¹ A covidru na leya jisaiveli e jina ruwa meru soqoni vata, a soliya vuwadru na lewa na kaikai vuwadru na nitu, meru va cola niya muni na mate. ² A vatalajidru o keya meru vunautaki niya na matanitu ni Kalou, meru vacolanidru na tauvimate. ³ A kwa vuwadru o keya, kuwa ni kau e kiya na kwa i calevu, kuwa nai toko, se na taga e tawa ke na cawa, se na madrai, se na i lavo; se ruwa na i curucuru. ⁴ Na were taucoko ga mutu unu ke, mutu nokoto ga ke, a mutu layaji ke. ⁵ O rau yakiya eru tasi vacegu niko mutou, ni mutu vo ladai i na rara igi, kuretaki niya sara na kavu ni qwele mai mutu la, me vatakilakila vuwadru.'' ⁶ Aru vo layaji, aru la ina virara yalai, aru vunautaki niya na i tukutuku oka, a vai na vi vacolai ina vivanuwa taucoko ga. ⁷ Avo varogo o Eroti na turaga na kwa taucoko e vai, e karaciya ke, eru kwa e yavalu, evo tucake tale mai na mate o Joni, ⁸ e yavalu, evo lamai o Ilaijia; e yavalu tale, avo tucake tale e kiya vuwadru na parofita i mata. ⁹ A kwa o Eroti, aqu vo musukiya e ulu o Joni; o cei ikwe, aqu vo varogo ke na kwa ikwe?' avo mata tolaviya. ¹⁰ O rau na i apositolo, niru vo lesu mai, aru vo kwa vuwa na kwa taucoko ga e ru vaveya. A meidru o keya, aru lavatutu i na kiya na vanuwa lala e voleka ina kiya na rara e yaca o Peciseita. ¹¹ O rau na lewe levu, aru vo kilajiya, aru tekuciya. A vacegu nidru o keya, a tata takiniya na matanitu ni Kalou, a va cola nidru na tasi cola oka. ¹² Avo la i kala na siga, aru lamai o rau na lewe jina ruwa, a kwa vuwa, va talajidru dai na lewe levu, meru la i na virara yalai qeiniya na yasa evo leka jidru, meru moce, meru vadaniya na kedru, nidu vo nokoto no ikei na vanuwa lala. ¹³ A kwa vuwadru o keya, "Mutu soliya vuwadru meru kana." Aru kwa, e jikai na kwa vuwako madou, e lima ga na i buli madrai e ruwa ga na ika; kodaki madu tasi la i voli cawa me kedru taucoko ga na lewe levu ikwe. ¹⁴ (E ru lima na udolu na teigwane.) A kwa vuwadru na leya jisaiveli o keya, kwa meru no i ra meru no ya lima saga vulu meru no vata. ¹⁵ Aru vaveya kodaki ke, aru va no nidru taucoko ga i ra. ¹⁶ A qai qulu o keya na i buli madrai e lima qeiniya na ika e ruwa, a vacaboniya i lomalagi, a lotu takiniya, a doviya, a soliya vuwadru na tisaiveli meru soliya vuwadru na lewe levu. ¹⁷ Aru kana, aru bori taucoko ga, aru lugiya vata na vovo ni kedru, e jina karuwa tale na sova. ¹⁸ A no takiya ga a masu, aru no tale ga na tisaiveli. A tarogidru o keya, a kwa, "Eru kwa na tamata o cei o au?" ¹⁹ Aru tata, a kwa, "O Joni na daunivavitaiso. e yavalu, eru kwa, ko Ilaijia, e yavalu tale eru kwa, avo tu cake tale e kiya na parofita i mata." ²⁰ A qai kwa vuwadru o keya, a mutu kwa o mutou se o cei o au? a tata o Pita, a kwa, Na Karisito ni Kalou. ²¹ A vadrejidru o keya, a varojiya meru kuwa ni kwa na kwa ikwe ve kiya, ²² a kwa, "E kilikili qeiniya na luve ni tamata me vosojiya na kwa e wara meru deiniya muni o rau na qase qeinidru na bete levu, qeinidru na vunivola me vamate o keya, me va tucake tale mai na mate ina i ka tolu ni siga." ²³ A kwa vuwadru taucoko ga, "Kodaki e kiya e mata tekuciko au, me kuwa ni tekuciya mu yaloga, mo dagiya ga na lemu kauvelatai ina visiga tekuciko au. ²⁴ O keya yakiya e mata maroroijiya la cola, ena va lavele niya la cola balejiko au, ena maroroijiya. ²⁵ Na cava na keya yaga vuwa na tamata, kodaki e rewajiya o vuravura taucoko, ava laveleniya va i niya ga se vo biu dai? ²⁶ O keya yakiya e maduwataki niko au qeiniya na lequ tata, e maduwataki niya na luve ni tamata, ena lamai i na leya i ukuuku, qeiniya la i ukuuku o tamaya, qeiniya na ledru i ukuuku na agilosi yalo savasava. ²⁷ Aqu vo kwa vaidjina vuwako mutou, e notu ga ikei e yavalu, eru na tasi mate, eru na tolaviya re i mata na matanitu ni Kalou. ²⁸ Avo devu na tata ikwe me bogi walu, a qai meidru o Pita, o Joni qeiniya o Jemesa o keya a lacake i na yataga me masu. ²⁹ Nivo masu no o keya, avo kanikiya mai e mata, avo bucobuco qai reirei