¹ Na gauna igi a lai kwai aji ke na leya lewa o Sisa Akusita, me volai na lewe ni vanuwa taucoko. ² Me va devu re na i vola ikwe ni vo kovana mai Siria o Kirinio. ³ A ru vo kala lala na tamata meru volai, o rau yakiya i na ledru vi rara. ⁴ Avo lacake tale o Josefa i kalili i na rara o Nasareci, i Jiutia, la rara o Tevita, e yaca o Peceliema; ni mataqwali vata o Tevita, a tubu mai vuwa; ⁵ Aru volai vata o Meri, o keya a musu vuwa me leya, a vo bukete no. ⁶ Niru vo no mai keigi, a vo cava mai na siga me va sucu ke. ⁷ A va sucu niya la ulu matuwa na teigane, a olo niya vuwa na i sulu ni luve, a va daraniya na vanuwa e ru no ke na manumanu ni vo jikai na were me ledru. ⁸ A yavalu na i vatawa ni sivi ni vanuwa igi, eru no mai na vanuwa vi mau, aru vivuke meru vatawa niya na sivi vai bogi. ⁹ A tolaviya, e kiya na agilosi ni Turaga a vo la yaji vuwadru, avo mudre wavoki vuwadru na i ukuuku ni Turaga, a ru vo mataku valevu. ¹⁰ A kwa vuwadru na agilosi, mutu kuwa ni mataku; daniya, a qu vo kau mai vuwako mutou e kiya na i tukutuku oka me mutu marau va levu ke, qei nidru taucoko na tamata. ¹¹ E vo sucu vuwako mutou na siga ikwe, la rara o Tevita, na i va bula, o keya na Karisito na Turaga. ¹² Ikwe na keya i va takilakila vuwako mutou, mutu na tolaviya na i luve ni olo tu vuwa na i sulu ni luve, a vo dara i na ledru vanuwa na manumanu. ¹³ Aru vo levu na kwai lomalagi, e ru no vasauri qai nidru na agilosi, a ru va oka oka vuwa na Kalou, ¹⁴ A leya na Kalou na varokoroko i na vanuwa i yata sara aru viokaji rewa na kwai vuravura; eru lai lomani o rau na tamata. ¹⁵ Aru vo ladai vuwadru na agilosi i lomalagi, aru kwa vainidru na i vatawa ni sivi, mutu la mai medu la i Peceliema medu daniya na kwa e yaco, o keya e vata keya mai vuwako datou na Turaga. ¹⁶ Aru la vawatoto yaji, aru vo daniya o Meri, qeiniya o Josefa, qeiniya na i luve ni dara no i na ledru vanuwa na manumanu. ¹⁷ Niru vo daniya, aru vo kwayaji na kwa a vo lai kwai vuwadru balejiya na i luve ikwe. ¹⁸ Avo karacidru taucoko ga niru vo va rogo na kwa eru kwa o rau na i vatawa ni sivi. ¹⁹ A qulu na tata taucoko ga ikwe o Meri, o vo vanumiya ke ve yaloga. ²⁰ O rau na i vatawa ni sivi eru vo lesu tale, aru va okaoka takiniya, ru dokaiya na Kalou i na kwa taucoko ga eru varogo se ru tolaviya, e kodaki a vo laikwai devu vuwadru. ²¹ Avo devu na bogi walu, a qai ciliviya ke na i luve, avo toko e yaca o Jisu, avo tokoniya na agilosi ni bere ni kunekune taki. ²² Avo devu na siga e va savasava takiniya ke la nene me kodaki na leya i vunau o Mosese, aru vo meiya i Jerusalemi, me va caboniya vuwa na Turaga. ²³ E kodaki ni volai i na i vunau ni Turaga, nai luve teigwane taucoko ga e ulu matuwa eru na va tokai me tabu me leya o Jisu;] ²⁴ Meru vacaboniya muni na i soro e kodaki ni kwa na leya i vunau na Turaga, me ruwa na soqe, se ruwa na luve ni ruve. ²⁵ Tolaviya, e kiya na tamata mai Jerusalemi, o Saimoni e yaca ,e yalo dodonu e dau lotu na tamata ikwe, a waciya na ledru vacegu na Isireli, a no vuwa na