¹ Ni dou sa ila vai emudou, a vitacini, ni maqa ni tawa yaga a a oitou ma lao mai ina ve emudou. ² Mu dou sa ila a a rarawa ei na vi vamaduatai ma vala ve eitou mai Filipai. Oitou ma doudou ina i na vuu ni oda Alou me tou aya a kosipeli ni Alou ia sa a levu a vi vorati. ³ Ni sa maqa ni tau a oitou i varo ina vi vacalai, se na yalo e maqa ni savasava, se na vi vaaisini. ⁴ Ia, ni oitou sa vadonui mai veea Alou me oitou nuitai i na kosipeli ni tou sa vosa. Oitou maqa ni vosa me valomaretai ina a tamata, ia a Alou duadua ga. O oya ga e dievia tu a lomada. ⁵ Ni dou sa ila ni tou maqa ni vayagatainia a vosa ni vi cavilai, se ulubale me vunitai ina a ocooco--Alou a oitou i vadinadina. ⁶ Qa oitou maqa ni saga a qoroi mai veedra a tamata, se mai ve emudou se mai ve edra leqa e so. Sa rawarawa me tou vi vaocai ni oitou sai apositolo i Karisito. ⁷ Ia oitou sa yalore me tautauvata ga a tina ve edra a luvena dina. ⁸ Sa ve ana ga leqa a oitou loma re ve emudou. Oitou taleitainia me oitou wase ve emudou maqa ni vosa ni Alou walega ia a oitou bula sara ga. Ni dou sa rui a lomani ve eitou. ⁹ Mo dou nanumia, a taci eitou, a oitou dau caacaa vata ea a oitou dau oca. Ni tou dau caacaa i na bogi vata ea siga me tou ua ni vabibitainia e dua ve emudou. Na gauna oitou vunautainia ina ve emudou ai tuutuu re ni Alou. ¹⁰ Dou sa vadinadinatainia, qa Alou leqa ga, ni sa savasava, qa dodonu, qa maqa ni caitai rawa a oitou i valavala ve emudou sa vabauta. ¹¹ Me tautauvata ni dou sa ila a oitou varoti emudou vayadudua me tautauvata ga a tama ni gone ni varotia a luvena. ¹² Oitou ma erei emudou qa vivayaloqaqatai qa vamasuti e mudou modou lao i nai valavala e vi ganiti vata ea a Alou, o oya ma digitai ni emudou ina ona matanitu ei na lagilagi. ¹³ Oya ana vuna oitou maqa ni cegu ina ni vavinavinaatainia a Alou. Ni dou sa ciqomia a vosa ni Alou mudou ma rogo, qa marautainia qa maqa ni tautavata a vosa ni tamata. Ia mudou ciqpmia me tautauvata dina ga a vosa ni Alou. O oya ga ai a vosa e caacaa leqa no i na emudou maliwa. ¹⁴ Ve emudou, a vi weani, ni dou ma vamurimuri edra ai soqosoqo lotu ni Alou dra notu i Jiutia i na vuu i Karisito Jisu. Ni mudou ma vararawatai leqa ga mai ve edra lewe ni omudou vanua, me tautauvata ga ma dra velee mai ve adra Jiu. ¹⁵ O odra ga ma dra vamate a turaga o Jisu ei edra leqa ga a parofita, qa dra vatalai eitou tani. Edra maqa ni valomare tainia a Alou. Ia, dra sa vicati leqa ga ei edra a tamata taucoo. ¹⁶ Dra maqa ni vatara me tou vosa ve edra a ai matanitu tani me dra vabulai ina. Sa qai yaco medra vasinaiti ga i na odrai valavala ca. Ia a vi vararawatai ena yaco ve edra i na enai otioti. ¹⁷ Ia oitou, a vi weani, a gauna lealea walega oitou tawasei ina mai ve emudou vayago qa maqa ni vayalo. Oitou sa gumatua sara ina qa gutia valevu, me tou igavia a omudou mata. ¹⁸ Oitou nanumia me tou lao mai ve emudou--O au, o Paula, au diva meu lao mai vadua se va rua--ia sa tarovi au o Setani. ¹⁹ Ia a cava a oitou i nuinui, se marau, se oitou salevu ni rei? sa maqa lii ni o emudou i na mata ni oda Turaga o Jisu i na ona lao mai? ²⁰ Ni sai emudou ga a vuni oitou i nuinui ei na vuni oitou rei.