¹ Avo cava e kiya na siga igi, nivo vavulicidru no na tamata, o kiya i were ni lotu, a vunautakiniya na i tukutuku oka, aru lamai na bete levu, qeinidru na vunivola qeiniya na qase. ² Aru tarogiya, aru kwa, kwa mai vuwako madou, o lesi mai vai mo vaveya na kwa ikwe? ³ A tata o kiya, a kwa vuwadru, qu na tarogiko mutou muni e kiya na kwa; mutu kwa mai vuwako au. ⁴ La papitaiso o Joni a vu mai lomalagi, se vu mai vuwa na tamata? ⁵ Aru vo kwa vainidru, A kwa, kodaki du na kwa, 'Mai lomalagi'' e qai kwa o kiya, Mutu tasi vadjina jiya balejiya na cava? ⁶ Kodaki du kwa, Mai na tamata; eru na va virikiko datou e na vatu o rau taucoko ga na tamata; eru vadjina jiya ni parofita o Joni. ⁷ Aru kwa eru tasi kwa rewa e lamai vai. ⁸ A kwa vuwadru o Jisu, a qu tasi kwa muni vuwako mutou aqu lesi mai vai mequ vaveya na kwa ikwe. ⁹ A qai kwa o kiya na tata vatautauvata ikwe vuwadru na tamata; vuwadru na tamata e teiya e kiya na naga ni vaini, a lisitakiniya vuwadru na i vatawa ni vaini; a qai la e kiya na vanuwa kanikiya me lai no ke. ¹⁰ A vo cava na keya gauna, a vatalajiya o kiya e kiya na tamata vuwadru na i vatawa ni teitei, meru soliya vuwa e yavalu na vuwa ni vaini, aru ravulaki niya o rau nai vatawa ni vaini, aru qaqiya dai. ¹¹ A vatalajiya tale o kiya e kanikiya tale, aru ravulakiniya tale, aru vamaduwataki niya, aru qaqiya tale. ¹² A vatalajiya tale na i katolu aru vamovataki niya tale ga, aru qaqiya dai. ¹³ A qai kwa na i taukei ni teitei na cava mequ vaveya? qu na vatalajiya na lequ i luve ni toko. Eru na dokaiya niru vo daniya. ¹⁴ Niru vo daniya o rau na i vatawa ni teitei, aru vo vitataki vai nidru, eru kwa, o kiya ikwe na keya i vatawa mai bere, du va mateniya, me ledatou na vanuwa. ¹⁵ Aro vo buliya e lobo na naga ni vaini a ru vamateniya. Na cava e qai vaveya na i taukei ni naga ni vaini vuwadru? ¹⁶ E qai lamai qai vamate nidru nai vatawa ni naga ni vaini, a qai soliya me ledru na kwai kanikiyana naga ni vaini igi. Ni ru vo varogo, aru kwa, ''Me kwa ga!" ¹⁷ A vadanidru o kiya, a kwa, Na cava ikwe e volai, Na vatu eru burajiya nai matai ni were a yaco me keya i vadei na tutu ni were? ¹⁸ O kiya yakiya e lutu i na vatu iqoi, ena ravocaki ke, e kiya e lutu ciya, e na vurumemeya me kodaki na volivoli. ¹⁹ Aru vo vatovoliya o rau na bete levu qeinidru na vunivola, meru qulumiya na jiki ni siga igi, aru vo mataku cidru na tamata niru vo kilajiya avo tataki jidru o kiya ina tata vatautauvata igi. ²⁰ Aru vo vatolaviya, aru vatala jidru na tamata meru tawakitaki niya, e kodaki eru yalododonu, meru varogo ledru tata eru yavalu, meru soliya ke vuwa na kovana me lewaiya qai vitaliya takiniya. ²¹ Avo tarogiya, a kwa, vakavuvuli, madu vo kilajiko mutou ni mutu kwa nakwa e dodonu, mo vavuvulitakiniya e