¹ O kiya e malumalumu na leya vabaujiya me mutu kau vuwadru, io me kuwa ga ni lewayi noga na vikwa e burajiya. ² E kiya e dodonu me kania vailowa na kwa taucoko: io o kiya evo malumalumu, e dau kaniya na sasau ga. ³ Mo kuwa ni dau beciya o kiya e tasi kana vuwa e kana: io me kuwa ni lewaiya o kiya e kana: nivo okajiya na Kalou. ⁴ O cei o iko mo lewaiya na tamata ni turaga tani? e notu o kiya, vo lutu, vuwa na leya turaga. Ia, ena no tuga: nivo rewarewa vuwa na Kalou me vadeitakiniya . ⁵ E kiya e rokoviya e kiya na siga qai jikai ni matai. Qai kanikiya la rokoviya na siga taucoko. Me kala lewaiya vainiya na tamata yakiya e yaloga. ⁶ O kiya e numiya na siga, evo kwa ga vuwa na Turaga na leya numiya; ia o kiya e vo kana, ena kwa ga vuwa na Turaga na leya kana, nivo vaokaoka o kiya vuwa na Kalou; io o kiya e tasi kana, e na kwa muni vuwa na Turaga na leya tasi kana, a qai vaokaoka o kiya vuwa na Kalou. ⁷ Ni tasi kiya ve kedatou e cola e vuku ga, se kiya e mate e vuku ga, ⁸ Io kodaki edu vo cola, edu cola e vuku ni Turaga, se du mate, edu mate ena vuku ni Turaga: o kiya ikwe edu vo leya ke na Turaga, se du cola se du mate. ⁹ O kiya ikwe e vo mate ke na Karisito, a qai cola tale, me ledru Turaga o kuru na vo mate qainedru na cola. ¹⁰ Io o iko, o vo lewaiya o wekamu na vuku ni cava? se o cei tale, o vo beciya o wekamu ina vuku ni cava? nidu na tucake i na mata ni nono ni vilewai ni Kalou. ¹¹ Ni vo volai, "Evo kwa na Turaga, me kodaki nivo cola, eru na jikituru vuwako yau o kuru na tamata taucoko ga, Ia e na vatusaniya vuwa na Kalou na yame taucoko ga." ¹² O kiya ikwe edu na kala vatusa niko datou vuwa na Kalou. ¹³ O kiya me du qai kuwa ga ni du vivalewai no, ikwe ga, me mutu lewaiya, me kuwa e kiya me vaveya e kiya na me vataucabe me se me lutu ke o wekaya. ¹⁴ Aqu qai kilajiya,qai vadjinadjinatakiniya voko yau na Turaga o Jisu, nivo jikai na kwa e dukaduka vai niya ga; io vuwa e numia ni dukadukali na kwa, a qai, dukadukali ga vuwa. ¹⁵ Io kodaki evo rarawa e yaloga o wekamu ena vuku ni cawa. O qai tasi vukivuki me kodaki na loloma. Kuwa ni varusaiya na kemu cawa, o kiya e mate ena vuku ni Karisito. ¹⁶ O keya me kuwa ni tata bura takiniya na lemutu kwa oka: ¹⁷ Ni tasi jiya cawa se kwa ni somu na matanitu ni Kalou; na yalo dodonu ga, vata na marau ni Yalo Tabu ¹⁸ Ni o kiya a qwaraviya na Karisito e na vikwa i kwe, e oka vuwa na Kalou, avo oka jidru talega o rau na tamata. ¹⁹ O kiya i kwe me du vatekuciya ke na vikwa e okaji, vata na vikwa edu vavulici ke. ²⁰ Kuwa ni varusa niya na cakacaka ni Kalou ina vuku ni cawa. E djina ga e savasava na kwa taucoko ga: ia e bura vuwa na tamata e kana meru tarabe ke e yavalu. ²¹ E oka mo kuwa ni kaniya na lewe ni manumanu, se somu waini, se vaveya e kiya na kwa e lutu ke o wekamu. ²² Na vabaujiya evo notu vuwako, me no vuwako ga na mata ni Kalou. E kalougata na tamata e jikai ni beitaki vuwa na vi kwa e vadredreiya no. ²³ Ia o kiya e tasi djinajiya ni vai vuwa, evo lewai me lai ocaji kodaki e kana, ena vuku ni leya kana qai tasi djinajiya: ia na kwa taucoko ga eru tasi rewa ni djinajiya ni vai vuwako datou, e valavala bura iqoi.