¹ Io ni vo vadevuniya na leya tata taucoko ga aru vo varogo no na lewe levu, avo qai unu i Kepanaumu. ² E kiya na turaga ni valu, avo tauvimate mate e kiya la tamata, e dau lomaniya o keya, avo valeke ni ciba. ³ Nivo varogo nakeya i tukutuku o Jisu, a vatala jidru e yavalu na qase ni Jiutia, meru va masujiya me lamai me vacolaniya la tamata. ⁴ Niru vo cava vo Jisu, aru vamasu jiya valevu, aru kwa, e yaga o keya me vai vuwa na kwa ikwe, ⁵ nivo lomaniya na ledu matanitu, a vaveya o keya na lemadu were ni lotu. ⁶ A qai la vata qeinidru o Jisu. Nivo voleka i were o keya, a vatalajiya e yavalu o wekaya na turaga ni valu, meru kwa vuwa, o mutou na Turaga, mutu kuwa ni vawale niko mutou, e vo tasi yaga me mutu unu i na lequ were. ⁷ Aqu vo tasi numiko au mequ yaga mequ layaji vuwako mo cavujiya na tata, me cola ke na lequ tamata. ⁸ Aqu jiya turaga lailai o au, qu lewaiya e yavalu na sojiya. aqu kwa vuwa ikwe, o la yaji, avo la; vuwa e kanikiya, lamai, avo lamai, kwa vuwa na lequ tamata, Mo vaveya ikwe, avo vaveya. ⁹ Avo varogo na kwa ikwe o Jisu, e karaciya o keya, a vuki vuwadru na lewe levu aru tekuciya, a kwa, qu vo kwa vuwako mutou, qu tasi daniya vuwadru na Isireli e kiya na vabaujia levu me kodaki ikwe. ¹⁰ Nivo lesu tale i were o rau na lai vatala, aru vo daniya na tamata e tauvimate nivo cola oka. ¹¹ Ni si qwata lailai, avo la o keya ina kiya na rara e yaca o Neini; aru vo levu na leya jisaiveli eru la vata, o rau tale ga na lewe levu. ¹² Avo toro voleka i na matamata - ni -rara, daniya, e kiya na mate e lai dagiji i nai bili, o luveya la nene e kiya ga, e yada o keya; aru levu sara na lewe ni rara aru la vata qeiniya. ¹³ Nivo daniya na Turaga, a lomaniya, a kwa vuwa, kuwa ni tagi. ¹⁴ Avo la o keya, avo vaveya na vatavata; aru vo tuvakiya o rau na dagiya. A kwa o keya, o iko na saravou, aqu kwa vuwako, Tu cake. ¹⁵ Avo tucake na mate, vo tekivu me tata. A vo soliya sara vuwa la nene. ¹⁷ Na keya i rogorogo ikwe o Jisu e robojiya o Jiutia taucoko qeiniya na yasayasa taucoko ga. ¹⁸ A vatakeya vuwa o Joni na kwa taucoko ikwe vuwadru na leya tisaiveli. ¹⁹ A covidru e ruwa na leya tisaiveli o Joni, a vatalajidru vo Jisu, me kwa, O mutou o keya a la mai, se du waciya e kani kiya? ²⁰ Niru vo cava vuwa, aru kwa, a vatala jiko maru mai vuwako o Joni na dauvivavitaiso, me kwa, O mutou a mutu lamai se madu waciya tale e kiya? ²¹ Na jiki ni siga igi eru levu vo vacola niya o keya i na mate qeiniya na rarawa, mai vuwadru na yalo bura; eru levu eru mata boko evo lewaiya o keya meru tola rewa. ²² A qai tata o Jisu, a kwa vuwadru, muru la, muru kwa vuwa o Joni na kwa muru vo daniya vata na kwa muru vo varogo. niru vo tola na mataboko, aru vo yato na lokiloki, a vasavasava na vukavuka, avo rogo na duduvara, aru va tucake taki na mate, avo vunautaki na i tukutuku oka vuwadru na dravudravuwa. ²³ E kalougata o keya e tasi vatau caqe bale jiko au. ²⁴ Nivo la tale o rau a vatalajidru o Joni, a kwa o keya vuwadru na lewe levu e vuku o Joni, na cava mutu lai vaveya i vikaikai me mutu tolaviya? Na sina evo vasavuli jiya na cagi? ²⁵ Na cava mutu lake me mutu lai daniya? Na tamata e vai sulu ina i sulu e malumalumu? Daniya, o rau eru vai sulu i na i sulu vai ukuuku, eru kana