jikai ni kiya mo okajiya boto, o vo vavuvulitakiya djina na i varau e okajiya na Kalou. ²² Evo vai medu soli vacavacava vuwa o Sisa, se jikai? ²³ Avo kilajiya na ledru i lawaki o kiya a kwa vuwadru, ²⁴ Vatakeya mai voko au e kiya na pene. E mata o cei, qeiniya e yaca o cei, e volai no ke? aru tata, aru kwa, na leya o Sisa. ²⁵ A kwa vuwadru o kiya, mutu qai soliya vo Sisa na kwa e leya o Sisa, vuwa na Kalou na kwa e leya na Kalou. ²⁶ E jikai e kiya na leya na tata eru qulumiya rewa ve ru mata na tamata, e karacidru na leya tata, eru vo galu ga. ²⁷ Aru vo la mai eru yavalu lai to o Setoki, o rau eru kwa e vo jikai na tucake tale mai na mate; aru tarogiya, ²⁸ a kwa, vavuvuli, a volaiya o Mosese kodaki e vo mate e kiya na tamata vawaji qai ikai o luvequ, qai unuviya la yada e taukenijiya se o taciqu, me va kawa ke vuwa la tutuwa se la tacini a vo mate. ²⁹ E ru no na vitacini eru vitu a vo vawaji o kiya e qase, a vo mate e jikai o luveya, ³⁰ aru qai viwajini na yada e taraviya, a mate e jikai o luveya. ³¹ A ru qai viwajini nai katolu, a kodaki muni ke o rau na lewe vitu, aru mate a jikai o luvedru. ³² A qai mate i bere na lewa. ³³ Avo tucake tale na mate, e qai leya o cei o kiya ikwe? eru vitu aru viwajini qaneya. ³⁴ A tata o Jisu, a kwa vuwadru, aru vawaji aru vi musumusuki meru viwajini na i luve ni vuravura ikwe. ³⁵ O rau eru vabau me ru yaga me ledru na cola igi, qeiniya na tucake tale mai na mate, eru na tasi viwajini, se ru vimusumusuki me ru vawaji. ³⁶ Eru vo tasi mate rewa tale, eru vo tautauvata qanidru na agilosi, eru vo luve ni Kalou, ni ru vo luve ni tucake tale mai na mate. ³⁷ E ru va tu tale o rau na mate, a kwa o Mosese mai na kai e vatokoniya na Turaga na Kalou o Eparama, qeniya la Kalou o Aisake, la Kalou o Jekope. ³⁸ E tasiniya ledru Kalou na mate o kiya, e ledru ga o rau eru cola no,ni ru vo cola taucoko ga vuwa. ³⁹ Aru qai tata eru yavalu na vunivola a kwa, vavuvuli, o vo tata oka. ⁴⁰ E ru tasi doudou i bere me ru tarogiya e kiya na kwa ⁴¹ A qai tarogidru o kiya a lai kwai kodaki i vai ni luveya o Tevita na karisito? ⁴² A kwa o Tevita i na vola o same, A kwa o Jiova vuwa na lequ Turaga, me nokoto i qu lima i matau, ⁴³ mequ vamalumalutaki nidru na lemu meca me tutu mu la. ⁴⁴ Avo vatokoniya o Tevita me Turaga a qai niya o luveya? ⁴⁵ A qai tata o kiya vuwadru na leya jisaiveli, ni ru vo varogo no vuwadru taucoko ga na tamata, ⁴⁶ Mutu qarauniko mutou mai vuwadru na vunivola, eru okajiya meru yato vali i na sulu yabalavu, eru okajiya na vi kidavaki i na vanuwa ni vivoli, qeiniya na i nono ni qase i na vi were ni lotu, qeiniya na i nono ni Turaga ni kana vata. ⁴⁷ Eru qulumiya ledru yau na yada, aru dau qai masu balavu me vivakwasini, o rau ikwe eru dau lai ocaji va levu sara.