¹ Ni sa yaga meu volavola ve emudou a vi weani, meu aya i na vi gauna ei na vi yabai. ² Ni dou sa ila vare no ni sa roro mai a siga ena lao mai ina a Turaga me tautauvata a dau butao ni bogi. ³ Ni dra sa aya no,''Vacegu qa maroroi," sa qai yaco va idacala mai ve edra a vi varusai. E na tautauvata ga a mosi ve edra buete ni dra taratara me dra vasucu. E na maqa ni dua vanua e dra na ubu rawa ina. ⁴ Ia omudou, a vi weani, ni dou sa maqa ni notu i na iloilo me rawa ina ni na yacovi emudou ina a siga ana me tautauvat a dau butao. ⁵ Ni dou sa luve ni rarama taucoo qa gone ni siga. E da maqa ni gone ni iloilo se gone ni bogi. ⁶ Ia, meda ua ni moce me tautauvata edra dau velee eso. Ia, meda yadrayadravai no qa yalo matua. ⁷ Ia o odra sa moce medra moce ga ni bogi, ei edra sa mateni medra velee no ga ni bogi. ⁸ Ia baleta ni da gone ni siga, e dodonu meda yalomatua qa da vaiyaragi no i na vabauta ei na loloma me i sasabai ni lomasareda, ei na vanuinuitainia a bula mei varuru ni ulu. ⁹ Sa maqa ni lesi eda Alou meda rusa, meda rawatia ga a bula i na vuu ni oda Turaga o Jisu Karisito. ¹⁰ Ni sa mate o oya ina vuuda ia, e da yadra no se da moce, meda bula vata no ga ei ea. ¹¹ O oya ana meda vi vacegui no qa da tarai eda cae no me tautauvata ga dou sa velee no. ¹² Oitou erei emudou, a vi weani, me mudou ilai edra sa caacaa no ve emudou vata ei edra a lewai emudou no i na vuu ni Turaga qa o odra a vavulici emudou no. ¹³ Oitou ere leqa ga me mudou varoorootai ni edra valevu i na loloma me baleta a odra caacaa. Mo dou vi vacegui vai emudou. ¹⁴ Oitou sa varotia ve emudou, a viweani: Vasalatai ni edra a dau talai dredre, vayaloqaqatai ni edra sa yalolailai qa vuei edra sa malumalumu, qa vosoti edra tucoo ga a tamata. ¹⁵ Igavia me ua ni dua e vi sausaumi tainia a ona ca e dua. Ia, mudou muria no ga a a e a re ve emudou yadua qa ve edra taucoo. ¹⁶ Marau no ga. ¹⁷ Dou masumasu no ga me ua ni cegu. ¹⁸ I na a taucoo ga mo vavinavinaa. Ni sa loma ni Alou i na vuu i Karisito ve emudou. ¹⁹ Ua ni dou boocia a Yalo Tabu. ²⁰ Dou ua ni beca a vosa ni parofisai. ²¹ Vatovolea a a taucoo. Qumia vagumatua a a re. ²² Lao tani mai na ca. ²³ Me vasavasavatai ni emudou a Alou ni vi vacegui. Me maroroi a yalomudou, a lomamudou, qa yagomudou me ua sara ni cala me yacovia a lesu leqa mai ni oda Turaga o Jisu Karisito. ²⁴ Sa yalodina o oya sa digitai ni emudou, e na velee leqa ga o oya. ²⁵ Mudou a vi weani, dou masulai ni eitou leqa no ga. ²⁶ Dau ida vai ni edra a vi weani i na yabo ni yalo e savasava. ²⁷ Au sa varotia ve emudou i na vuu ni Turaga me wili a i vola ai ve edra taucoo a viweani. ²⁸ Me notu vata ei emudou a loloma ni oda Turaga o Jisu Karisito.