1
Aru cavu tu o rau taucoko ga na lewe levu, aru meiya vo pailato.
2
A ru vo tekivu meru bilitaki niya, aru kwa, madu vo daniya o keya ikwe, a vuki cidru kanikiya na vanuwa, e vatabu niya na soli vacavacava vo Sisa a kwa ni Karisito na Tui o keya.
3
A tarogiya o Pailato, a kwa, o iko na ledru Tui na kwai Jutai, se jikai?A tata o kiya, a kwa vuwa, o vo kwa jina mai.
4
A qai kwa o Pailato vuwadru na bete levu qainidru na lewe levu, Aqu tasi tolaviya e kiya na kwa bura vuwa na tamata ikwe.
5
A ru vo gumaikali valevu mai, a ru kwa, a sa vulijidru na tamata taucoko i Jiutiya o keya ikwe, i na leya vavuvuli, a tekivu i Kaleli a cava i yasa ikwe.
6
varorogo i Kaleli o Pailato, a tarogiya, e kwai i Kaleli o keya, se jikai.
7
Ni vo kilai na dau no o keya e tavo e lewaiya o Eroti, e va talajiya vo Eroti, e kiya talega e nokoto talega i Jerusalemi. ina gauna igi.
8
Ni vo daniya o Jisu o Eroti, a vo marau sara: ni vo okajiya makawa me daniya, e vo levu na kwa e varogo vuwa, a nuitakiniya me daniya ni vaveya e kiya na cakacaka mana.
9
E qai levu na kwa e tarogiya ke; e tasi kiya na kwa a kwa vuya.
10
A tu ke na bete levu qeinidru na vunivola, a ru vo bilitaki niya sara.
11
O Eroti qeinidru la sojiya, aru va burabura niya, aru varivariva ciya, aru vai sulujiya, e kiya na i sulu lumilumisa aru kwa me la vo Pailato.
12
A ru vo vi okaji tale i na siga igi o Eroti qei niya o Pailato: Aru a viburaji tu i mata.
13
O Pailato, e va soqoni jidru vata mai, na bete levu qeinidru na Turaga qeinidru na tamata,
14
a kwa, mutu meiya mai vuwako au na tamata ikwe, me kodaki e kiya e vukicidru kani kiya na tamata; io daniya aqu tarogiya ve mutu mata, aqu tasi daniya vuwa na tamata ikwe kiya na bura me mutu bilitakiniya ke:
15
O Eroti tale ga, e jikai; aqu vatalajiko mutou vuwa daniya, e jikai na kwa e lai dani vuwa e dodonu me mate ke:
16
O keya ikwe qu kana kuitajiya ke, qu na serekiya.
17
E vo dodonu me serekiya vuwadru e kiya na soqo o keya.
18
Aru sogogiya vata, a kwa, me ladai o keya ikwe, me sere mai vuwako madou o Parapa:
19
O keya e dai i were ni vivesu, a vatubu bura i rara a taba tale ga.
20
Ni vo mata serekiya o Pailato, a tata tale vuwadru.
21
Aru coco aru kwa, vakojiya ga i na kauvelatai, vakojiya i na kauvelatai.
22
A kwa vatolu o keya vuwadru, na cava e bura e vaveya? aqu tasi daniya e kiya na bura vuwa e dodonu me mate ke; o keya ikwe na kuwita jiya, qu na serekiya
23
Aru qai gumaikali sara na kulataki niya, eru kereviya me lai vako i na kauvelatai o keya. Aru gumaikali na coco.
24
Avo lewaiya o Pailato me vai ga re me kodaki na cikecike.
25
Avo serekiya a daniya i were ni vivesu balejiya na viburaji qeniya na laba, o keya eru okajiya; avo soliya o Jisu meru vavitaliya takiniya.
26
Ni ru vo tuberiya yaji, aru qulumiya e kiya na kwai Kirini, O Saimoni, o keya a la mai vanuwa, aru tauniya vuwa na kauvelatai, ma dagiya me tekuciya o Jisu.
27
Aru vo levu sara eru tekicidru, o rau muni na lewa, aru tagi aru wale na tagi.
28
A vuki vuwadru o Jisu a kwa o mutou na lewa ni Jurusalemi, mutu kuwa ni tagicaki niko au, mutou qeinidru o luvemutou:
29
Daniya, e vo voleka na siga, e lai kwai ke e kalougata na yava, qeiniya na e kete e tasi sucu mai ke nai luve, qeiniya eru cucu e tasi cucu kenai luve.
