¹ A ru lewe levu e ru boleiya meru varau taki niya na i tukutuku na vi kwa e vadjina jiya deivaki sara voko datou, ² me kodaki na kwa e ru kwa vuwako datou, o rau e ru tolaviya e ru mata e ru qaraviya na kwa, mai na i vatekivu; ³ E oka tale ga voko au, ni qu va tarotaro giya makuga sara na kwa taucoko mai na i vatekivu, mequ vadeitakiniya na vola vuwako mutou, Ceofilo na turaga djina, ⁴ mo kila jiya ke na keya djina ni vi kwa o va vuliciya ke. ⁵ Na gauna e tui Jiutia ke o Eroti, e kiya na bete o Sakaraia e yaca, e mata bete i Epaia; a leya e kiya o luveya o Eroni, o Ilisapeci e yaca. ⁶ Aru vo dodonu ruwaruwa i na mata ni Kalou, e tekuciya na i vunau taucoko qei niya na i varo ni Turaga, e tasi cola ⁷ E jikai o luvedru ni vo yava o Ilisapeci e ru vo qase ruwaruwa mai. ⁸ A vo yaco ni vo vaveya no o keya na cakacaka va bete i na mata ni Kalou, e vuku ni mata va bete. ⁹ Me kodaki na i valavala ni cakacaka va bete, e vo niya la i tavi me vayaginiya na kwa e garu oka, ni vo unu i na were ni turaga. ¹⁰ O rau na tamata taucoko ga eru lewe levu, e ru vo no i rara e ru masu ni vo yagi no na kwa e garu oka. ¹¹ A lai tolavi vuwa e kiya na agilosi ni Turaga, e no e tavo i matau ni cabocabo ni kwa e garu oka. ¹² Ni vo tolaviya o Sakaraiya, e karaciya, a vo unuviya na mataku, ¹³ a vo kwa vuwa na agilosi, kuwa ni mataku, Sakaraia, e vo lai rogoci na lemu masu, e na va sucu niya e kiya o luvemu teigwane o Ilisapeci na lemu yalewa, o na va yaca niya ke o Joni. ¹⁴ Io o na marau ke, e ru na levu tale ga e ru na marau ke balejiya na leya sucu. ¹⁵ E na levu o keya e mata na Turaga, e na tasi somu waini se na yaqona, e na va vuqaniya tale ga na Yalo Tabu, ve kete la nene. ¹⁶ Eru levu vuwadru o luveya o Isireli e na saumaki niya mai o keya i na Turaga na ledru Kalou. ¹⁷ E na simata taki niya e yalo o Ilaijia qei niya na leya kaikai, me sau niya vuwadru na qase qeinidru nai luve qeinidru na yalo dredrei i na ledru vuku eru yalo dodonu, me varautaki niyana tamata niya na tamata me ledru na Turaga. ¹⁸ A kwa vuwa na agilosi o Sakaraia, na cava mequ kilajiya ke na kwai kwe? niqu vo qase e vo levu na leya yabaki ni lequ yalewa. ¹⁹ Avo kwa na agilosi, a kwa vuwa o au o Keperieli, aqu dau no e mata na Kalou, aqu vo lai vatala mai mequ kwa vuwako, mequ kwa vuwako nai tukutuku oka i kwe, ²⁰ Mo tolaviya, o na galu ga, o tasi tata rewa, me yaco na siga e yaco ke na vi kwa ikwe, o vo tasi vadjina jiya na lequ tata, o keya e na vo va yaco niya ga ka gauna. ²¹ Aru vo waciya o rau na tamata, e karaciya ni vo balavu o keya i na were- ni soro. ²² Ni vo unu o keya, e vo tasi tata rewa, vuwadru a ru qai kilajiya ni vo tolaviya o keya e kiya na raivotu i na were ni lotu, a vo vatabataba vuwadru o keya a vo galu no ga. ²³ Ni vo devu na gauna ni leya cakacaka a vo la dei mai i na leya were. ²⁴ A vo devu na siga igi, a qai kunekune na leya yalewa o Ilisapeci, a cilo niya o keya me vula lima, a kwa, ²⁵ Avo cakacaka kodaki kwe voko au na Turaga i na siga e naki jiya o keya, me kau dai na kwa a qu varogo ke vuwadru na tamata. ²⁶ Ina i ka ono ni vula a lai vatala na agilosi o Keperieli vuwa na Kalou, i na kiya na rara mai Kalili, e yaca o Nasareci, ²⁷ vuwa e kiya na lewa e musu vuwa e kiya na teigwane e yaca o Josefa, na leya mataqali o Tevita, e yaca na lewa o Meri. ²⁸ A vo lamai vuwa na agilosi, a kwa, sa loloma, o iko o dau lomani' e vo nokoto vuwako na Turaga, o vo kalougata valevu vuwadru na lewa kani kiya. ²⁹ Io o keya e karaciya na leya tata, a vo vanumiya e yaloga se kodaki i vei na leya i varau ni kidavaki ikwe. ³⁰ Avo kwa vuwa na agilosi, kuwa ni mataku, Meri; ni o vo daniya na loloma vuwa na Kalou, ³¹ Tolaviya o na kunekune, o na vasucu niya e kiya na teigwane, mo va yaca niya ke o Jisu. ³² E na levu o keya, e na va toko ke o luveya o keya e cecere sara, na Turaga na Kalou e na soliya vuwa na i nono va Turaga