¹ I na matai ni siga ni wiki, ni si qwata lailai sara, aru vo lamai i na bulubulu, aru kau mai na kwa e garu oka eru varautakiniya, e yavalu tale eru la vata mai qeinidru. ² Aru vo daniya ni vo vaqiqitaki dai na vatu mai nai bulubulu. ³ Niru vo unu, eru tasi daniya e yago na Turaga o Jisu. ⁴ Avo cava me karacidru valevu ke, daniya eru ruwa na tamata eru no voleka vuwadru ina i sulu lumilumisa. ⁵ Niru vo mataku, aru vo kaere bale ina qwele, eru kwa vuwadru, na cava mutu lamai vadaniya o keya a cola mai na kedru vimama na mate? ⁶ E jikai ikei o keya, avo tucake tale! numiya na leya tata o keya la no qaneko mutou mai Kalili, ⁷ evo kwa, evo soliya na luve ni tamata eru lima na tamata bura,a vako ina kauvelatai, tucake tale ina katolu ni siga. ⁸ Aru qai numiya na leya tata, ⁹ a suka ina bulubulu, a kwa na kwa taucoko ga vuwadru na lewe jinikaduwa, vuwadru taucoko ga eru vo. ¹⁰ O rau aru mai kwa na kwa ikwe vuwadru na i apositolo, Meri na lewa ni makitala,qeiniya Joana, qeiniya o Meri la nene o Jemesa,qeiniya eru yavalu na lewa kanikiya. ¹¹ E kodaki e kiya nai tukutuku boto vuwadru na leya tata, aru tasi vadjinajiya. ¹² A qai la o Pita, drusa i na i bulubulu a vo va cuvaniya e ulu, avo daniya na i sulu lineni ni vo no, a vo ladai, e kacaciya e yaloga na kwa e vo yaco. ¹³ Daniya, eru ruwa vuwadru aru la ina siga djina igi na kiya na rara lailai o Emeo e yaca, bara vitu na maile e savu na ledru viyawaki qeiniya o Jeruisalemi. ¹⁴ Aru vitatakiniya na kwa taucoko ga e yaco. ¹⁵ Niru vo vitataki no aru vitarogi, a toro voleka o Jisu, a la qanedru. ¹⁶ A vabuwawataki eru mata meru kuwa ni kilajiya. ¹⁷ A kwa vuwadru o keya, nai tukutuku cava muru vitataki takiniya, ni muru vo la tu? aru tu vakiya aru mata warubu rubujiya. ¹⁸ E kiya vuwadru, e yaca o Kaliopasa, a tata a kwa vuwa, o iko takiya na vunilagi mai Jeruisalemi, o tasi kilajiya na vi kwa e qai yaco ke na gauna ikwe? ¹⁹ A tarogidru o keya, a cuva? aru kwa vuwa, Na kwa balejiya o Jisu na kwai Nasareci, e parofita e levu na cakacaka qeiniya na tata ina mata ni Kalou qeiniya eru mata taucoko na tamata, ²⁰ aru soli o rau na bete levu qeinidru na lemadu turaga me lewai me vamate, aru vakojiya ina kauvelatai. ²¹ O madou madu nuitakiniya o kiya ga ikwe ena vacola nidru na Isireli. Ikwe muni, evo jiya Kalou ni siga nikuwa evo vai devu na kwa ikwe ²² E yavalu muni na lemadu lewa, eru va karaciko madou niru vo la ina bulubulu ina qwata lailai. ²³ Niru vo tasi daniya e yago, aru vo lamai kwa, eru vo daniya e yavalu na agilosi eru lamai vuwadru, aru kwa evo cola o keya. ²⁴ O rau muni eru yavalu eru dau no vata qaneko madou, eru vo la ina bulubulu, eru vo daniya e kodaki na kwa eru kwa na lewa: eru tasi daniya. ²⁵ A kwa vuwadru o keya, muru sesewa muru tasi vabaujiya na kwa taucoko ga eru kwa na parofita! ²⁶ E tasi kilikili qeiniya na Karisito me vosojiya na kwa ikwe, me qai unu na leya i