¹ A vo unu o keya i Jeriko, a la tu yaji. ² A daniya, e kiya na tamata e yaca o Sakiusa, e turaga vuwadru na dau soqoni jiya na i vacavacava, e vutuniyau. ³ Avo tovoliya me vadaniya o Jisui vei e kodaki o keya; e dredrei jiya vuwadru na lewe levu, e tamata lekaleka. ⁴ A wavu i mata, a cakeviya e kiya na vunilolo me tolaviya ke; e la voleka ke. ⁵ Avo cava i tavogi o Jisu, a tola cake, e daniya, a kwa vuwa, "I Sakiusa, vila vatoto, mo labale mai; qu na no mai lemu were nikuwa. ⁶ Avo siro bale mai o keya, a vacegu niya ina marau. ⁷ Nivo daniya, eru vele gudrugudru o rau taucoko ga, aru kwa, a la o keya me no qaneya e kiya na tamata i valavala ca." ⁸ A tucake o Sakiusa, a kwa vuwa na Turaga, "Daniya o mutou na Turaga, qu vo wase ruwataki niya na lequ i yau mequ soliya e kiya na i wase vuwadru na dravudravuwa; kodaki qu sugujiya lai yau e kiya, na tamata ni qu na bilitaki ke, eva na keya i sau qu na soliya. ⁹ A kwa vuwa o Jisu, "Evo yaco na cola nikuwa ina were ikwe, nivo luveya o Eparama o keya muni ikwe. ¹⁰ Nivo lamai na luve ni tamata me vadaniya qai vacola niya na kwa e lavele." ¹¹ Niru vo varogo na vikwa ikwe, a qai kwa muni o keya e kiya na tata vatautauvata, nivo voleka o keya i Jerusalemi, niru vo numiya muni ni na lamai vasauri na matanitu ni Kalou. ¹² O keya ikwe e kwa ke o keya. E kiya na turaga e la e kiya na vanuwa vayawa, me buli me tui, me qai latale mai. ¹³ A covidru na leya tamata eru jini, a soliya vuwadru e jini na paudi, a kwa vuwadru, mutu vi voli no, me yaco viya na lequ la tale mai. ¹⁴ O rau na leya rara eru burajiya, aru vatalajiya e kiya me tekuciya yaji me kwa, o madou madu vo tasi okajiya me lewa iko madou oka ke. ¹⁵ Nivo la tale mai o keya, avo buli me tui, a kwa meru lai covi mai vuwa o rau na tamata iqoi, o rau aru soliya vuwadru na i lavo, me kilajiya se ru yavica tale eru rewajiya niru vivoli. ¹⁶ A qai lamai o keya a simata, a kwa, o mutou na Turaga, e jini tale na paudi evi rewai na lemu paudi e kiya. ¹⁷ A kwa vuwa o keya, evo oka, na tamata oka; o vo djina ina kwa e lailai sara, mo lewaiya na rara e jini. ¹⁸ A lamai na i karuwa, a kwa, o mutou na Turaga, e lima tale na paudi e rewa i na paudi e kiya. ¹⁹ A kwa muni vuwa o keya o iko muni mo lewaiya e lima muni na rara. ²¹ qu matakuciko mutou, nio jiya tamata dredrei, Ovo qulumiya i yata na kwa o tasi rewa ni dainiya i ra, o musukiya na kwa o tasi kaburakiniya. ²² A kwa vuwa o keya, qu na lewaiko ina lemu tata, tamata bura, ovo kilajiya niqu tamata dredrei, qu qulumiya i yata na kwa qu tasi rewa ni daniya ira, qai musukiya na kwa qu tasi kaburaki niya. ²³ Ivei e kodaki nio tasi soliya ke na lequ i lavo ina baqe, mequ tarogiya tale na keyai kere niqu vo lamai? ²⁴ A kwa vuwadru na no voleka, kaudai vuwa na