Yalo Tabu. ²⁶ A vo vatakeya vuwa na Yalo Tabu, ni si jikai re ni mate, a daniya rewa e mata na Karisito ni Turaga. ²⁷ A va vuniya na Yalo Tabu na leya la i na were ni lotu; io niru vo meiya mai na i luve o Jisu o rau na leya qase, me vai vuwa na i vaivai ni vunau. ²⁸ A qai roqojiya cake o keya, a kwa, ²⁹ O mutou na Turaga, mo qai daniya na lemu tamata me la i na vacegu, me kodaki na lemu i tukutuku; ³⁰ A qai daniya qu mata na vuni cola mai vuwako. ³¹ Io o keya o varau takiniya ve ru mata na tamata taucoko ga. ³² Na kakarama me vakakarama takinidru na vimatanitu kanikiya, me ledru i ukuuku na lemu tamata na Isireli. ³³ A karacidru o Josefa qeiniya la nene, balejiya na vi kwa eru kwa balejiya. Avo tata ni vivakalougata takinidru. ³⁴ O Saimoni, a kwa vuwa o Meri la nene, daniya, o keya ikwe e viri no me labale ke, se tucake ke eru levu na Isireli, me vatakilakila ke i na tata va buraburataki, ³⁵ Me va takeya ke me numiya eru yaloga eru levu; ia e na basukiya mu yaloga na i sele wau.. ³⁶ E kiya na parofita lewa, O Ana, o luveya o Fanueli, la mataqali o Aseri avo levu sara la yabaki, e vulau ni vo va teigwane, ³⁷ aru cola vata la teigwane me yabaki vitu; avo qai yada, e walu saga vulu ka va na keya yabaki; a vo tasi ladai i na were ni lotu, e dau lotu, e lolo, e dau masu visiga vibogi; ³⁸ A lamai o keya i na jiki ni siga igi, a vaokaoka muni na Turaga, avo tatakijiya vuwadru taucoko eru no mai Jerusalemi eru waciya na i vaicola. ³⁹ Aru vo vaveya devu na kwa taucoko ga me kodaki na i vunau ni Turaga, aru vo la tale i Kalili, i na ledru rara i Nasareci. ⁴⁰ Avo levu na i luve, avo yalo makuga mai, evo vuqa na vuku, avo no vuwa na loloma ni Kalou. ⁴¹ Aru vola la qase ina viyabaki i Jerusalemi ina kana vata ni lako siviya. ⁴² Nivo jini karuwa la yabaki, aru vo la i Jerusalemi, me kodaki na keya i varau na kana vata. ⁴³ Niru vo vadevuniya na visiga, aru vo lesu tale, avo nokoto ga na i luve o Jisu mai Jerusalemi, aru tasi kilajiya o Josefa qeiniya la nene. ⁴⁴ Aru numidru o keya qeinidru o rau na latu, aru la ga e kiya na siga la i bogi, aru qai vada niya vuwadru na kwai leya, qeinidrui na vikilai qeinidru. ⁴⁵ Niru vo tasi daniya, aru vo la tale i Jerusalemi, aru vadaniya no. ⁴⁶ Avo devu e tolu na bogi, aru qai daniya i na were ni lotu, ni vo nokoto na kedru vimama na i vavuvuli, a va rogocidru no, a tarogidru muni. ⁴⁷ A karacidru o rau na varogo, na leya vuku qeiniya na leya tata. ⁴⁸ Niru vo daniya, e karaciya, a kwa vuwa la nene, I luvequ o vaveya na i varau vuwako maru balejiya na cava? Daniya, o maru o tamamu maru vadaniko maru rarawa no. ⁴⁹ A kwa vuwadru o keya, e cava muru vadaniko au ke? muru tasi kila jiya ni kilikili qei niko au mequ no i la were o Tamaqu? ⁵⁰ Aru tasi kilajiya kai balebale ni tata e kwa vuwadru o keya. ⁵¹ Avola vata bale qeinidru o keya, a cava i Nasareci, avo varorogo vuwadru; a maroroijiya la nene na tata taucoko ga e yaloga. ⁵² A tubu o Jisu i na vuku e lala muni, avo okajiya valevu no ga na Kalou qeinidru na tamata.