oka na leya i sulu. ³⁰ Daniya, eru ruwa na tamata eru vitataki qaneya, O Mosese qeiniya o Ilaijia, ³¹ eru lamai ina ukuuku, aru tata takiniya na leya ciba a vaveya mai Jerusalemi. ³² A qai bijidru o Pita qei idru na no vata no na mata moce, niru vo yadra, aru vo daniya na leya i ukuuku, qeinidru na tamata eru no vata. ³³ Niru vo ladai no vuwa, a kwa vo Jisu o Pita, "Kemuni na Turaga, e vo oka na ledu nokoto ikei; me madu vaveya e tolu na were vacevaceva; me kiya me lemu, e kiya me leya o Mosese, me kiya me leya o Ilaijia." (a vo tasi kila jiya na kwa e kwa.) ³⁴ Avo tata no kodaki igi, a kwa na o avo lamai, a varurujidru; aru vo mataku niru vo unuviya na o. ³⁵ Avo rogo mai e kiya na tata i na o a kwa, "Ikwe na lequ i luve ni toko, mutu varorogojiya. ³⁶ Avo devu na tata, avo laidani takiya ga o Jisu. Aru vo ciloniya ga, aru tasi kwa ve kiya na gauna igi na kwa eru daniya. ³⁷ Nivo qwata, aru vo labale mai ina yataga, aru vo levu sara aru vo sota qaneya. ³⁸ Daniya, e kiya vuwadru na oso tu avo coco i yata, a kwa, "Vavuvuli, qu masu jiko, mo mai daniya o luvequ na teigwane o luvequ e kiya ga. ³⁹ Daniya, e kiya na yalo e qulumiya e kulakula vasauri ke; a tuvutuvu lakiniya, avo qai kaburaki vuso, ava mavowa takiniya e dredrei sara me ladai vuwa. ⁴⁰ Aqu va masujidru na lemu tisaiveli meru roviya dai; aru tasi rewajiya. ⁴¹ A tata o Jisu, a kwa, "Na i taba tamata jikai na vabaujiya mutu yalo kanikiya na cava na keya balavu mequ no qeiniko mutou, mequ vosojiko mutou? Meiya mai o luvemu ikei." ⁴² Avo la no mai o keya, avo vadaniya na nitu, a tuvutuvu lakiniya. A vunaucijiya na yalo bura o Jisu, a vacola niya na i luve, avo soliya tale vuwa la momo. ⁴³ A karacidru taucoko ga na kaikai levu ni Kalou. A karacidru taucoko ga na kwa e vaveya o Jisu, a kwa vuwadru na leya jisaiveli o keya, ⁴⁴ "Me lutu bale ve mutu bebe na tata ikwe: A soli yaji na luve ni tamata ve ru lima na tamata. ⁴⁵ Aru tasi kilajiya na tata igi. A cilo vuwadru, aru numidai niya; aru vo mataku ni tarogiya na tata igi. ⁴⁶ E qai tubu e kiya na viba eru maliwa, se o cei e uwasivi cake. ⁴⁷ Ia nivo daniya o Jisu na numiya eru yaloga, e meiya e kiya nai luve lailai, ava tucake niya e yasa, ⁴⁸ a kwa vuwadru, O kiya e okajiya na i luve lailai ikwe e vuku e yaca, evo okajiya muni, ia o kiya yakiya e okajiko au, evo okajiya muni o keya e vatalajiko au mai. Nivo uwasivi cake o keya e valailai ga i vuwako taucoko. ⁴⁹ A qai tata o Joni, a kwa, "Na Turaga madu tolaviya e kiya e qaqiya na nitu mu yaca, a madu taroviya e tasi tekuciko datou." ⁵⁰ A kwa vuwa o Jisu, kuwa ni taroviya, ni niya na ledu i to o keya e tasi niya na ledu meca. ⁵¹ Nivo yaco djina na gauna me lacake ke o keya, e vadaniya sara e mata me la kodaki i Jerusalemi. ⁵² A vatalajiya e yavalu meru simata ve mata, aru la aru unu ina kiya ledru rara lailai na kwai Samaria, meru varautakiniya na keya. ⁵³ Aru tasi vaceguniya, balejiya nivo va daniya e mata i Jerusalemi. ⁵⁴ Nivo daniya o rau na leya tisaiveli o Jemesa qeiniya o Joni, aru kwa, Na Turaga, o okajiya me maru kwa me lutu mai lomalagi na quto mudre, me tavu nidru? ⁵⁵ A vuki o keya, a vunauci jidru, a kwa, muru tasi kila jiya na i varau ni muru yalo, e tasi lamai na luve ni tamata me vamate nidru na tamata, me vacolanidru ga. ⁵⁶ Aru vo la i na kiya na rara lailai. ⁵⁷ Aru vo la tu i calevu, e kiya e kwa vuwa, O mutou na Turaga aqu na tekuciko na vivanuwa taucoko o lake. ⁵⁸ A qai kwa vuwa o Jisu, e vadaniya na fokise, ava i roro na manumanu vuka; io na luve ni tamata e jikai vuwa na vanuwa meva dara niya ke e ulu. ⁵⁹ A kwa vuwa o keya ve kiya tale, tekuciko au. A kwa o keya, O mutou na Turaga, deiniko au mequ lare i bulujiya re o tamaqu. ⁶⁰ A kwa vuwa o Jisu, "deiniya na mate meru bulujiya na ledru mate; o iko mo la i vunautaki niya na matanitu ni Kalou." ⁶² A kwa vuwa o Jisu, "E jikai e kiya na tamata e qulu na i siviyara a qai tola i taku, me yaga i na matanitu ni Kalou."