¹ Ia niru vo drigijiya o rau na tamata meru rogo na tata ni Kalou, avo tu o eya mai na baji ni drano mai Kenisareti. ² Avo tolaviya e ruwa na waqa e noka tu ina drano. O rau na gonedau eru vo ladai mai keigi, aru savajiya na ledru lawa. ³ Avo vodokiya na waqa, na leya o Saimoni a kereviya me toro valailai yaji i ruwai. A nokoto no i na waqa o keya, a vavulicidru no na lewe vuqa. ⁴ Ia nivo jiniya na leya tata o keya, a kwa vo Saimoni, toso yaji ina vanuwa e nubu. mutu viritakiniya bale na lemutu lawa me rewa mai e yavalu. ⁵ A saumiya o Saimoni a kwa ''Turaga, madu vaveya no vaibogi me siga takiniya, madu tasi rewajiya e kiya na kwa, ia ina vuku ga ni lemu tata, aqu na viritakiniya bale na lawa.'' ⁶ Ia niru vo vaveya kodaki igi, e levu sara na ika eru kovujiya, e kwabasu vakiya na ledru lawa. ⁷ Aru yalovidru na ledru i tokani eru nokotoena kiya tale na waqa, meru mai vukeidru. Aru lamai ru vavuqa niya ruwaruwa na waqa, ru voleka tale ni luvu. ⁸ Ia nivo tolaviya o Saimoni Pita, a cuva bale ve turu o Jisu, a kwa, ''Mo ladai voko au na Turaga, niqu vo tamata bura.'' ⁹ E kurabui o keya, qanedru taucoko ga eru no vata no i keigi, ena vuku ni levu ni ika eru rewajiya. ¹⁰ E kodaki talega ke o Jemesa qeiniya o Joni, o rau na leya i luve o Sepete, eru vitakoni qaneya o Saimoni. Avo kwa vuwa o Saimoni o Jisu, kuwa ni mataku, ina visiga mai bere o na dau rewajidru na tamata. ¹¹ Ia niru vo meia ruwaruwa na waqa i vanuwa, eru biujiya na kwa taucoko ga ru vo tekuciya o Jisu. ¹² Ia niru nokoto no ina kiya na rara,e kiya na tamata vukavuka e nikoto no i keigi. Nivo daniya o Jisu e cuva bale ve la o Jisu, qai masujiya, e kwa ''Na Turaga, kodaki o okajiya mo savasavatakiniko au rewa.'' ¹³ A dodokiya e lima o keya, a dereiya, a kwa, Aqu okajiya, mo savasava mai. Evo lavele sara vuwa na vukavuka. ¹⁴ A varojiya o keya me kuwa ni kwa vuwa e kiya, ia mo lai varaitakiniko ga vuwa na bete, mo vacaboniya na lemu soro ni vivasavasavataki, me kodaki n aleya tata o Mosese, mei vajinajina vuwadru. ¹⁵ Ia na keya i rogorogo evo robojiya valevu sara, eru vo lewe levu eru vo soqoni vata mai meru rogociya, meru vacolai muni mai na ledru malumalumu. ¹⁶ Avo ladai yaji i vikaikai me masu. ¹⁷ Ia e na kiya na siga, a vaivuli no o keya, eru yavalu na Farisi qanedru na vuni vunau eru no voleka nomuni keigi, eru la taucoko mai na rara lailai Kalili, qaneya o Jutiya i Jerusalemi muni. A notu vuwa na kaikai ni Turaga me vacola nidru. ¹⁸ A tolaviya eru yavalu na tamata eru kau no mai na i mocemoce e kiya na tamata e tauvi paralase, eru tolaviya meru meia mai yaloga, meru vadaroniya e mata o keya. ¹⁹ Ia niru vo tasi rewa ni meia i yaloga ni were me balejiya nivo oso, eru caketakiniya e yataga na were, e qai vasisitaki bale mai na tamata ikwe na leya i mocemoce ina kedru