¹ E dodonu vuwako datou, du kaikai, medu voaojiya na ledru malumalumu eru jikai ni kaikai, medu kuwa muni ni vaveya na kwa e oka vuwako datou. ² Mutu vaveya yakiya na kwa e oka vuwadru na ledatou, na kwa e yaga me vavulici ke o keya. ³ Io na Karisito muni e jikai ni vaveya na kwa e oka ga ke o kiya; me kodaki ga ni volai, e tau vuwako au na ledru tata bura eru tata vaburabura taki niko. ⁴ Io na kwa taucoko ga a volai i mata a volai medu vuli ke, medu vosojiya na vacegu e la mai ina i vola tabu, me rewa ke na nuinui. ⁵ Me soliya re vuwako mutou na Kalou, o kiya na vuni vosojiya, qei niya na vacegu, mutu yalo vata vai niko mutou me kodaki o Karisito Jisu. ⁶ Me mutu yalo vata mutu domo vata ni mutu varokoroko takiniya na Kalou, o keya o tamaya o Jisu Karisito na ledu Turaga. ⁷ O keya me mutu vacegu vainiko mutou, me kodaki ni vacegu niko mutou na Karisito, me varokorokotaki na Kalou. ⁸ A qu kwa ni jiya i talatala o Jisu Karisito vuwadru eru cili, me vta keya ni djina na Kalou, me va djinadjinataki niya na tata ni yalayala vuwadru na qase. ⁹ Meru varokoroko takiniya na Kalou o rau muni na vimatanitu kanikiya ina vuku ni leya loloma; me kodaki ni volai na vuku ni kwa ikwe qu vatusa niko ke ina kedru vimama na vimatanitu kanikiya, a sere ve mutu yaca. ¹⁰ A kwa tale, mutu marau vata na vi matanitu kani kiya, qei nidru na leya tamata. ¹¹ E kiya tale, Mutu varokorokotaki na vimatanitu taucoko ga: mutu varokoroko takiniya valevu, o mutou na vivanuwa taucoko ga. ¹² O Aisea muni e kwa, E tubu e waka o Jese, qei niya e tu cake me lewaiya na vimatanitu kanikiya; eru na vararavi vuwa o rau na vimatanitu kanikiya. ¹³ Me va vuqa niko mutou re na Kalou, o keya na vuni nuyinuyi ina marau taucoko ga qeiniya na vacegu ni mutu vabaujiya, me levu sara na lemutu nuyinuyi ina vuku ni leya kaikai na Yalo Tabu. ¹⁴ O au muni, qu vakasamataki niko mutou, o wekaqu, ni mutu vo vuqa i na yalo loloma, ni mutu vo rewajiya muni me kala vivavulici vainiko mutou. ¹⁵ Qu vo doudou ga, mequ volavola va lailai yaji vuwako mutou, na vi wekani, mequ vanumiko mutou tale ke. ¹⁶ Me balejiya na loloma e soliya vuwako au na Kalou, avo cava mequ niya lai talatala o Jisu Karisito vuwadru na vimatanitu kanikiya, mequ vaveya na cakacaka i na i tukutuku oka ni Kalou, me layi okaji na i cabo-cabo-ni vimatanitu kanikiya, nivo va savasava takinidru na Yalo Tabu. ¹⁷ keya ni vo notu ke vuwako yau na kwa mequ valevu niko yau ke vuku o Jisu Karisito ina vikwa ni Kalou. ¹⁸ Ni qu vo tasi doudou mequ cavujiya na kwa kanikiya; na kwa ga e va vayagataki niko au ke na Karisito, me va rewarewa taki nidru na vi matanitu kanikiya, ina tata qeiniya na i varau, ¹⁹ i na vuku ni vo kaikai na vi kwa mana qei niya na kwa e va karaciko, e vai i na kaikai ni Yalo Tabu, aqu tekivu ke mai Jerusalemi, a la vali me cava i Ilirika, niqu vunautaki niya taucoko na keya i tukutuku oka o Karisito. ²⁰ A qu gumaikali sara kodaki ke, mequ vunautaki niya na i tukutuku oka, e jikai ga na i vunau e lai kwai devu ke e yaca o Karisito ke qu dereiya boto na kwa e yataga ni yavu ni tamata kani kiya: ²¹ me kodaki ga ni volayi o rau na tasi layi kwai re vuwadru o keya, eru na daniya: o rau eru tasi varogo, eru kila jiya, ²² o keya i kwe a tarovi va levu ke na lequ la vuwako mutou. ²³ Ni vo jikai na kwa mequ nokoto ke i tavo i kwe, e vo yabaki wara aqu okajiya ke mequ la vuwako mutou. ²⁴ na vo cava mai na lequ la i Sipeni:( niqu vo numiya mequ daniko mutou i na lequ la, me mutu meiko au i na lequ i yatoyato ke, ni vo devu re na lemutu vavacegu niko au va lailai i no vata. ²⁵ Aqu qai la i Jerusalemi, mequ kau na soli vuwadru eru lotu. ²⁶ Ni ru vo oka jiya na kwai Masitoniya qeiniya o Akaia, meru vaveya e kiya nai solisoli ni loloma me ledru na dravudravuwa eru lotu mai Jerusalemi. Io, eru oka jiya; e dodonu meru soli kwa vuwadru. ²⁷ Io, kodaki eru rewajiya mai vuwadru na ledru kwa vayalo o rau na vimatanitu kanikiya, e qai donu ke vuwadru meru soliya vuwadru na vikwa vayago. ²⁸ Ni qu vo vaveya devu re na kwa i kwe, qu soliya vuwadru na kwa ni loloma meru qulu, qu na qai kwa vuwako mutou qai la yaji i Sipeini. ²⁹ Ni qu vo kilajiya, niqu vo layaji vuwako mutou, qu na la i na vivakalougatataki taucoko qeiniya o Karisito. ³⁰ Qu na va masujiko, na vi wekani, e vuku ni ledu Turaga o Jisu Karisito, e vuku muni na loloma ni Yalo Tabu, me du gumaikali vata i na masu vuwa na Kalou balejiko au. ³¹ Mequ vacolai mai vuwadru i Jutiya eru jikai ni talai rewarewa; meru okajiya muni o rau eru tolu na lequ cakacaka e na vai mai Jerusalemi. ³² mequ la ke vuwako mutou i na marau na leya lewa na Kalou, mequ vacegu vata qaneko mutou. ³³ Me no vata qaneko mutou taucoko ga na Kalou ni vi vacegu. Emeni.