1
A ru vo yaco i jiliva, i na ledru vanua na kwai Katara.
2
Na gauna e tala mai ke o Jisu i na waqa, qai yato sara i na i bulubulu a ru qai dania e kia na tamata e unuvi nitu.
3
E dau no vakia tu ga i nai bulubulu o keya, e tasi rewa ni kia na tamata me tobokia rewa.
4
E dau vesu va wara i na senicodo, e dau musumusulaki nia, e dau seresere kia na i vesu, e tasi kia e va vayalonia rewa.
5
E dau lai nono tu ga na vi ulu ni yataga qai niya na vi bulubulu, e dau kulakula tu ga qai dau va mavoatakinia tu e lala i na vi mala ni vatu yagata.
6
Ni qai tolavia o Jisu ni si la va yawa mai a vou wavucia yaji, a qai cuva ve mata.
7
E ya qai coco i na domo levu, ''Me kwa ni cava o Jisu na luve ni Kalou levu? A qu vo varojiko i na yaca ni Kalou mo kua ni vararawataki ni ko yau.
8
Ni qu vo kwaya oji vuwa, ''o iko na yalo velavela mo ladai vua na e cola ikwe
9
A qai tarogia muni, ''O cei mu yaca? e saumia tale o kea, "Qu yaca o vavakoso o madou madu lewe levu.''
10
E qai cikevia o kia meru kwa ni lai na vanua igi.
11
Na gauna a ru danidru ke nai lala vore levu a ru kana no vakia na yataga,
12
A ru qai kerevia, a ru kwa ''deniko madou vuadru na vore; me madu unuvidru''
13
A qai va taraia o kea, a ru qai wavucia sara e kia na yataga meru yaco sara i ruwai, e raujia e rua na udolu na vore e ru dromu i ruwai
14
O rau na dau vakana vore a ru qai wavu i na yaloga ni tauni, meru lai kwa na kwa e ru dania a ru qai soro mai na tamata me ru dania na kwa e yaco.
15
Na gauna a ru yaco mai ke vo Jisu a ru dania sara na tamata e dau unuvi nitu, a ru qai tolavia o vavakoso ni vo vai sulu oka tu avo vacolai oti, a ru qai mataku na tamata.
16
A qai kwa vuadru na tamata dau unuvi-nitu na kwa e a yaco vuadru na vore.
17
A ru qai kerevia meru biubiu dei mai vanua igi.
18
Gauna a ru varau vodo ke i na waqa na tamata dau unvi nitu e okajia muni meru lavata.
19
O Jisu e tasi vadonia meru lavata, a qai kwa o kea vua, "La vuadru i lemutu were vuadru o wekamu, kwaya vuadru na kwa levu e vavea vuwako na Kalou, balejia ni lomaniko."
20
A qai lesu me vatekivu wase kia na kwa e vavea vua o Jisu i Tikapoli, a ru kurabui takinia.
21
Ni vo lesu tale o Jisu i na waqa, i na jiliva ni wai e kia, e ru levu e ru soqo vata yaji vua, e yavalu e ru tadra tu ga i matacawa.
22
A qai la mai e kia na qase ni lotu, e yaca o Jaire na gauna e tolavia ke, e cuva vua.
23
A qai kerevia, ''O lequ i luve yalewa lailai e voleka ni mate, mo la mai mo tabakia vuwa mu lima me vacolai ke, nikua ena cola.
24
A ru qai lavata, qainidru na e cola wara.
25
E kia na lewa turuni dra balavu e raujia e jinarua na yabaki.
26
E vo levu na kwa e vo vosotia vuwadru e levu na vuniwai, e va lavele nia ke na la i yau taucoko, ia e tasi cola rewa, e qai levu cake no ga na lea tauvi mate.
27
Ia ni vo varogo na kai tukutuku o Jisu, e lavata qai nidru mai na e cola wara, e lobo o Jisu me dereiya na lai sulu.
28
Ni ya kwaya o kia "Kodaki qu dereiya boto na lai sulu a qu na vacolai."
29
E mudu vasuri nai davedave ni leya dra, a vo va kilajia vua ni vou cola mai na mate bura igi.
30
A vou vakilajia vuwa o Jisu ni vou la dai mai vua na kaikai a qai vuki vuadru na e cola e kwa ocei e dereiya na lequ isulu?
31
A ru kwa sara vua na lea tisaipeli, "Tolavia re na levu ni tamata e ru tu wavoki jiko tu, oji mo qai kwa no ga, 'O cei e dereiko yau?''
32
A si vadania no Jisu na tamata cava re e vavea na kwa igi.
33
A vo mataku na lewa, e saqanini ni vo kilajia na kwa e vai vuwa, e la mai cuva e mata, qai kwa taucoko vuwa na kwa e yaco.
34
A qai kwa vua, "Luvequ yalewa, e vou vacola ni ko na lemu i vabaujia mo la i na vacegu, mo vo cola mai na kemu mate."
35
Na gauna e tata noke, a ru la mai e yavalu mai na leya were na qase ni were ni lotu, e ru kwaya, "E vou mate o luvemu yalewa, na cava o vawale nia ke nai vavuvuli?"
36
Ni vo varogo o Jisu na kwa e ru kwaya qai kwaya o Jisu vuwa na turaga ni were ni lotu "Kua ni yalo lailai. vabaujia ga."
37
A tasi vo vataraia me kiya e tekucia,o rau ga o Pita,o Jemesa, o Joni .
38
A ru vou yaco la were na turaga ni were ni lotu, e daniya na ledru vitagicaki, e ru tagi lagalaga
39
E unu i yaloga ni were qai kwaya vuwadru ''Mutu tagilagalaga? mutu vitagicaki valevu ena vuku ni cava? E tasi mate na luve yalewa e moce ga.
40
A ru mali cakiniya, oji e qai rovidru dai i rara qai medru mai la momo qai niya la nene, qai nidru o rau e ru dau lavata no,i na vanuwa e daro no ke.
41
A qai qulu e lima nai luve yalewa igi qai kwaya vua, ''Talica, kumi!'' kea i balebale,''luve yalewa, Qu kwa vuwako, mo tucake mai.''
42
E vasauri ga na lea tucake qai yato sara (o kia e si qai yabaki jinikarua). E karacidru ni ru dania na kwa e yaco.
43
Vo qai kwaya vuadru o kea me kuwa ni kia e kilajia na kwa ikwe e yaco. Qai kwa vuadru o kia mutu solia vua e kia na kwa me kania.