¹ O keya ikwe e tasi dodonu ke meru lewai me ru lai ocaji o rau eru no vata qeiniya o Karisito Jisu. Eru tasi tekuciya no na i tovo vayago, eru tekuciya ga na Yalo Tabu. ² Nivo serekiko au mai na i vunau ni bura qeiniya na mate, nai vunau ni cola vuwa o Karisito Jisu. ³ Ni jikai ni rewarewa ina i vunau, e malumalumu i na vuku ni tovo va ago, a qai lewaiya na Kalou me mate na bura ina yago, a vatalajiya o luveya ina i tovo vayago e notu ke na bura, me jiya i soro ni varau bura. ⁴ Medu vaveya rewa ke nai varau dodonu ni vunau, nidu tasi tekuciya no nai varau vayago du tekuciya ga na yalo. ⁵ Niru okajiya na vikwa vayago o rau na i tovo vayago; na vikwa vayalo o rau na vai tovo vayalo. ⁶ Na vuni mate e okajiya nai tovo vayago; a vu ni cola na vacegu na oka jiya na i tovo va yalo. ⁷ Niru vo vimecaki na i tovo va yago qeiniya na Kalou: ni jikai ni varogo na i vunau ni Kalou, e dredrei sara me kodaki ke. ⁸ O rau eru i tovo va yago, eru tasi vaveya rewa na kwa e oka vuwa na Kalou. ⁹ E jikai vi va yago na lemutu i varau, e vayalo ga, kodaki e djina ni nokoto no mutu yaloga na Kalou. Kodaki e kiya na tamata e jikai ni nokoto e yaloga na Karisito, e tasi leya o kiya ikwe. ¹⁰ Kodaki e no mutu yaloga na Karisito, e djina ga e na mate na yago i na vuku ni varau bura; na yalo e cola i vuku ni vivadonui. ¹¹ Kodaki e no vakiya mutu yalo yalo o keya va tu niya cake o Jisu mai na mate, o keya vatuniya mai o Karisito mai na mate e na vacola niya mutu yago e o mate rewa, e yalo e vo no vakiya vuwa mutu yalo. ¹² Ikwe o mutou na viwekani, du tasi vauci i nai tovo va yago, medu teku viya na i tovo va yaga. ¹³ Me mutu na mate kodaki mutu tekuciya na i tovo vayago; kodaki e vivuke vuwako mutou na Yalo Tabu me vadevuniya nai varau vayago mutu na cola ke. ¹⁴ O rau ga e tuberidru na yalo ni Kalou eru jiya i luve ni Kalou. ¹⁵ Mutu vo tasi rewajiya tale na yalo ni bobula me mutu mataku; mutu rewa jiya na Yalo Tabu mutu lai vabaujiya ke me mutu jiya i luve o keya me mutu lai coco ke Apa, Tamaqu. ¹⁶ Na gauna yalo ikwe e kwa mai ve du yalo, ni du jiya iluve ni Kalou. ¹⁷ Kodaki du jiya iluve, e du jiya i taukei; du vo taukei jiya na vikwa ni Kalou, du taukei vata o Karisito; kodaki du vosojiya vata qeiniya na bura, du na vakalougata taki vata qaneya. ¹⁸ E kodaki e jikai ni yaga meru tautauvata na kwa bura e lai vosoji i na cola ikwe qeiniya na kalougata e na vata kei vuwako datou i bere. ¹⁹ E okajiya valevu o vuravura me wawa no ga meru vata keya o rau niru jiya luve ni Kalou. ²⁰ Ni vo va malumalumutaki o vuravura me bura, a tasi okajiya, e vuku o keya ga o keya a vamalumalutaki niya, nivo vanuinui no, ²¹ nivo sere mai o vuravura i na vivabobulataki i na rusa, me gwalala ma vai ukukutaki vata qeinidru na luve ni Kalou. ²² Ni du vo kilajiya, avo vutugu vata o vuravura taucoko, a vo unuviya na rarawa, me cava jiya na siga ikwe. ²³ E jikai ni niya ga,o datou muni, a du rewa jiya nai sevu ni Yalo Tabu, a du vutugu no ve du yaloga nidu waciya me lai vabauji medu jiya i luve, me vacolai du yago. ²⁴ Nidu vo cola i na i nuinui: io na i nuinui e reba i na kwa e lai dani ni jikai ni jiya nuinui djina: e nuitaki niya vacava na tamata na kwa e qai daniya? ²⁵ Kodaki du nuitaki niya na kwa du tasi daniya, du vosojiya medu waciya no. ²⁶ Na yalo tabu muni e vukeiya na ledu malumalumu: nidu jikai ni kila jiya na kwwa e oka vuwako datou medu kereviya: a masulaki niko datou na yalo tabu i na vutugu e tasi lai kwai rewa. ²⁷ O keya e djikeviya du yalo e kila jiya e yalo na yalo tabu, ni musulaki nidru na tamata lotu me kodaki e yalo na Kalou. ²⁸ Ni du kila jiya ni vivuke na kwa taucoko ga meru oka ke o rau eru lomaniya na Kalou, o rau eru lai covi me kodaki na kwa e vo nakiji devu. ²⁹ O rau taucoko e kilajidru i mata o keya, a lesidru i mata meru tautauvata qeiniya o luveya, me ulumatuwa o keya vuwadru la tacini eru levu. ³⁰ O rau aru lesidru i mata o keya, a qai covidru o keya, a vadonujidru: o rau a vadonujidru o keya, a vai ukuuku taki nidru. ³¹ Na cava medu qai kwa na vi kwa i kwe? kodaki e totaki niko datou na Kalou, o cei me kedu meca? ³² E kodaki i vai o keya e jikai ni sarataki niya o luveya djina, avo soliko datou me kedu i sosomi taucoko ga, e dredrei va cava vuwa me soliya boto vuwako datou na kwa taucoko ga vata qeiniya? ³³ O cei me bilitaki nidru e ru vo djigitaki nidru na Kalou? na Kalou e vo vadoniya. ³⁴ O cei e lewaiya meru lai ocaji? O Karisito Jisu ga evo mate, io, a vo cola tale, avo no i na lima matau ni Kalou, a vo masulaki niko datou. ³⁵ O cei me wasekiko datou mai i na loloma ni Karisito? e kwa rarawa, se na yaluma, se na vi vaburaburataki, se na dau siga, se na jikai ni sulu, se na vi vamatakutaki, se na i seleiwau? ³⁶ Me kodaki na kwa kwa e volai, e balejiko mutou madu va mate ke na siga taucoko me bogi: madu tatauvata na sivi e va mate. ³⁷ E jikai, na kwa taucoko ga ikwe e du gumaikali ke, e vuku o keya e lomaniko datou ke. ³⁸ Ni qu kilajiya vai djina, e jika ni rewajiya na mate, se na cola, se o rau na agilosi, se o rau na simata, se o rau na kaikai, se na vi kwa e cava mai nikuwa, se na vikwa e qai cava ma i bere, ³⁹ se na kwa e yawa i yata, se na kwa eno sara i ra, se kanikiya na kwa, me wasekiko datou mai na loloma ni Kalou, evo cava i na vuku o Karisito Jisu na ledu Turaga.