¹ Avo devu, a qai la wavoki o keya i bere ina virara taucoko ga ina virara yalai taucoko, a vunau, a kwa na i tukutuku oka ni matanitu ni Kalou. Qeinidru vata na lewe jina ruwa, ² qeinidru e yavalu na lewa, aru vo vacolai devu mai na yalo bura e unuvidru tu qeiniya na malumalumu, o Meri a lai kwai na lewa ni Makitala, avo ladai vuwa e vitu na nitu, ³ qeiniya o Joana na leya yalewa o Kusa na leya mata ni vanuwa o Eroti, qeiniya o Susana, eru levu tale, aru qwaraviya ina ledru i yau. ⁴ Aru vo levu aru vo soqoni vata, avo lamai ina virara, avo kwa na tata vatautauvata o keya: ⁵ E kiya na dau kabukabu raki a la i kaburaki niya na leya wiri ni sila; a kaburaki niya vali; avo lutu e yavalu i na tutu ni calevu; avo lai butu bale, aru vo mai kaniya na manumanu vuka. ⁶ A lutu e yavalu i na vatu, a tubu mai, a qai wave sara, ni tasi lulu. ⁷ A lutu e yavalu ve na viwasori; aru cola vata na viwasori, a turuku jiya. ⁸ Aru lutu e yavalu i na vanuwa e oka, avo cola a cola takiniya e drau e vuwa. Avo kwa devu o Jisu na kwa ikwe, a cocotaki niya, "O keya e no e bebe me varogo, me varogo sara." ⁹ Aru vo tarogiya o rau na leya jisaiveli, a kwa, na cava na keya i balebale na tata va tautauvata iqoi. ¹⁰ A kwa o keya, avo soli vuwako mutou me mutu kilajiya na vi kwa e cilo balejiya na matanitu ni Kalou, io avo ledru na kanikiya na tata vatautauvata ga; meru daniya aru tasi daniya, aru varogo aru tasi kilajiya. ¹¹ Na tata vatautauvata e kodaki ikwe; na sila, na tata ni Kalou. ¹² O rau eru kodaki na tutu ni calevu, o rau eru varogo, a qai lamai na nitu, a qai kau dai na tata evo notu mu yaloga keru vadjinajiya aru cola ke. ¹³ O rau eru kodaki na vatu, eru varogo, eru vabaujiya na tata ina marau. E jikai eru waka, aru va djinajiya valailai ga, vo lamai na gauna ni bura aru vo reba ga. ¹⁵ O keya ina vanuwa oka, aru varogo na tata, aru qulumiya, a vuwavuwa oka. ¹⁶ E jikai na tamata me tavuniya na sina, a qai lai taboi niya ina rubu, se me lai tokoniya ina ruku ni mocemoce. e tokoniya ga i na keya i tokotoko, meru daniya na keya kakarama o rau na unu mai. ¹⁷ E jikai na kwa e cilo, e tasi vatakei, se me vatukolo, me tasi kilai se vatakei mai. ¹⁸ O keya me mutu qai qarauniko mutou, ina lemutu varogo, e kiya na kwa evo notu vuwa na tamata, e qai soli vuwa, na tamata e jikai vuwa e kiya na kwa, e qai ladai mai vuwa na kwa e numiya me notu vuwa. ¹⁹ Aru qai lamai vuwa o rau la nene qeinidru la tacini, aru tasi toro rewa vuwa balejidru navo vuqa tu. ²⁰ Aru kwa vuwa e ru yavalu, a kwa, eru vo no i rara lemu nene vata o rau na lemu tacini, eru mata tolaviko. ²¹ A tata o keya, a kwa vuwadru, "Lequ nene lequ tacini o rau eru varogo na tata ni Kalou aru vaveya." ²³ Aru vo soko, avo moce o keya, a lamai na cagi ina uciwai, aru vo dromu ru voleka ni mate. ²⁴ Aru lamai aru vayadra jiya, aru kwa, "O mutou na Turaga! O mutou na Turaga! e du vo mate!" A qai tucake o keya, a vunaucijiya na cagi qeiniya na wai ocaoca, aru vacegu sara a qai maravu mai. ²⁵ A kwa vuwadru o keya, "I vei na lemutu vabaujiya? " Aru mataku a karacidru, aru vi kwa yakiniya vainidru, "O cei ikwe; a varo jiya na cagi qeiniya na wai, aru varorogo vuwa?" ²⁶ Aru vo unu i na ledru vanuwa na kwai Katara, avo doniya o Kalili. ²⁷ Avo vila i vanuwa o keya, aru sota e kiya na tamata i na rara, avo no vabalavu vuwa na nitu, e tasi dau vaisulu, se no i were, ina i bulubulu