¹ O kiya ikwe e du vo vivadonui vena vabaujiya, me du qai viokaji qe niya na Kalou i na vuku ni ledu Turaga o Jisu Karisito: ² I na vuku muni ga , ni du tosovia rewa ke, i na vabaujiya na loloma ikwe eru na qai no ke; me du marautakiniya muni ni du vo nuitaki na vivakalougatataki ni Kalou. ³ A vo jikai ni kiya ga, me du marautakiniya talega na vuku ni vi kwa e tasioka; ⁴ Io na daunivivatovolei mai na vosojiya; ena i nuinui mai na dauvatovolei. ⁵ Io a vo jikai na maduwa vena vuku ni nuinui; ni sovaraki niya vedu yalo na loloma ni Kalou ni vo sovajiya vuako datou na Yalo Tabu. ⁶ Ni vo mate na Karisito me kedru isosomi na tamata tovo bura i na gauna e vo namaki mai mata, no du vo malumalumu no. ⁷ Ni vo jikai soko e kiya re e mate me isosomi ni e cola yalododonu: Io bara vo kiya e balejiya me mate me i sosomi ni e cola dauloloma. ⁸ Io na Kalou e vatakeya na leya loloma vuako datou, ni vo mate na Karisito me kedu i sosomi ni du vo e cola bura. ⁹ Io ni du vo vadonuyi ena vuku ni leya dra, ena qai rewarewa cake sara medu qai vacolai mai na oca e vuku. ¹⁰ Io, kodaki edu vo vi okaji qeniya na Kalou vena vuku ni leya mate na layi luve, ni du vo vi buraji, ena qai rewarewa cake, no du vo viokaji tu, me du vacolayi mai na vuku ni leya cola. ¹¹ A tasi niya boto ga, io adu co marautakiniya muni na Kalou ena vuku ni ledu Turaga o Jisu Karisito, o kiya a vavuniya medu viokaji tu. ¹² Io me kodaki ni vo unu i vuravura na i tovo bura e vuku e kiya e cola, vata na mate ena vuku ni tovo bura; a vo yaco me kodaki ni vo bura na e cola taucoko ga, no vo cala na ecola taucoko: ¹³ E vo notu i mata na i tovo bura, qai yaco i bere na tata ni Kalou: a vo tasi okaji na i tovo bura ni jikai na tata ni Kalou. ¹⁴ Io la gauna o Atama qai yaco viya la gauna o Mosese evo vavitaliya tu o mate vo rau talega eru jikai na ledru i valavala bura me kodaki la tasi varorogo o Atama, o kiya talega na leya mataku vo lamai i bere. ¹⁵ Io aru vo tasi tautauvata sara na vawacike ,vata na i solisoli muni. Io kodaki eru vo mate e lewe levu ena vuku ni ledru vawacike na lewe kiya, ena vo rewarewa cake sara me yaco valevu vuadru na loloma ni Kalou, vata na keya solisoli na loloma, e ru vuku gauna e cola e lewe kiya, o Jisu Karisito. ¹⁶ Eru vo tasi tautauvata na kwa vo yaco ena vuku ni leya cala e kiya ga, vata na i solisoli: ni vo kiya ga na kwa e yaco ke na lewa me du cala, io na i solisoli botoga a vo yaco vuadru na vica na ledru valavala bura me ru vadaniya ke. ¹⁷ Io kodaki ni vo gumaikali na mate ena vuku ni lewe kiya, ena vawacike ni lewe kiya: ena qai rewarewa valevu cake vuadru na yacovidru na loloma levu vata na i solisoli ni vivadonui, me ru gumaikali ve na cola e vuku ni lewe kiya, o Jisu Karisito. ¹⁸ O kiya ikwe, me kodaki ni vo lewai me layi ocaji na ecola taucoko ena vuku ni kiya ga na cala: e vo koadaki talega ke na vuku ni kiya ga na i tovo dodonu me rewa ni ru vadonuyi na e cola taucoko me ru colxa: ¹⁹ Me kodaki ni ru vacalayi na lewe levu e na leya vawacike e kiya ga na e cola, e vo vadonuyi muni ke na lewe levu ena vuku ni ledru vawacike na lewe kiya. ²⁰ Avo kau mai na tata ni Kalou me na uasivi cake valevu na leya loloma: ²¹ Me kodaki ni va gumaikali na i tovo bura vena mate, me gumaikali my ni ga na loloma, me vadonuyi, vena cola tawamudu, e vuku o Jisu Karisito na ledu Turaga.