¹ Mutu vo tasi kilajiya, na viwekani niqu vo kwa ga vuwadru meru kilajiya nai vunau, a vo vaucidru na tamata nai vunau i na visiga taucoko? ² Ia na lewa vateigwane, e vo vauciya nai vunau mai vuwa la teigwane, ni vo colo no o keya; ia kodaki e vo mate la teigwane, ena qai sereki ke na lewa mai na i vunau ni viwajini. ³ O keya ena vatokai ke me dauteigwane, kodaki e vo lai vateigwane vuwa e kiya tale na teigwane. ⁴ Mutu vo kodaki ke, na viwekani ni mutu vo sereki mai nai vunau ina vuku ni yago i Karisito; me kanikiya mutu viwajini vata, io o keya a vo vatucake tale mai na mate me du vuwa ke vuwa na Kalou. ⁵ Ni du vo nokoto no vayago, e vo dau tubu vakaikai ve du jiki na gagadre bura, vo tubu mai nai vunau, me vuwataki ke na mate. ⁶ Ia du vo qai sereki mai nai vunau, ni du vo qai mate ke a vo vauciko datou; medu vaveya na viqwaravi ina i tovo vou ni yalo,a jikai ina i tovo makawa ni vunau. ⁷ A cava me du qai kwa? E bara bura nai vunau? E jikai sara. A qu tasi kilajiya se cava nai valavala bura, kequ tasi kilajiya nai vunau: niqu tasi kilajiya se cava na daukocokoco, kodaki e tasi kwa nai vunau, Kuwa ni kocokoco. ⁸ Ia na bura, ni vo kaikai ina vuku ni vunau, e vo vatubuniya ve qu yalo na gagadre bura taucoko. Ni vo mate na bura ni vo jikai nai vunau. ⁹ Ia a qu colo ga i mata ni vo jikai nai vunau; ia ni vo la mai na tata ni vunau, avo colo tale na bura, aqu qai mate ke. ¹⁰ Ia na tata ni vunau, o keya evo yaco ke na colo, qu qai daniya ni yaco kena mate. ¹¹ Ni vo kaikai na bura, ina vuku ni tata ni vunau, a qu vo temaki ke,a vamateniko yau. ¹² Ia ni vo savasava nai vunau, a vo savasava talega nai varo, a vo dodonu talega, a vo oka. ¹³ A vo yaco na kwa oka na kwa mequ mate ke? E jikai sara.Na bura ga, me rairai ke ni vo bura, a vo qulumiya na kwa oka me vaveya ke mequ mate, me rairai ke na bura me bura djina sara ina vuku ni tata ni vunau. ¹⁴ Ni du vo kilajiya ni vo kwa vayalo nai vunau: ia o yau, qu vo vayago no ga, a qu vo volitaki i na bura. ¹⁵ Na kwa qu vo vaveya no, qu vo tasi okajiya, ia na kwa qu vo okajiya qu vo tasi vaveya; ia na kwa qu vo burajiya, qu vo vaveya no. ¹⁶ Ia kodaki qu vo vaveya na kwa qu vo tasi okajiya, qu vo kwa ke ni vo oka nai vunau. ¹⁷ A vo tasi niko yau djina qu vaveya, na bura ga e nokoto vako yau. ¹⁸ Ni qu vo kilajiya ni vo jikai sara ni nokoto vuwako yau ina lequ i tovo vayago e kiya na kwa oka; ni vo nokoto ga vuwako yau na okajiya na kwa oka; ia na kaikai mequ vaveya ke, qu vo tasi daniya. ¹⁹ Ia na kwa oka qu vo okajiya,qu vo tasi vaveya; ia na kwa bura qu vo tasi okajiya, qu vo vaveya no ga. ²⁰ Ia kodaki qu vo vaveya na kwa qu vo tasi okajiya, e vo tasi niko yau djina qu vo vaveya,na bura ga e nokoto vuwako yau. ²¹ Ia qu vo daniya ke e kiya nai vunau, a vo nokoto no ke vuwako yau na bura niqu vo mata vaveya ke na kwa oka. ²² Ni qu vo okajiya nai vunau ni Kalou qu yalo djina. ²³ Ia qu vo daniya e kanikiya nai vunau vuwa qu jiki, aru vo vivala vata nai vunau vo nokoto vuwa qu yaloga, avo vabobula takiniko yau ina i vunau ni bura, o keya e nokoto vuwa qu jiki. ²⁴ A tamata valoloma o yau! o cei ena serekiko yau mai na yago ni mate ikwe? ²⁵ Aqu vo vaokaoka vuwa na Kalou ina vuku ni ledu Turaga o Jisu Karisito. Ia vo kodaki ikwe, qu vo qwaraviya na vunau ni Kalou qu yalo djina, ia nai vunau ni valavala bura ina lequi tovo vayago.