ga. ²⁸ Nivo daniya o Jisu, avo kulakula i yata, a cuva vuwa, a kwa e domo levu, "Na cava vuwako daru, i Jisu na luve ni Kalou yawa i yata? Qu vamamasu jiko, mo kuwa ni vararawataki niko au." ²⁹ Avo kwa devu vuwa na nitu me ladai vuwa na tamata. Evo tauviya valevu, a vesu no o keya ina jeini qeiniya na i vesu me qulumiya no, a musulaki niya na i vesu, a roviya na nitu i vikaikai. ³⁰ A tarogiya o Jisu, a kwa, ''O cei mu yaca?'' A kwa o keya, "o vavakoso", aru vo levu na nitu a unuviya no. ³¹ Aru masujiya me lai i bulu. ³² A kiya na yavuni na vore levu aru kana no i na ulu-ni-yataga. Aru masujiya me unuvidru, ava dainidru o keya. ³³ Aru qai ladai vuwa na tamata na nitu, a unuvidru na vore aru wavu i na babaravi i ruwai, eru ora. ³⁴ O rau na vakanidru, aru vo daniya na kwa evo yaco, aru vo tuba, aru lai kwa i rara i na vivanuwa tale. ³⁵ Aru vo qai layaji meru daniya na kwa e vai, aru cava vo Jisu, aru daniya na tamata, avo ladai vuwa na nitu, avo nokoto no ve la o Jisu, avo vai sulu avo yalo makuga, aru vo mataku. ³⁶ O rau muni eru daniya, aru kwa, na kwa e cola ke o keya a unuviya i mata na nitu. ³⁷ Aru qai masujiya o rau taucoko ga na lewe o Katara me ladai vuwadru nivo kanidru na mataku levu. A vodo na waqa o keya a lesu tale. ³⁸ Na tamata ladai vuwa na nitu a masujiya meru no vata, avo vatalajiya dai o Jisu, a kwa, ³⁹ "Mo la i lemu were, mo kwa na keya levu na kwa e vaveya vuwako na Kalou." Avo la o keya a lai kwa i rara taucoko na keya levu na kwa e vaveya vuwa o Jisu. ⁴⁰ Avo lesu tale o Jisu, aru vo vacegu niya o rau na tamata, niru vo waciya o rau taucoko ga. ⁴¹ Daniya, e kiya na tamata o Jairo e yaca e kiya na turaga ni were ni lotu, a lamai a cuva ve la o Jisu, a vamamasu jiya me la i la were, ⁴² e kiya ga o luveya na lewa, e jina ruwa la yabaki, avo voleka ni mate, avo la o keya, aru vo drigi jiya na lewe levu. ⁴³ E kiya na lewa, e turi ni drabalavu e yabaki jina ruwa, ava devuciya vuwadru na vuniwai na kwa taucoko me cola ke, a tasi cola va kiya. ⁴⁴ A lamai ve lobo, a dereiya na leya i tutu ni sulu, a mudu vasauri ke na leya calevu ni dra. ⁴⁵ A kwa o Jisu, o cei e dereiko au? Aru vo va jikajikai taucoko ga, a kwa o Pita qeinidru na no vata no, "O mutou na Turaga, eru vo vaosooso jiko mutou o rau na lewe levu eru vi drigidrigiji, o qai taro giya, o cei e dere iko au?" ⁴⁶ A kwa o Jisu, "E kiya e dere iko au, niqu kilajiya ni vo ladai vuwako au na kaikai." ⁴⁷ Nivo kilajiya na lewa evo tasi cilo, a lamai a saqanini, a cuva vuwa, a kwa ve ru mata na kwa taucoko ga vuwadru na lewe levu na kwa a dereiya ke, qeiniya na kwa e cola vasauri ke. ⁴⁸ A kwa vuwa o keya, "Luvequ lewa, mo vacegu. Evo vacola niko na lemu vabaujiya. Mo la ina vacegu. ⁵⁰ Nivo varogo o Jisu, a tata vuwa, a kwa, kuwa ni yalo lailai; vadjinajiya ga, e qai vacolai ga. ⁵¹ Nivo unu i were o keya, e tasi deiniya e kiya me unu ke, o rau ga o Pita, o Jemesama qeiniya o Joni, qeiniya la momo na lewa qeiniya la nene. ⁵² Aru tagi taucoko ga, aru vitagicaki a kwa o keya, "Kuwa ni tagi, e tasi ciba o keya, e moce ga." ⁵³ Aru mali cakiniya, niru kilajiya e ciba o keya. ⁵⁴ A kwa meru la taucoko i rara, a qulu e lima, a coco, a kwa, "O iko nai luve tucake!" ⁵⁵ A lesu viya tale mai e yalo, a tucake sara. A kwa sara o keya me soli vuwa na keya. ⁵⁶ A karacidru sara na leya qase; a varojidru o keya meru kuwa sara ni kwa vuwa e kiya na kwa e vai.