¹ Aqu tata djina ve maya o Karisito, aqu jikai ni giri no, evo vadjinadjina muni vuwako yau na lequ lewa mai qu yaloga ina Yalo Tabu, ² ni qu vo rarawa valevu, a vo jikai ni vacegu no qu yaloga. ³ Niqu dau okajiya me qu tawase mai vuwa na Karisito o rau eru wekaqu djina vayago. ⁴ Eru vo jiya luve ni Isireli, evo ledru muni na dodonu ledru iluve, vata qai niya nai ukuuku, qaneya na viyalayalyaji, vata qainiya na soli vunau, vata na i valavala ni soro vuwa na Kalou, vata qainiya na tata ni yalayala. ⁵ Evo ledru o rau na qase a vo tubu mai vuwadru na Karisito, me kodaki e yago, o keya e laviya taucoko na kwa, me varokorokotaki me tasi mudu. Emeni. ⁶ Io e jikai ni kodaki me yaco na tata ni Kalou. Niru ni Isireli djina o rau tucoko eru lamai vuwadru na Isireli. ⁷ Eru vo jikai talega ni luveya o rau tucoko na leya kawa o Eparama: io na leya kawa o Aisake e na tokoniya me lemu kawa. ⁸ Na ka i balebale ikwe, o rau na luve ni yago, eru vo jikai ni luve ni Kalou; io na luve ni yalayala ga eru vo vabaujiya me kawa. ⁹ Ni vo kodaki ikwe na tata ni yalayala, "Ina gauna ikwe qu na lamai, ena sucu vo Sera e kiya na luve teigwane." ¹⁰ E tasi niya botoga; io o Reveka talega ni vo vavuwaniya mai vuwa e kiya, Na leya momo o Waisake. ¹¹ Ni ru sibere ni sucu, se me ru vaveya na kwa oka se na kwa bura, me tudei ke na kwa e lesiya i mata qai djigiya na Kalou, e vo jikai ga ina vuku ni cakacaka, e vuku ni vo lai covi. ¹² E vo lai kwai vuwa na lewa igi, o kiya e vo qase vuwadru ena qwaraviya kiya e vo luve. ¹³ E vo kodaki ke na kwa e vo volai, o yau qu vo okajiya o Jekope io qu na vo tasi okajiya o Iso. ¹⁴ Io medu qai kwaya? bara vo nokoto tu vuwa na Kalou nai vukivuki tasi dodonu? e jikai sara. ¹⁵ Ni vo lai kwai vo Mosese o kiya, o yau qu na lomaniya o kiya qu lomaniya io aqu na yalo oka vuwa, qu na yalo oka ke. ¹⁶ Me balejidru o rau na okajiya, se me balejidru o rau na wavu, io e balejiya ya na Kalou e yalo oka mai. ¹⁷ Ni vo lai kwai vo Fero nai vola tabu, "Ina vuku ni kwa ikwe qu lavejiko cake ke, me qu vatakiya vuwako na lequ kakai, me lai kwai talega qu yaca vata na vuravura taucoko." ¹⁸ O kiya ikwe e vo yalo djina ke o kiya ve mu yalo ke, e vo vakaikai takiniya o kiya e yalo yakiya. ¹⁹ O na qai kwaya vuwako yau me balejiya na cava re mutu beitakiniya ke? io o cei re e vorajiya na leya lewa? ²⁰ Me kuwa ni kodaki ikwe, o iko na tamata; O cei re o iko mo ocajiya na Kalou? Ena kwaya rewa na kwa lai kwa vuwa me vaveya vuwako yau na kwa ikwe balejiya na cava?" ²¹ E bara jikai ni vavitaliatakiniya na qwele me buli me tete me vai ke e kiya na kuro talei, e kiya na bilo me buli ve na qwele, e kiya tale me kuwa ni buli. ²² Io vo kodaki ivei ke vo okajiya na Kalou, me du varaitakiniya na leya oca, me vatakeya muni na leya kaikai, a vosojiya balavu, sara ina vi bilo ena lai ocaji re vo varau tu me rusa. ²³ Me vakilayatale ga na vikwa e levu na leya oka ina vi bilo e lomani,o kiya ina uku uku. ²⁴ Io vo kedatou ga, du laicovi ga o kedatou o kiya e jikai boto mai vuwa o rau na Jiu mai vuwadru muni na vi matanitu kanikiya: ²⁵ Me kodaki tale ga na kwa e kwaya o kiya ve la i vola Osea, "O yau qu na vatokoniya o rau e jikai ni lequ tamata imata, me ru qai lomani. ²⁶ Ena yaco tale ga na vivanuwa e lai kwai ke imata vuwadru, e jikai ni lequ tamata o kemutou, Eru qai vatoko ke me niya na Kalou cola." ²⁷ Eru lai covi o rau na Isireli o Aisea talega, kodaki e tautauvata na ledru i wiliwili na Isireli vata o rau na volivoli na waitaci, io meru cola ga na keya vo. ²⁸ Ni vo yaco na leya tata o Jisu i vuravura ena vaojiniya dai me valekaleka takiniya muni. ²⁹ Me kodaki talega na kwa e kwaya i mata o Aisea, me kodaki ni jikai ni kiya na kawa e vadaniya vo kedatou o Jiova ni lewe levu, edu kodaki o Sotoma, edu vo kodaki o Komara. ³⁰ Na cava medu qai kwaya? o rau na vi matanitu kanikiya, o rau eru jikai ni vatekuciya no vadodonu nidru vo vadonui ina vabaujiya. ³¹ O rau ga na Isireli, o rau eru vo tekuciya nai vunau meru vadonui ke, eru tasi yaco ve na vunau igi. ³² I na vuku ni cava? ni ru vo tasi tekuciya na vabaujiya I na cakacaka ga ni vunau, ni ru vo tarabe ve na vatu e dau vivatarabetaki. ³³ Me kodaki na kwa vo volai, Tolaviya, Aqu vo tauniya ga mai Saioni na vatu ni vivatarebetaki qai niya na vatu ni valomaburataki, io, o kiya yakiya ena vabaujiya e na tasi vamaduataki.