorogo ni ela, ei na domo ni agilosi turaga ei na davui ni Alou, e dra na qai tucae i mada o odra sa mate ni dra tu vata ei Karrisito. ¹⁷ Qai muri o oda sa bula no, ni da na di cae vata ei erda i na o meda vi tata vata ei na Turaga i an macawa. Ina vuvu ni a ai eda na no tu vata ga ina ei na Turaga. ¹⁸ O oya ana me da vi vacegui no vai eda i na vi vosa ai.