oka, eru no i na were vaturaga. ²⁶ Na cava a mutu lai kau me mutu daniya? A parovita? Io, qu vo kwa vuwako mutou, e kiya e toro cake cake sara vuwa na parofita. ²⁷ O keya e volai ikwe, daniya, qu vo vatalajiya yaji na lequ i talatala me simatataki niko, E na samakiniya na lemu calevu o keya vo mu mata. ²⁸ Aqu vo kwa vuwako mutou, vuwadru eru vo sucu mai vuwadru na lewa e jikai na parofita. E oka cake vuwa Joni na dau vivavitaiso; o keya e lailai sara i na matanitu ni Kalou e toro cake sara vuwa. ²⁹ (O rau taucoko ga na tamata eru varogo, qeinidru na dau soqonijiya nai va cavacava, eru va djinadjina vuwa na Kalou, niru vo vavitaisotaki ina leya vivavitaiso o Joni. ³⁰ O rau na Farisi qeinidru na vuni vunau, eru burajiya na kwa e vaveya na Kalou balejidru, aru tasi vavitaisotaki vuwa.) ³¹ A kwa na Turaga, na cava mequ vatautavata takinidru ke na tamata ina i taba tamata ikwe? se ru tautauvata qeiniya na cava? ³² E ru tautauvata qeinidru nai luve eru no na vanuwa ni vivoli, aru coco wavoki, aru kwa, o madou madu uvi bitu vuwako mutou, a mutu tasi wesi. madu tagi vuwako mutou, mutu tasi tagi mai. ³³ Avo lamai o Joni na dauvavitaiso e tasi dau kana madrai se dau somu waini; a mutu vo kwa, evo nokoto vuwa e kiya na nitu. ³⁴ Avo lamai na luve ni tamata, avo kana a somu, a mutu kwa, Daniya, na tamata e dau kana se somu waini, ledru i tau na dau soqoniya na i vacavacava qeinidru na tamata i valavala ca!' ³⁵ Avo vadoniya na vuku o rau taucoko ga o luveya. ³⁶ A kereviya e kiya na Farisi meru kana vata. Aru vo unu i na were ni Farisi igi a no me kana. ³⁷ A daniya, e kiya na lewa ina rara igi, o keya na lewa i valavala ca, avo kilajiya nivo no ina leya were na Farisi igi me kana, a kau mai e kiya na tavaya alapasita e tawa na waiwai. ³⁸ Avo tu mai ve lobo i ve la, a tagi, avo savajiya e la ve wai ni mata, avo quwa jiya ve rau ni ulu, a kisiviya e la, a waliciya vuwa na waiwai. ³⁹ Nivo daniya na Farisi a surejiya, e numiya ga ve yaloga, a kodaki, e parofita o keya ikwe, e kilajiya na lewa ikwe e dereiya, qeiniya na leya i varau muni, nivo lewa i valavala ca. ⁴⁰ A tata o Jisu, a kwa vuwa, "I Saimoni, e kiya na kwa qu mata tarogiya vuwako." A kwa vuwa o keya, vavuvuli, ''Mo kwa ga mai'' ⁴¹ E kiya na turaga, E ruwa na tamata eru djinau vuwa. E kiya e lima na drau na pene na leya i djinau, e kiya tale, e lima sagavulu. ⁴² Evo jikai na ledru kwa meru saumiya ke, evo serekiya ga vuwadru ruwaruwa. Mo kwa mai re se o cei vuwadru e lomaniya valevu?'' ⁴³ Avo tata o Saimoni, a kwa, ''qu vo vakasamataki niya, o keya e levu na kwa e sereki vuwa.'' ⁴⁴ Unu ina lemu were, e jikai na wai o soliya me sava ke qu la, a vo savajiya vo qu la ve wainimata, a quwajiya ve rau ni ulu. ⁴⁵ O tasi kisi viko au, ia o keya ikwe e tasi cegu na kisiviya qu la niqu nokoto no i kei. ⁴⁶ O tasi waliciya qu ulu i na waiwai; o keya ikwe e waliciya vo qu la i na waiwai. ⁴⁷ O keya ikwe qu kwa ke vuwako, na leya i valavala ca e vuqa, evo boko, avo loloma valevu ke o keya. O keya e lailai ga evo boko, evo loloma valailai. ⁴⁹ O rau muni aru no vata no meru kana, aru kwa vainidru, O cei ikwe e bokociya muni na i valavala ca? ⁵⁰ A kwa vuwa na lewa, "avo vacola niko na lemu vabaujiya; mo la ina vacegu."