¹ O oya ai, ni oi rua sa maqa ni vosotia rawa. Oi rua sa nanumia ni a re me oi rua sa biu ece tu ga waqe i Aceni. ² Oi rua sa vatalai Timoci a tacidatou qa weadatou i na caacaa ni Aloua i nai tuutuu re i Karisito, me vakaukauwatai ni emudou qa vacegui emudou i na vuu ni omudou vabauta. ³ Baleta me ua ni dua e yavalati mai na vi vararawatai ai. Ni da sa ila o oda ni da sa lesi ena vuu ni a ai. ⁴ Dina ga, ni oitou ma notu vata ei emudou, oitou ma sa aya no ni da na sotavia a vi vararawa tai, qa sa yaco mai me tautauvata ai, qa dou sa ila no. ⁵ E na vuu ni a ai, niu sa maqa ni ciqomia rawa, au sa talatala waqe ina meu ila ai varau ni omudou vabauta. Se varau ni vatovolei edra velee eso me dra vatovolei emudou me ua ni a wale a oitou caacaa. ⁶ Ni sa yaco mai o Timoci na ona lao mai ve emudou sa dia mai ai tuutuu re ni omudou vabauta ei na loloma. E aya o oya ni mudou dau nanumi eitou tu ga, qa mudou gutia tu me mudou igavi eitou me tautauvata sara ga a oitou gutia me oitou igavi emudou. ⁷ I na vuu ni a ai, omudou a vi weani, e drodrovi eitou a vacegu mai na oitou nuiqawaqawa ei na rarawa, i na vuu ni omudou vabauta. ⁸ Ia ai eda sa bula, e o sa tudei ve ea Turaga. ⁹ Ia a vavinavinaa cava leqa oitou rawa ni solia ve ea Alou i na vuu mudou, ina levu ni oitou marautai ni emudou i na mata ni Alou? ¹⁰ Oitou dau masu va gumatua i na bogi qa siga me oitou igavia a omudou mata qa vaiuri tainia a a e maqa i na omudou vabauta. ¹¹ Me liutai ni eitou ve emudou a Alou a Tamada, ei na oda Turaga o Jisu. ¹² Me valevutai ni emudou a Turaga qa vauci emudou vata va yadudua i na loloma ve edra leqa ga tamata, me tautau vata oitou dau velee ve e mudou. ¹³ Me vayalo qaqatai ni e mudou me yaco ina me dra maqa ni cala ni sa savasava i na mata ni Alou a Tamada e na gauna ena lao mai ina a Turaga o Jisu vata ei edra a ona digitai.