paudi, soliya vuwa o keya e jini na paudi. ²⁵ Aru kwa vuwa, Na Turaga, e notu vuwa e jini na paudi. ²⁶ Aqu vo kwa vuwako mutou, o keya yakiya e no tu vuwa na kwa, e soli vuwa, o keya e jikai vuwa na kwa, e na kau dai mai vuwa na kwa e notu vuwa. ²⁷ O rau na kequ meca ikwe, eru tasi okajiya meru lewai, meidru mai ikei, vamate nidru vequ mata. ²⁸ E vo tata devu o keya kodaki ikwe, a la kodaki i mata, a lacake no kodaki i Jeruisalemi. ²⁹ Avo cava, avo toro voleka o keya i Pecifaki qeiniya i Pecani, ina yataga e vayaca ina vi Olive, a vatala jiya e ruwa la tisaiveli, ³⁰ a kwa, muru la i na rara lailai e doniko muru; ni muru vo unu ke, muru daniya e kiya na luve ni asa e noka tu, e tasi vodo kiya e kiya na tamata; muru sere kiya muru meiya mai: ³¹ kodaki e tarogiko muru e kiya, muru sere kiya i na vuku ni cava? muru kwa vuwa kodaki kwe, e vo yaga vuwa na Turaga. ³² Avo la orau na laivatala, eru vo daniya me kodaki na kwa a lai kwai vuwadru o keya. ³³ Niru vo serekiya no na luve ni asa, aru vo tarogidru mai na keya i taukei, ³⁴ Na cava muru serekiya ke na asa? Aru kwa, e yaga vuwa na Turaga. ³⁵ Aru meiya mai vuwa o Jisu, aru tavaniya na ledru i sulu vuwa na luve ni asa, aru qai vavodo niya ke o Jisu. ³⁶ Nivo la tu o keya, eru tevukiya na ledru i sulu i calevu. ³⁷ Nivo vavilaniya i na yataga ni Violive o keya, aru tekuciya na jisaiveli taucoko ga eru levu meru marau, aru varokorokotaki niya na Kalou i na domo levu, ina vuku ni cakacaka mana taucoko ga eru daniya. ³⁸ Aru kwa evo kalougata na tui e la mai i na yaca ni Turaga' e notu mai lomalagi na viokaji, qeiniya na varokoroko i na yasa taucoko i yata. ³⁹ E yavalu na Farisi vuwadru na vuqa tu eru kwa vuwa, vavuvuli, vunauci jidru na lemu jisaiveli. ⁴⁰ A tata o keya, a kwa vuwadru, aqu kwa vuwako mutou, kodaki eru no lo o rau iqoi, eru na qai kulakula mai na vivatu. ⁴¹ Nivo toro voleka mai o keya, a daniya na rara, a tagicaki niya, ⁴² a kwa, Isa' kodaki o kila iya, io o iko, na lemu gauna ikwe na lemu vikwa ni vacegu' e qai cilo ga vuwako. ⁴³ Ni na lamai na siga, e na viribaitaki niko ke o rau na kemu meca, a buki na kemu druwadruwa, aru sogojiko ina vivanuwa taucoko ga. ⁴⁴ Ena va toro bale niko sara i ra, qeinidru o luvemu ina kemu vimama, e tasi vo vuwako e kiya na vatu me vi tuvatuvai; ovo tasi kilajiya na gauna o lai yatovi ke. ⁴⁵ A vo unu o keya i na were ni lotu, avo tekivu me rovidru dai na vivoli ke, ⁴⁶ a kwa vuwadru e volai, na were ni masu na lequ were; mutu vo vaveya me ledru qwara na dau driva. ; ⁴⁷ A vivavulici no i were ni lotu i na vi siga. Aru sagaiya o rau na bete levu qeinidru na vu- ni-vola qeinidru na turaga meru vamateniya, ⁴⁸ aru tasi daniya e kiya na kwa meru vaveya rewa; eru okajiya taucoko ga na lewe levu meru varorogojiya.