¹ E kiya na siga ni vavacegu, a vola o keya i na naga ni sila, aru vo seviya na sila o rau na leya tisaiveli, aru qiliya veru lima aru kaniya. ² Aru yavalu na Farisi aru kwa vuwadru, na cava mutu vaveya ke na kwa e tasi dodonu me mutu vaveya i na siga ni va vacegu? ³ A tata o Jisu, a kwa vuwadru, mutu tasi wilikiya na kwa ikwe, na kwa a vaveya o Tevita, nivo mata kana, o keya qainidru na no qaneya; ⁴ Avo unu o keya i na were ni Kalou, a qulumiya a kaniya na madrai e dau laidani, a soliya muni vuwadru na no vata no, igi e tasi vadonui meru kaniya na kanikiya eva donui ga vuwadru na bete? ⁵ A kwa vuwadru o keya, E Turaga muni na siga tabu na luve ni tamata. ⁶ Ia e na kanikiya tale na siga Tabu, a unu o keya i na were ni lotu, a vivavulici; a nokoto ke e kiya na tamata avo malumu e lima i matau. ⁷ Aru vo vadaniya o rau na vu- ni- vola qei nidru na Farisi, ena vai na vi vacolai i na siga tabu, se jikai, meru daniya na kwa me bilitaki ke. ⁸ Aru vo kilajiya na ledru numiya o keya, a kwa vuwa na tamata e malumu e lima, Tu cake mo no tu i na kedru vi mama. Avo tucake a notu i na kedru vimama. ⁹ A qai kwa vuwadru o Jisu, qu na tarogiko mutou i na kiya na kwa; evo vadoniya me vai na kwa oka ina siga tabu, se na kwa bura? me vai na vivacolai, se me vai na vivamatei? ¹⁰ Avo tola wavoki jidru taucoko ga o keya, a kwa vuwa na tamata, dodokiya mai mu lima. ¹¹ A vaveya kodaki ke; a va colaniya e lima, e kodaki ke e lima e tara viya. Avo oca va levu sara; aru vo vitataki vainidru, na cava meru vaveya vo Jisu. ¹² Na gauna igi, avo la o keya i na yataga me masu, a masu no vuwa na Kalou i na bogi me qwata. ¹³ Ni vo qwata mai, avo covidru na leya tisaiveli; avo djigitaki nidru me jina ruwa mai vuwadru, avo va tokoniya me nidru nai apositolo. ¹⁴ O Saimoni, o keya ava yacaniya muni me niya o Pita, o Adriu la tacini, o Jemesa qei niya o Joni, o Filipi qeiniya o Pacolomiu, ¹⁵ o Maciu qeiniya o Tomasi, o Jemesa lai luve o Alifio, qeiniya Saimoni e vatokai na gumatuwa, ¹⁶ o Jutasa Isikarioti, o keya a soliya yaji. ¹⁷ Aru labale vata qeiniya o keya, a tu i na buca, aru vo levu sara na leya tisaiveli, qeinidru na tamata eru levu sara i Jiutia taucoko qeiniya i Jerusalemi, na baravi i taia qeiniya i Saitoni. ¹⁸ Aru lamai meru va rogojiya, meru vacolai muni na kedru mate. O rau muni a va bura nidru na nitu, a ru va colai. ¹⁹ Aru va tovoliya taucoko ga na lewe levu meru dereiya; ni vo lamai vuwa na kaikai mana, a vacola nidru taucoko ga. ²⁰ A tolavidru na leya tisaiveli, a kwa, Mutu vo kalougata na dravudravuwa, ni vo lemutou na matanitu ni Kalou. ²¹ Mutu vo kalougata, o mutou na mata kana tu ni kuwa; ni mutu na lai va kana. Mutu kalougata, o mutou mutu tagi ni kuwa; ni mutu na marau. ²² Mutu vo kalougata, niru burajiko mutou na tamata, niru vo vatabu niko mutou, aru va buraburataki niko mutou, se ru varogorogo burataki niya mutu yaca, me balejiya na luve ni tamata. ²³ Mutu marau na siga igi, rido mo marau; daniya, e levu na keya i sau vuwako mutou mai lomalagi, eru vaveya kodaki ke o rau na ledru qase vuwadru na parofita. ²⁴ Mutu na bura, o muto mutu vutuniyau ni mutu vo rewajiya na lemutu vacegu. ²⁵ Mutu na bura, o mutou mutu bori ni mutu na mata kana. Mutu na bura, o mutou mutu mali ni kuwa mutu na rarawa mutu na tagi. ²⁶ Mutu na bura, ni tata ni vaokaoka taki niko mutou na tamata taucoko ga ni vo vaveya ke na ledru qase vuwadru na