ukuuku? ²⁷ A qai tekivu ina leya i vola o Mosese me yacovidru taucoko na parofita, a serekiya mai vuwadru na i vola tabu taucoko ga na tata e lai kwa ke o keya. ²⁸ Aru vo taroviya na rara lailai eru dau lake: a la o keya me kodaki e la i mata. ²⁹ Aru vo cikeviya makuga, a kwa, ''Mo no koto ga qeiniko madou, ni vo yavi, avo la bale na matanisiga.'' Avo unu o keya me no vata qeinidru. ³⁰ Niru vo no meru kana, a qulu na madrai o kiya, a lotu takiniya, a doviya a soliya vuwadru. ³¹ A qai lau eru mata, aru vo kilajiya: avo lavele o keya mai ve ru mata. ³² Aru vo vi kwayaki niya vainidru, e tasi katakata sara eru yaloga, nidu vo vitataki takiniya i calevu, ni vo vamacalataki muni na i vola tabu o keya? ³³ Aru vo la ina yavi ga igi, a la tale i Jeruisalemi, aru danidru na lewe jinikaduwa niru vo soqo vata mai, qeinidru na dau no vata tu, ³⁴ aru kwa, e djina avo tucake tale na Turaga avo lai no vo Saimoni. ³⁵ Aru vo kwa muni na vi kwa e vai i calevu, niru vo kilajiya muni ni vo doviya na madrai. ³⁶ Niru vo tata no kodaki igi, a no sara na kedru vimama o Jisu, a kwa vuwadru, ''Mutu vacegu ga.'' ³⁷ A karacidru aru mataku, na ledru vakasama niru daniya e kiya na yalo. ³⁸ A kwa vuwadru o keya, e karaciko mutou i na vuku ni cava? a tubu na va numiya vo mutu yaloga i na vuku ni cava? ³⁹ Daniya qu lima qaneya qu la, o au djina ga: dereiko au, daniya, e jikai ni va lewe se va tuwa na yalo, me kodaki mutu daniya vuwako au. ⁴⁰ Ni vo tata devu kodaki ikwe o kiya, a vatakeya vuwadru e lima qaneya e la. ⁴¹ Niru tasi vabaujiya balejiya ni vo marau, e karacidru, a tarogidru o keya, e kiya na caa ikei vuwako mutou se jikai? ⁴² Aru soliya vuwa e kiya na jiki ni ika lete, e yavalu mai taba ni oni e tawa, ⁴³ avo qulumiya o keya, a kaniya veru mata. ⁴⁴ A kwa vuwadru o keya, ikwe na tata qu dau kwa vuwako mutou niqu no qeneko mutou, ena yaco taucoko ga na tata e kwa me balejiko au. e volai i lai vunau o Mosese, qeniya na ledru i vola na parofita, qeiniya na same. ⁴⁵ E qai vakakarama takiniya eru yaloga o keya, meru kilajiya rewa na i vola tabu. ⁴⁶ A kwa vuwadru, e volai kodaki ikwe, e kilikili qaneya na Karisito me vosojiya kodaki ke, me tucake tale mai na mate i na i katolu ni siga. ⁴⁷ Me vunautaki muni na vivutuni, qeiniya na boko ni valvala ca, ena vuku qu yaca, vuwadru na vivanuwa taucoko ga, me tekivu i Jeruisalemi. ⁴⁸ O mutou, mutu na dau kwa na vi kwa ikwe. ⁴⁹ Io daniya qu vo vatalajiya vuwako mutou na kwa e yalatakiniya o Tamaqu; mutu nokoto ga i na rara o Jeruisalemi, me yaco re vuwako mutou na kaikai mai yata. ⁵⁰ A meidru i na i bili i Pecani a qai dodokiya cake e lima, a tata vakalougatataki nidru. ⁵¹ Avo cava, ni tata vakalougatataki nidru no, a ladai vuwadru, avo lacake i lomalagi. ⁵² Aru varokoroko vuwa, aru lesu tale i Jeruisalemi, aru marau valevu. ⁵³ Aru dau no i were ni lotu, aru varokorokotakiniya na Kalou, aru vaokaoka vuwa Emeni.