¹ Avo vuqa o Jisu i na Yalo Tabu, avo lesu tale mai i na Joritani a vo meiya na Yalo Tabu i na yaloga ni vi kaikai, ² a dau veretakiniya tu me bogi vasagavulu. E tasi kiya na kwa e kaniya o keya na visiga igi; ni vo devu a qai matakana. ³ A kwa na nitu vuwa, kodaki o luve ni Kalou, mo kwa me vuki na vatu ikwe me jiya i buli madrai. ⁴ A kwa vuwa o Jisu, a kwa, e volai, e tasi cola na tamata i na madrai takiya ga, e cola ga i na tata taucoko ga ni Kalou. ⁵ A tuberiya na nitu ina kiya na yaloga yawa i yata, a vata keya vuwa vasauri sara na vi matanitu taucoko ga i vuravura. ⁶ A qai kwa na nitu vuwa, na keya lewa taucoko ga na kwa iqoi aqu na soliya vuwako, na keya i ukuuku taucoko ga, ni vo soli voko au, aqu na qai soliya yakiya vuwa qu mata soliya ke; ⁷ Kodaki o varokoroko vuwako au, e lemu taucoko ga. ⁸ A tata vuwa o Jisu, a kwa, mo ladai re qu lobo, setani; evo volai, mo varokoroko vo Jiova na lemu Kalou, mo qwaraviya takiya ga. ⁹ A meiya i Jerusalemi, a va no niya i na yataga ni were ni lotu, a kwa vuwa, kodaki o jiya luve ni Kalou, mo rido bale ikei. ¹⁰ Evo volai, e varojidru na leya agilosi o keya balejiko, meru maroroi jiko; ¹¹ io eru na roqo jiko veru lima, ke kiya na siga e tavutu mu la ina vatu. ¹² A tata o Jisu, a kwa vuwa, a lai kwai, mo kuwa ni va tovoliya bura na lemu Kalou o Jiova. ¹³ Nivo va devuciya taucoko ga na dau vere na nitu, a vo ladai vuwa a yacoviya e kiya na gauna. ¹⁴ Avo lesu tale o Jisu i na kaikai ni Yalo Tabu i Kalili, avo la na keya i rogorogo i na vanuwa taucoko e volekajiya. ¹⁵ Avo va vuvulu no i na ledru were ni lotu, aru vo dokaiya o rau taucoko ga. ¹⁶ A cava i Nasareci, na rara a susu ke me kodaki na leya i varau, avo unu i na were ni lotu i na siga ni vacecegu, avo tucake me wilikiya na i vola. ¹⁷ Avo soli vuwa na leya i vola o Aisea na parovita. Ni tevukiya na i vola, e daniya ke e jiki e volai ke, ¹⁸ Evo no voko au e yalo o Jiova, nivo wali ciko au o keya mequ vunautaki niya na i tukutuku oka vuwadru na dravudravuwa; mequ vunautaki niya na sereki vuwadru na bobula, vuwadru na tola tale vuwadru na mata boko, mequ va gwalala takinidru na mavowa, ¹⁹ mequ vunautaki niya na leya yabaki oka o Jiova. ²⁰ A viviciya na i vola, avo soliya tale vuwa na i talatala, avo no i ra, aru va daniya makuga eru mata taucoko ga o rau na no i were ni lotu. ²¹ A qai kwa vuwadru o keya, na siga i kwe e na yaco ke vuwa mutu bebe na i vola tabu ikwe. ²² Aru vo vadjinadjina vuwa o rau taucoko ga, e karacidru na vuku ni tata oka e lamai ve gusu, aru kwa, e tasiniya o luveya o Josefa o keya ikwe? ²³ A kwa vuwadru o keya, e djina ga mutu na kwa voko au na i bole ikwe, vu - ni- wai, mo vacola niko re; na kwa taucoko ga madu varogo e vo vai mai Kepanaumi, vaveya muni i na lemu i vunau iqoi. ²⁴ A kwa tale o keya, Aqu vo kwa vaidjina vuwako mutou, e tasi kiya na parofita e lai okaji i na leya vanuwa. ²⁵ Aqu vo kwa vaidjina vuwako mutou, eru levu na yada mai Isireli na leya gauna o Ilaijia, ni vo sogo tu o lomalagi me yabaki tolu vula ono, ni vo dravuisiga valevu na vanuwa taucoko. ²⁶ A tasi vatala jiya o Ilaijia vuwa e kiya vuwadru, ve kiya ga na yada mai Sarepita, na yasayasa va Saitoni. ²⁷ Aru vo levu tale na vukavuka i Isireli la gauna o Ilaisa na parofita; e tasi kiya vuwadru e va savasavataki , o Neamani ga na kwai Siria. ²⁸ O rau taucoko ga i were ni lotu, aru vo varogo na kwa ikwe. ²⁹ Aru vo oca valevu sara, aru vo tucake, aru biliya i na i bili ni rara, aru vo meiya i na tutu ni yataga avo vai tu ke na ledru rara, meru biliya mai ina bara ni savu. ³⁰ Avo la o keya ina kedru vimama, a dai yaji. ³¹ Avo labale i Kepanaumi, na rara mai Kalili, a vivavulici ina vi siga tabu. ³² A karacidru sara na leya i vavuvuli, avo tata o keya ina leya kaikai vainiya. ³³ A nokoto i were ni lotu e kiya na tamata, a unuviya tu e kiya na yalo ni nitu, a kulakula tu ina domo levu, ³⁴ A kwa, ulei' na cava vuwako datou, i Jisu na kwai Nasareci? o vo lamai mo rewajiko madou? aqu vo kilajiko, na leya kiya yalo savasava na Kalou. ³⁵ A vunauci jiya o Jisu, a kwa, "Mo galu ga, Mo ladai mai vuwa!" Avo cibicibilaki niya na nitu i na kedru vimama, avo qai ladai mai vuwa, avo tasi mavowa. ³⁶ Avo karacidru taucoko ga, aru vitataki vai nidru na cava na tata ikwe, avo tata vaturaga e mana o keya vuwadru na yalo kanikiya, aru vo ladai sara. ³⁷ Avo caginiya yaji na keya i tukutuku i na yasayasa taucoko ga i na vanuwa voleka jiya. ³⁸ Avo ladai mai i were ni lotu o keya, a unu i la were o Saimoni. Avo tauviya la nene la yalewa o Saimoni na katakata levu, aru vo masujiya e vuku ga o keya. ³⁹ A vo no e jiki igi, a vunaucijiya na katakata; a vo ladai vuwa, a tucake sara o keya, a qwaravidru sara. ⁴⁰ Nivo lai dromu na siga, o rau taucoko ga na tauvimate na ledru mate e yavalu aru vo meidru vuwa; avo tabakidru yakiya o keya ve lima, a va cola nidru. ⁴¹ Eru levu eru vo ladai mai vuwadru na nitu, aru vo kulakula no, eru kwa, o iko na Karisito na luve ni Kalou, a vunauci jidru o keya, e tasi dainidru meru tata, niru vo kilajiya ni Karisito o keya. ⁴² Nivo siga a vo ladai o keya, avo la e kiya na vanuwa e lala; aru va daniya o rau na tamata, aru la mai vuwa, aru taroviya me kuwa ni la dai mai vuwadru. ⁴³ A kwa vuwadru o keya, e vo dodonu mequ la mequ kwa na i tukutuku oka ni matanitu ni Kalou ina vi rara kani kiya muni; na kwa ikwe a qu lai vatala mai ke. ⁴⁴ Avo dau vunau o keya i na vi were ni lotu mai Kalili.