1
O keya ikwe, aqu vo vamamasu vuwako mutou na veiwekani ina vuku ni loloma levu ni Kalou; me mutu soliya mutu lala me madrali ni cola, me savasava, me oka vuwa na Kalou, me lemutu i soro vayalo.
2
Io, mutu kuwa ni vatotovata takiniko mutou: io me mutu visau ga ni vo vavoutaki mutu yalo, me mutu kilajiya rewa ke e yalo na Kalou, ni yaga, e oka, qai dodonu sara.
3
Io, na loloma e soli mai vuwako yau, aqu vo kwaya vuwadru yakiya na tamata vuwako mutou, me kuwa ni kiya me dokaiya me kodaki ni tasi dodonu me dokai.
4
Me kodaki nivo kiya ga du yago, qai levu du jiki ni lala, io, qai tasi vitavi vata du jiki ni lala taucoko;
5
E kodaki tale ga ke o kedatou, na lewe levu, adu vo yago vata ga i Karisito.
6
Nidu vo rewajiya na i solisoli duidui me kodaki na loloma a soli mai vuwako datou: kodaki me du parofisai, me du parofisaitaki me kodaki na varau ni ledu vabaujiya.
7
Se na dauviwasei, medu dau ia na viwasei; se o keya e dau vavulici, me vivavulici na ga. Se o keya na dauvunau,me vunau no ga; o keya e dau ia na soli kwa, me djina ina leya lomaniya, o keya e dau lewa me vakaikai sara ke; o keya e dau loloma me ia na reki.
9
Me kuwa ni vigiriji na loloma, Me mutu burajiya sara na kwa bura; io me mutu kabijiya sara na kwa oka.
10
Mutu vilomani sara i na vilomani ni vitacini; me levu sara na lemutu vivarokorokotaki.
11
Ni mutu vo gumaikali me mutu kwa sara ni vucesa ke. Me katakata mutu yalo, me mutu qwaraviya na Turaga.
12
Mutu marau ina nuinui, vosojiya na kwa rarawa, ia no ga na masu.
13
Viwase yakiniya vuwadru na dravudravuwa eru vo lotu. Mutu vacegu nidru na vunilagi.
14
Mutu tata vakalougata taki nidru o rau eru dau vaburabura niko mutou, tata vakalougata takiniya ga, me kuwa ni ocajidru.
15
Mutu marau vata qainidru na marau, qai tagi vata qainidru eru tagi.
16
Mutu yalovata no vainiko mutou. Kuwa ni numiya na vikwa vaturaga, mutu vimaliwai vata qainidru na tamata yalai. Mutu kuwa ni numiko mutou ni mutu vo vuku.
17
Kuwa ni saumiya lesu na cala ni kiya ecola. Nakijiya mo vaveya simata na vikwa dodonu ve ru mata na tamata taucoko.
18
Kodaki evo rewa, mutu tovoliya me mutu vilomani vata qainidru na tamata taucoko.
19
O kemutou mutu vo li lomani, mutu kuwa ni saumiya tale na bura a vai vuwako mutou, io me mutu biujiya vuwa na Kalou me saumiya; nivo volai; "Na lequi tavi me qu ocajiya; aqu na qai saumiya vayi niko yau, vo kwa na Turaga."
20
O kiya mo qai vakaniya na kemu meca, kodaki e mata kana, kodaki e mata somu. mutu vasomiya: o na qai koroniya ke na qilaiso ve ulu nivo mudre tu."
21
Me kuwa ni rewajiko na bura, io, mo rewajiya ga na vikwa oka.