¹ Na cava du na qai kwaya? vo valavala ca ture, me tubu valevu ke na loloma?. ² E jikai sara. Nidu vo mate na valavala ca, edu na vaveya kodaki ivei na valavala ca? ³ Mutu vo tasi kilajiya, o datou du vo vavitaisotaki vo Jisu karisito, edu vo vavitaisotaki vena leya mate? ⁴ O kiya edu vo bulu vata qeniya, ni du vo vavitaisotaki ve la mate me kodaki evo tucake tale mai na Karisito mai na mate me kodaki la kaikai o Tamaya, me du valavala kodaki ina cola vou. ⁵ Ia kodaki edu vo kiya vata me kodaki o kiya la mate, edu na kodaki talega o kiya na gauna eya tucake tale mai na mate. ⁶ Nidu vo kilajiya iqoi niru vo lai vako vata ina kauvelatai o rau na ledu tamata makawa, me takwali na yago ni valavala bura, me du kuwa tale ni bobula ke ina valavala bura. ⁷ Ni vo sereki mai nai valavala bura o rau na vo mate tu. ⁸ Ia kodaki edu vo mate vata qeniya na Karisito, edu na vadjinadjina takiniya ni du cola qeniya talega: ⁹ Ni du vo kilajiya nivo tucake tale ; evo tasi rewajiya tale na mate. ¹⁰ Ni vo mate o kiya, vo mate vakiya ; na vuku ni valavala bura, ia ni vo cola mai evo cola mai vuwa na Kalou. ¹¹ Me mutu kodaki talega ke ni mutu vamareqeji jiko mutou mai na mate mai na valavala bura me mutu cola vuwa na Kalou me balejiya o Jisu Karisito. ¹² O kiya me qai tasi gumaikali mai na ivalavala bura lemutu yago evo mate rewa, me mutu tekuciya na bura. ¹³ Kuwa talega ni soli ga mutu jiki ni lala vuwa na Kalou me tara ke na kwa e donu. ¹⁴ Ena tasi vavitaliataki kemutou nai valavala bura, ni mutu na tasi lewai vena vunau, ina loloma ga. ¹⁵ Ia evo kodaki ivei? nidu vo valavala bura ture, nidu na tasi lewai vena vunau, vena loloma ga e jikai sara. ¹⁶ Mutu vo tasi kilajiya, o kiya yakiya e soli mutou rewa mo leya tamata me mutu talairewarewa ke, se na taro bura me mutu mate ke, na taro dodonu me mutu vadoniya ke? ¹⁷ Ia me ia na vaokaoka vuwa na Kalou, ni mutu vo tekuciya,mai na vuni yalomatuwa, o kemutou mutu vabobulataki na valavala bura, na varau ni vavuvuli mutu vo vavuliciya ke. ¹⁸ Ia ni mutu vo sereki mai na valavala bura, mutu qai qwaraviya nai valavala dodonu. ¹⁹ Aqu vo tata vatamata ga, nivo malumalumu mutu lala. Ia mutu soliya imata mutu lala me qwaravi ke na kwa e dukaduka vata na valavala bura e levu ke na bura, me mutu soliya mutu lala me qwaravi ke na kwa e dodonu me tara ke na kwa e savasava. ²⁰ Ni mutu a bobula no mai na valavala bura, mutu a yawa tu nai valavala dodonu. ²¹ Ia vo cava vuwa mutu vo rewajiya, ina gauna igi, mai na vikwa mutu maduwa ke? nivo jiya devudevu ni vikwa iqoi na mate. ²² Ni mutu vo sereki mai na valavala bura, me yaco me tamata ni Kalou, mutu qai rewajiya na vuwa ni valavala savasava; vata nai devudevu na cola tawa mudu. ²³ Nivo sauni valavala bura na mate, ia nai solisoli ga ni Kalou na cola tawa mudu, ina vuku i Jisu karisito na ledu Turaga.