¹ A tacake o kiya, a tolavidru na vutuniyau niru dainiya na ledru soli i na kato ni lava. ² A daniya muni e kiya na yada e vo davudravuwa e vo dainiya e ruwa na i lavo yalai sara. ³ A kwa o kiya a qu vo kwa vaidjina vuwako mutou, na yada dravudravuwa ikwe e dainiya valevu ke, o rau taucoko ga eru dainiya va lailai ga. ⁴ Niru vo daniya e yavalu o rau taucoko ikwe, ina ledru kwa e levu, ina kato ni soli. O kiya e dravudravuwa, e dainiya taucoko ga i na leya kwa me cola ke. ⁵ Ni ru vo kwa i na were ni lotu eru yavalu, e vo vai ukuukutaki na vi vatu oka qeniya nai solisoli, a kwa o kiya, ⁶ Na vi kwa ikwe mutu vo daniya, e na cava mai na siga ena tasi vo kiya na vatu me vitabetabei, ena talarakiniya taucoko ga. ⁷ Aru tarogiya, aru kwa, Vavuvuli, ena cava mai nigica na vi kwa ikwe? ⁸ Avo kwa o kiya, mutu qarauniko mutou oka ke mutu vacalai. eru na levu eru na lamai kwa balejiko au, eru kwa, o au ga kiya, a qai toro mai na keya gauna, mutu kuwa ga ni tekucidru. ⁹ Mutu vo varogo na i tukutuku ni valu, se na visei, kuwa ni karaciko, e vo dodonu me yaco re i mata na vi kwa ikwe, e vo voleka sara na i vaojioji. ¹⁰ A qai kwa vuwadru o kiya, e ru na vibolebole na vivanuwa, qeiniya na vimatanitu. ¹¹ E tavuki valevu na vivanuwa, e tubu muni na dausiga, qeiniya na mate bura, e na lai dani e yavalu na kwa e vamataku e yavalu na i vata kilakila mai lomalagi. ¹² Ni si bere ni cava na kwa taucoko ga ikwe eru vo qulumiko mutou, eru na va burabura niko mutou, aru na soliko mutou yaji ina vi were ni lotu, i na vi were ni vivesu, mutu na qai kau ve ru mata na tui qeiniya e yavalu na kovana, e vuku ga qu yaca. ¹³ Na kwa ikwe ena cava me niya na lemutu i va djinadjina. ¹⁴ O kiya me mutu vadeitakiniya mutu yalo, mutu kuwa ni numiya i mata na kwa me mutu kwa, ¹⁵ Qu vo soliya vuwako mutou na gusu, qeiniya na vuku e jikai e kiya na kemutu meca e vi lejitaki niya rewa, se vorajiya. ¹⁶ Eru na soli ko mutou yaji o rau na lemutu qase, qainiya lemutu tacini, qeinidru o mutou vata, o rau o wekamu, eru vavuniya e yavalu na mate. ¹⁷ Eru na burajiko mutou na tamata taucoko ga, me balejiya qu yaca. ¹⁸ E tasi rusa e kiya mu rau ni ulu. ¹⁹ Mutu maroroijiya mutu yalo ni mutu vosojiya. ²⁰ Ni mutu vo daniya ni vo buku na druwadruwa mai Jeruisalemi e yavalu na mataivalu, mutu qai kilajiya ke ni vo voleka ni bura sara. ²¹ Meru qai tuba ina vi uluniyataga, o rau eru no i Jiutiya; o rau na no i yaloga meru ladai yaji me kuwa muni ni unu mai ke o rau na nokoto e tavo i vanuwa. ²² Evo jiya gauna ni visasaumi ikwe, me vai na kwa taucoko ga e volai. ²³ E bura vuwadru na bukete, qei nidru na vasucuniya na i luve, na gauna igi! e bura valevu sara na vanuwa eru na lai ocaji valevu na tamata kwe. ²⁴ Eru na lai va matei i na selewau, ena mei vabobula ina vivanuwa, eru na butu kiya bale o Jeruisalemi o rau na vimatanitu, me yacoviya na i va devudevu ni ledru gauna na vimatanitu. ²⁵ E qai no nai vatakilakila i na matanisiga, qeiniya na vula, qeiniyana vi kalokalo; eru na bura na kwai vuravura, ena karacidru na vadugu ni wasawasa qeniya na oba ni uwa. ²⁶ E na kaniya eru yate na tamata na levu ni ledru mataku, eru waciya na vi kwa e voleka ni yaco mai vuravura na vitosoyaki ni vi kwa kaikai ni lomalagi. ²⁷ Eru na qai daniya na luve ni tamata ni vo lamai ina o na kaikai qeiniya na i ukuuku levu. ²⁸ Ni vo tekivu me cava na vi kwa ikwe, mutu tu i yata, mutu vawelewele niko mutou, ni mutu voleka ni vacalai. ²⁹ A kwa vuwadru e kiya na tata vatautauvata, ''daniya na lolo, qeiniya na vikai taucoko ga. ³⁰ Niru vo tubu, mutu daniya mutu kilajiya ni vo voleka na vula i katakata. ³¹ E kodaki muni ke o mutou, mutu vo daniya na vi kwa ikwe, mutu qai kilajiya ni vo voleka na matanitu ni Kalou. ³² A qu vo kwa vaidjina vuwako mutou e tasi takwali na itaba tamata ikwe, ena yaco re i mata na kwa taucoko ga. ³³ E takwali o lomalagi qeiniya o vuravura, na lequ tata ena tasi takwali. ³⁴ Mutu qarauniko mutou oka, ke kiya na siga e bibi ke mutu yalo i na mata kana, qeiniya na mateni, qeiniya na lomaocaoca i na vi kwa ni cola ikwe, a qai cava va sauri mai na siga igi. ³⁵ E kodaki ga i na cori ni vo cava vuwadru taucoko ga eru no i yataga i vuravura taucoko. ³⁶ O kiya me mutu vatawa, mutu masu no ga, me mutu vabau ke me mutu yaga me cola mai na kwa taucoko ikwe ena cava mai, a no i mata ni luve ni tamata. ³⁷ A vivavulici no kiya ina were ni lotu ni si siga, ni vo bogi avo la yaji, a moce ina ulunivanuwa va yaca ke o na Violive. ³⁸ Aru vo la taucoko ga mai vuwa na lewe levu ina were ni lotu ni vo qwata lailai, me ru varogojiya.