30
E ru na kwa i na ulu ni vanuwa, lutu kiko madou mai, ina vanuwa yawa i yata talega, taboiniko madou mai.
31
Kodaki e ru na kwa ikwe ni drokadroka na kai, na cava e vai ni vo sama?
32
Aru ruwa e ru kanikiya muni, na tamata bura, aru lai tube vata qaneya meru lai va mate.
33
Ni ru vo cava e kiya tavo, e yaca o Kalivari ( na vanuwa ni qwavokavoka), aru vo vakojiya ke ina kauvelatai, o rau muni na tamata bura, e kiya e lima i matau, e kiya e lima mawi.
34
A qai kwa o Jisu , I TAMAQU, kuwa ni ocajidru, e ru tasi kilajiya na kwa eru vaveya. A ru votaiya na leya i sulu, aru vawiriwiri madjigi.
35
A ru vo notu na lewe levu meru va danidru. O rau muni na turaga eru varivarivaciya, aru kwa, o keya e dau vacolanidru na kanikiya; me vacolaniya, kodaki e Karisito o keya, leya djigitaki na Kalou.
36
O rau muni na sojiya eru va rivarivaciya aru lamai vuwa, aru soliya vuwa na wai winiwini.
37
aru kwa, kodaki e ledru Tui na kwai Jutiya, vacola niko.
38
A kiya nai vola a no i yata vuwa, a volai na tata va kirisi, qeiniya na tata va Roma, qeiniya na tata va Iperiu, o keya ikwe na ledru Tui na Kwai Jiutiya.
39
A tata bura takiniya e kiya vuwadru na tamata bura a rube, a kwa, kodaki o Karisito o iko, vacolaniko qeiniko maru muni.
40
A tata na keya i karuwa, a vunaucijiya, a kwa o tasi matakuciya na Kalou, o lewaiya mo mate ke?
41
E dodonu vuwako daru, e vo saumi vuwako daru me kodaki ledaru i varau, na tamata ikwe, e tasikiya na bura e vaveya.
42
A kwa vo jisu o keya, o mutou na turaga, numiko au ni vo lamai na lemu matanitu .
43
A kwa vuwa o Jisu, aqu vo kwa vadjina vuwako, na siga ga nikuwa daru no vata mai Parataisi.
44
Io vo ka ono ni yauwa, a vo gilogilo na vanuwa taucoko me yaco viya na kaciwa ni yauwa.
45
A vo va gilogilo taki na mata-ni-siga a vo kwa sei ruwa na i laji ni were ni lotu.
46
A vo coco i domo levu o Jisu, a kwa, "I Tamaqu, qu vo soliya qu yalo ve mu lima" ni vo tata devu kodaki igi, a qai mate.
47
Ni vo daniya na turaga ni valu na kwa e vai, a vo varokorokotakiniya na Kalou, a kwa, "E djina ga vo yalo dodonu na tamata ikwe."
48
O rau taucoko ga na tamata meru lamai meru daniya na kwa ikwe , niru vo daniya na kwa a vo vai, eru vo taciya eru saro, aru lesu tale.
49
O rau muni o wekaya, qeinidru na lewa e ru tekuciya i Kaleli, e ru no vayawa, eru daniya na kwa ikwe.
50
E kiya na tamata e yaca o Joseva, e kiya vuwadru na vilewai; e tamata oka e dodonu.
51
la tasi yalovata se ru cakacaka vata qeinidru; e kwai Aramaceya, e kiya na ledru rara na kwai Jutia : a waciya talega o keya na matanitu ni Kalou.
52
Avo la o keya vo Pailato, a kereviya e yago o Jisu.
53
Avo rogojiya bale mai, a oloniya ve kiya nai sulu lineni, a vadaniya ve kiya nai bulubulu avo vai tu ve na vatu, si jikai ni kiya e dara ke i mata.
54
Ni siga varau, avo toro mai na siga ni vacegu.
55
O rau muni na lewa, aru la vata mai i Kalili, eru tekuciya mai, aru vo daniya nai bulubulu, qeiniya na varau ni kisi e lala.
56
Aru vo lesu tale, aru varautakiniya e yavalu na kwa e garu oka qeiniya na waiwai: aru vacegu ina siga ni vacegu ina siga ni vacecegu me kodaki na i vunau