maliwa ve mata o Jisu. ²⁰ Ia nivo tolaviya na ledru vabaujiya o keya, a kwa vuwa, o iko evo bokoci na lemu valavala bura. ²¹ Avo vatekivu o rau na vunivola qanedru na Farisi meru vinumiyaki niya, aru kwa ''O cei ikwe e tata vaburaburajiya na Kalou? O cei tale e rewa ni bokociya na valavala ca, na Kalou takiya ga?'' ²² Ia nivo kilajiya o Jisu na ledru vinumiyaki niya, a kwa vuwadru, Na cava mutu vinumiyaki niya no qoi mutu yaloga? ²³ I vei e rewarewa cake, mo kwa, Evo bokoci na lemu i valavala bura, se mo kwa, mo tucake mo layaji? ²⁴ Mo mutu kilajiya ke rewajiya na Luve ni tamata i vuravura me bokociya na i valavala bura, e qai kwa o keya vuwa na tauvi paralase, ''Aqu kwa vuwako, Mo tucake, mo kau na lemu i mocemoce, mo la ina lemu were, mo varokorokotakiniya na Kalou. ²⁵ Avo tucake o keya, eru mata avo qulumiya na kwa e daro ke, a layaji ina leya were, a varokorokotakiniya na Kalou. ²⁶ Eru kurabui taucoko ga, aru vo varokorokotaki niya na Kalou. Evo unuvidru e kiya na mataku, eru kwa, ''Edu vo daniya nikuwa na vikwa vivakurabuitaki sara.'' ²⁷ Ni oji na vikwa ikwe, avo layaji o keya a tolaviya e kiya na dausoqoni jiya na i vacavacava e yaca o Livai, e nokoto no ina wereni vacavacava. A kwa vuwa tekuciko au mai. ²⁸ Avo biujiya na kwa taucoko o keya, avo tekuciya yaji. ²⁹ Avo vaveya vuwa e kiya na magiji levu o Livai, ina leya were, eru lewe levu ru dau soqonijiya na vacavacava qeinidru tale yavalu ru no vata mer kana. ³⁰ Ia o rau na ledru vunivola qenidru na Farisi eru vo kwa vuwadru na leya jisaiveli, Na cava mutu vo kana vata mutu somu vata qanedru o rau na soqoniya na i vacavacava vata o rau na tamata i valavala bura? ³¹ A tata o Jisu, a kwa vuwadru, "E tasi yaga na vuniwai vuwadru na cola oka vuwadru ga eru tauvimate. ³² Aqu tasi lamai mequ covidru na yalo dodonu meru vivutuni, o rau ga nai valavala bura." ³³ Aru kwa vuwa, "E cava eru lolo no ke ru daumasu o rau na la jisaiveli o Joni, qeinidru leya jisaiveli muni na Farisi, is na lemu eru kana eru somu?" ³⁴ A kwa vuwadru o keya "Mutu lewaidru rewa na weka ni teigwane e qai vawaji? ³⁵ Ia ena yaco mai na siga ena kau dai ke vuwadru na teigwane e qai vawaji, eru na qai lolo na gauna igi." ³⁶ A kwakwa takiniya na kwa vatautauvata. "E jikai ni kiya na tamata e culajiya vata na leya i jiki ni sulu vou ina i sulu madra, ena dresukiya e jiki vou, ena tasi kabijiya vata e jiki vou, evo cula vata na i sulu madra. ³⁷ E jikai ni kiya na tamata e talociya na waini vou ina tavaya ni kili ni manumanu madra, ke qai kwacabote na tavaya ma waini vou ena roro yaji, ena bura muni na tavaya. ³⁸ Ia e oka me talo na waini vou ina tavaya vou, ena maroroi ruwaruwa ke. ³⁹ E jikai ni kiya na tamata, nivo somiya oji na waini makawa, me qai okajiya na waini vou, nivo kwa, "Na kwa makawa e oka cake.'