parofita girigiri. ²⁷ Aqu vo kwa vuwako mutou avo varogo, lomanidru na kemutu meca, vai oka vuwadru na burajiko mutou. ²⁸ Tata oka jidru na dau kase jiko mutou, masulaki nidru na dau varivariva ciko mutou. ²⁹ Kodaki e kiya e sabiciya mu kaliga e kiya, soliya tale vuwa na keya i karuwa. Mo kuwa ni sarataki niya na lemu i unu unu vuwa o keya e kau dai na lemu kote. ³⁰ Mo soliya vuwadru taucoko ga na lamai kerekere vuwako; mo kuwa ni tarogiya tale na lemu i yau vuwa o keya e kau dai. ³¹ Kodaki mutu okajiya meru vaveya vuwa ko mutou na tamata, mutu vaveya muni vuwadru. ³² Kodaki mutu lomanidru na lomaniko mutou, o cei e vaokaoka vuwako mutou? O rau na tamata i valavala ca e ru lomanidru o rau na la mai loloma vuwadru. ³³ Kodaki mutu vaveya oka vuwadru ga eru na vaveya oka vuwako mutou, o cei me vaokaoka vuwako mutou? Niru vo cakacaka ke o rau na tamata i valavala ca. ³⁴ Kodaki mutu vo soliya me qulumiya re vuwadru ga medu va nuinui ke me rewajiya tale mai ke, o cei me qai va okaoka vuwako datou? Nivo soliya o rau na tamata bura vuwadru, na tamata bura, meru rewajiya na kwa e tautau vata. ³⁵ Mutu lomani nidru na lemutu meca, vaveya na kwa oka, soliya me qulu re, mutu vo tasi nuitaki me mutu rewajiya tale e kiya na kwa, e levu ke na keya i sau vuwako mutou, mutu na qainiya o luveya o keya e yawa i yata sara, nivo loma soli ke o keya vuwadru o rau eru tasi vaokaoka ke e tamata bura. ³⁶ O keya me mutu qai yalo loloma, me kodaki ni dau yalo loloma na ledu Turaga. ³⁷ Mutu kuwa ni mutu dau lelewa, mutu na tasi lewai; mutu kuwa ni vibeitaki, mutu na qai jikai ni beitaki. mutu kuwa ni dau ocajiya na tamata, mutu na tasi lai ocaji. ³⁸ Mutu dau soli, e qai soli vuwako mutou; nai varau oka, lai taba bale kuretaki vata, e vuwabale, e soli na tamata i ru yaloga ni saro nai varau mutu varau takiniya, e na varautaki tale vuwako mutou. ³⁹ Avo tarogidru o keya e kiya na tata va tautauvata. E rewajiya na mata boko me tuberiya na mata boko? Eru tasi lutu ruwaruwa i nai keli? ⁴⁰ Evo jikai na jisaiveli me oka cake sara mai ina leya i vavuvuli. ⁴¹ I vei e kodaki lemu tolaviya na malamala e mata o wekamu, o vo tasi numiya na kai e no vo mu mata? ⁴² O na kwa vacava vuwa o wekamu, wekaqu, deiniya mequ liujiya dai na malamala mai mu mata, ovo tasi daniya na kai eno vuwa mu mata? Evi vakwai sini, mo cavujiya simata re na kai mai mu mata, o qai daniya oka mo liujiya na malamala eno ve mata o wekamu. ⁴³ E jikai na kai oka me vuwa takiniya na kai bura; se na kai bura me vuwa takiniya na vuwa e oka. ⁴⁴ Evo lai kilai na kai taucoko ga ve vuwa e tasi vuru na lolo mai na wa sorisori, se vuru na vaini mai na kai sorisori. ⁴⁵ Na tamata e oka e kau mai na kwa e oka i na lololo oka e yaloga; qeiniya na tamata bura e kau mai na kwa e bura i na lololo bura e yaloga. Evo kwa du gusu na kwa e oso valevu ke du yaloga. ⁴⁷ O keya yakiya e lamai vuwako au, e varogo na lequ tata, e vaveya, qu na vadeitakiniya vuwako mutou na tamata. ⁴⁸ Eru tautauvata qeiniya na tamata e vaveya leya were, e keliya bale ina qwele qai vaveya leya were me yavutaki ina vatu. Ena yaco mai na waluvu, se liwa mai na cava ena tasi yavalaji rewa na were igi, balejiya ni yavutaki vaoka. ⁴⁹ O keya e varogo e tasi vaveya, eru tautauvata na tamata e vaveya la were i na yataga ni dada, e jikai na keya yavu. Avo coka vakaikai mai na wai, avo reba sara ke, e kwa levu la rusa na were igi.