¹ Avo vata keya muni o keya e kiya na tata vatautauvata, e dodonu medu dau masu no me kuwa ni cegu, ² a kwa, "E kiya na rara e nokoto ke e kiya na turaga ni lewa, e tasi matakuciya na Kalou, e dokaidru ga na tamata." ³ E kiya na yada i na rara igi, e dau lamai vuwa, me kwa, mo ocajiko au vuwadru na kequ meca. ⁴ A duwa re o keya, qai kwa i bere e yaloga, Aqu tasi matakuciya na Kalou, se mequ dokaidru na tamata, ⁵ nivo lamai vasosataki niko au na yada ikwe, qu na ocajiya re, ke vawale niko au o keya evo tasi mudu na leya lamai. ⁶ A kwa na Turaga, mutu varogo na kwa e kwa na Yuraga-ni-lewa tasi dodonu. ⁷ Na Kalou e tasi rewa ni ocajidru na leya djigitaki, eru tagi no ga vuwa na siga qaneya na bogi, io, kodaki evo balavu la vosojidru? ⁸ Aqu vo kwa vuwako mutou, e na oca watoto o keya. Nivo lamai na Luve ni Tamata, ena daniya na vabaujiya i vuravura, se jikai? ⁹ A kwa na tata vatautauvata ikwe me kwa balejidru niru vararavi se ru yalo dodonu, aru becidru na tamata kanikiya. ¹⁰ Eru ruwa na tamata eru lacake i were ni lotu meru masu; e kiya na Farisi, e kiya na dau soqonijiya na i vacavacava. ¹¹ A no na Farisi a masu vainiya, e kodaki ikwe Na lequ Kalou, qu vamolimoli vuwako, qu tasi kodaki tale o rau na mataqwali tamata tale, eru dau kocokoco, eru dau driva lo, eru dau yalewa, se kodaki o keya e dau soqonijiya na i vacavacava. ¹² Qu dau lolo varuwa i na vimacawa, qu soliya na i kajini ni kwa taucoko ga qu rewajiya. ¹³ A no vayawa o keya e dau soqonijiya na i vacavacava, a tasi okajiya me masu i lomalagi, a taviya ga e saro, a kwa, o mutou na Kalou, lomaniko au mai, o au na tamata i varau bura. ¹⁴ Aqu kwa vuwako mutou, avo labale la were na tamata ikwe a vo vadoniya o keya yakiya e jikai, e vamalumalumutaki o keya yakiya eva levulevu niya; o keya eva malumalutaki niya ena valevulevutaki. ¹⁶ A covidru mai o Jisu, a kwa, "Deinidru na i luve yalai meru lamai voko au, kuwa ni tarovidru; eru kodaki na matanitu ni Kalou. ¹⁷ Aqu kwa vaidjina vuwako mutou, o keya e tasi vabaujiya na matanitu ni Kalou e kodaki na luve lailai, e tasi rewa sara ni unu." ¹⁸ A tarogiya e kiya na turaga, a kwa, "Vavuvuli oka, na cava mequ vaveya mequ rewajiya ke na cola tawa mudu?" ¹⁹ A kwa vuwa o Jisu, o kwa mequ oka balejiya na cava? E jikai e kiya tale e oka, na Kalou takiya ga. ²⁰ O kilajiya na i vunau, Mo kuwa ni dauvidriva, mo kuwa ni laba, mo kuwa ni driva, mo kuwa ni vibilitaki girigiri, mo varokoroko jidru o tamamu vata na lemu nene. ²¹ A qai kwa o keya, "Na kwa taucoko aqu vabaujiya niqu sijiya i luve aqu yacoviya na siga ikwe." ²² Nivo varogo na kwa ikwe o Jisu, a kwa vuwa, e kiya na kwa e jikai vuwako, mo volitakiniya na kwa taucoko ga e no vuwako, soliya vuwadru na dravudravuwa, o qai vai yau mai lomalagi; la mai tekuciko au. ²³ Evo varogo ikwe, e rarawa sara e yalo, ni vutuniyau sara. ²⁴ Nivo daniya o Jisu ni vo rarawa e yaloga, a kwa, "E dredrei sara vuwadru na vutuniyau me unu ina matanitu ni Kalou! ²⁵ E rewarewa me unu ina mata ni cula na kameli, e dredrei vuwa na tamata vutuniyau me unu i na matanitu ni Kalou." ²⁶ O rau eru varogo eru kwa, o cei na vacolai rewa? ²⁷ "A kwa o keya, na kwa e dredrei vuwa na tamata e rewarewa vuwa na Kalou." ²⁸ A qai kwa o Pita, daniya, madu vo dainiya na kwa taucoko madu tekuciko mutou. ²⁹ A kwa vuwadru o keya, aqu vo kwa vaidjina vuwako mutou, e tasi kiya e dai niya na were, se la momo, se la nene, se la tutuwa, se la tacini, se la yalewa, seo luveya na vuku ni matanitu ni Kalou, ³⁰ e qai tasi saumi, e qai rewajiya valevu ina cola ikwe, na gauna mai bere na cola tawa mudu. ³¹ A qai meidru mai na lewe jina ruwa, a kwa vuwadru, daniya, du vo lacake i Jerusalemi, na kwa taucoko ga eru volaiya na parofita me balejiya na luve ni tamata e na yaco mai. ³² Ena soliyaji o keya vuwadru na matanitu kanikiya, e na lailai ga, na vivakwaisini, a kala sivijiya, ³³ Eru na vakana kuitajiya, ru na vamate niya; e qai tu tale o keya i na i katolu ni siga. ³⁴ Eru tasi kilajiya e kiya na kwa ikwe, na kwa ikwe e cilo vuwadru, eru vo tasi kilajiya na kwa e lai kwai. ³⁵ Nivo toroviya o Jeriko o keya, e kiya na tamata mataboko e nokoto ina baji ni calevu me kerekere, ³⁶ nivo varogo eru latu, a tarogiya na keya i balebale. ³⁷ Aru kwa vuwa, avo latu o Jisu na kwai Nasareci. ³⁸ A coco o keya, "I Jisu, o luveya o Tevita, lomaniko au mai." ³⁹ Aru vunaucijiya o rau na simata no, me nolo. A coco valevu o keya, "Luveya o Tevita, lomaniko au mai." ⁴⁰ A tu va kiya o Jisu, a kwa me kau mai vuwa. Avo la voleka a tarogiya o keya, ⁴¹ Na cava o okajiya mequ vaveya vuwako?" A kwa, "O mutou na Turaga, mequ tola rewa." ⁴² A kwa vuwa o Jisu, mo tola rewa; evo vacola niko na lemu vabaujiya. ⁴³ A tola vasauri o keya, a tekuciya, a varokorokotaki niya no na Kalou; o rau taucoko na lewe levu, eru daniya eru vaokaoka vuwa na Kalou.