¹ Me ru mamakutu vuwadru na na Turaga levu o rau na tamata tucoko ni a jikai a Turaga a tubu cake mai vuwa na Kalou o rau eru vo turaga ikwe a vo lesidru na Kalou. ² Io o iko a varojiya na Turaga, vorajiya na Kalou: io, ena ocajidru o rau e varijiya. ³ O rau na Turaga eru tasi vo mataku vuwadru eru vo vai oka, vuwadru ga eru vo vai bura: o qai okajiya soko mo kuwa ni matakuciya na Turaga mo vavea na kwa e oka e na qai rokovi ke o kiya. ⁴ Na leya i vatala na Kalou mo oka ke vuwa. ⁵ O kiya ikwe e dodonu ke vuwakomutou me mutu talairewarewa, e jikai ni balejiya ga ni lemutu lewa ve mutu vuni yaloga. ⁶ O kiya me mutu dau soli niru vo jiya lai vavatala na Kalou, eru vo qwaraviya no na kwa ikwe. ⁷ O koya me mutu dau soliya muni vuwadru na kwa taucoko ga e dodonu, na soli vuwadru e levu mai solisoli, no sigani vuwadru na ledru i sigani, mutu matakucidru o rau eru dodonu meru meru la i matakuci. ⁸ Me kuwa ni leya e kiya na kwa o kiya ena jikai ni saumiya, na daulomani ga me vai no, ru dau tekuciya na vunau taucoko o kiya e dau lomaniya na tani. ⁹ Io, iqoi me kuwa ni vai na driva, no kuwa ni kocokoco, vaveya kodaki e kiya tale nai vavuvuli, vo no vata taucoko na tata iqoi mo lomaniya o wekamu me kodaki sara ga na lemu lomaniko. ¹⁰ O kiya e dauloloma ena tasi burajiya o wekaya o kiya iqoi ena vai ke na vanuwa taucoko no loloma. ¹¹ Ia iqoi ni du kilajiya na gauna, ni vo gauna ikwe me mutu vo yadra mai na moce; ni vo voleka na cola, e yawa na gauna ni ledu vabaujiya. ¹² Evo varau oji na bogi, e vo voleka na siga, o kiya medu luvajiya dai mai valavala ni gilogilo, medu vaiyaragi tu vena rarama. ¹³ Me du laviya na kilikili, me kodaki na siga; me kuwa na soqosoqo riva se na mateni me kuwa na daudara se na valavala velavela, me kuwa na vivala se na kakase. ¹⁴ Io mutu visulu ina lai sili o Jisu Karisito, kuwa ni varaitakiniya na gagadre bura ni yago.