na leya o tamaya o Tevita; ³³ Ena lewaiya o keya na mataqali ;o Jekope e tasi mudu, e tasi oji muni na leya matanitu. ³⁴ A qai kwa vuwa na agilosi o Meri, e na yaco kodaki i vei na kwa ikwe, ni maru tasi no vata e kiya na teigwane? ³⁵ a tata na agilosi, a kwa vuwa, e na la bale mai vuwako na Yalo Tabu, e na varuru niko muni na kaikai o keya e yawa i yata sara; o keya e na sucu mai vuwako e na vatokai ke me kwa tabu na Luve ni Kalou. ³⁶ Tolaviya, na lemu dauve o Ilisapeci, e vo kunekune taki niya muni e kiya na i luve teigwane, ni vo qase ikwe e ka ono ni leya vula o keya e vatokai me yava. ³⁷ E tasi dredrei vuwa na Kalou e kiya na kwa. ³⁸ A qai kwa o Meri, tolaviya na vada ni Turaga, me yaco voko au me kodaki na lemu tata, a vo la dai na agilosi mai vuwa. ³⁹ A vo i ya o Meri na gauna igi, a vo la vawatoto i yata, i na kiya na rara i Jiutia, ⁴⁰ Avo unu i la were o Sakaraia, a ru vo vikidavaki o Ilisapeci. ⁴¹ Ni vo varogo o Ilisapeci na ledru vikidavaki o Meri, e rido e kete na i luve, a vasinaijiya o Ilisapeci na Yalo Tabu; ⁴² Avo kula taki niya e domo o keya, a kwa, o kalougata va levu vuwadru na lewa kani kiya, a vo kalougata na vuwa ni mu kete, ⁴³ Avo kodaki i vei na kwa i kwe, vuwako au, ni vo lamai voko au na leya nene na lequ Turaga. ⁴⁴ Tolaviya, e vo rogo i qu bebe na lemu tata ni vi kidavaki, e rido i na marau na i luve i qu kete. ⁴⁵ A vo kalougata o keya e va djinajiya, e na yaco na kwa a vo la i kwai vuwa na Turaga. ⁴⁶ A vo kwa o Meri, a vo va maluwa vuwa na Turaga qu yalo, ⁴⁷ a vo marau qu yalo vuwa na Kalou na lequ i va cola. ⁴⁸ Evo lomaniya la vada ni dravudravuwa; a tolaviya i na gauna ikwe e kwa na i taba tamata taucoko ni qu vo kalougata. ⁴⁹ Ni vo vaveya na kwa levu voko au o keya e vo kaikai, e vo dokai ke e yaca. ⁵⁰ A vo na loloma vuwadru na matakuciya, me yaco viya nai taba tamata e wara. ⁵¹ Avo kaikai ka cakacaka e lima, a vo va sesenidru na viyaviya levu e keya na vuku ni numiya e ru yalo. ⁵² Avo vasivo nidru na kaikai mai na ledru i nono, a va cerecere nidru na tamata yalai. ⁵³ A vo biri niru mata kana i na kwa e oka a vatala nidru na vutu ni yau. ⁵⁴ A vukeidru na leya tamata na Isireli, ni va numiya na loloma, ⁵⁵ [me kodaki na leya tata vuwadru na leya qase] vuwa o Aparama, qei niya na leya kawa e tasi mudu. ⁵⁶ A vo no qaneya no Meri me vula tolu no, a qai lesu i la were. ⁵⁷ Avo yaco la siga o Ilisapeci me va sucu ke, a va sucu niya o keya e kiya na i luve teigwane. ⁵⁸ Aru vo varogo o rau na no voleka vuwa, qa i nidru na leya dauve, ni vo lomaniya va levu na leya Turaga, a ru vo marau vata. ⁵⁹ Na i ka walu ni siga e ru la mai meru ciliviya na i luve, a ru vo va yaca niya ke o Sakaraia, meru vi yaca ni qei niya la momo. ⁶⁰ A vo kwa la nene, me kuwa, me niya ga e yaca o Joni. ⁶¹ Aru kwa vuwa, e jikai o wekamu mo va yaca niya ke na yaca i kwe. ⁶² A ru vo va tabataba vo tamaya, na cava e okajiya o keya me niya e yaca. ⁶³ A kodaki o keya me kiya na veva ni volavola, a vo volaiya, E yaca o Joni a karacidru taucoko ga. ⁶⁴ A vo tasere sara e gusu vata e ma, a vo tata o keya, a vo varokoroko takiniya na Kalou. ⁶⁵ Aru vo mataku taucoko o rau na no voleka jidru, a vo lai kwai yaji na tata taucoko i qoi i na colo taucoko va Jiutia. ⁶⁶ Aru deiniya e ru yalo o rau taucok e ru varogo, e ru kwa, i vei e kodaki na leya i varau na i luve ikwe? a vo no vata no na lima ni Turaga. ⁶⁷ Avo va sinaiji i na Yalo Tabu o Sakaraia o tamaya, avo parofisai mai, a kwa, ⁶⁸ me varokoroko taki na Turaga na Kalou e leya o Isireli, evo la mai vuwadru na leya tamata a va cola nidru. ⁶⁹ A va tubuniya vuwako datou e kiya na vi vacolai e kodaki na kaukameya, na leya mataqali o Tevita na leya tamata. ⁷⁰ E kodaki na kwa e kwa o keya eru gusu na leya parofita tabu, mai na vatekivu ke o vuravura, ⁷¹ la vi vacolai mai na meca, e ru lima tale ga o rau eru burajiko datou. ⁷² E va yaconiya na yalo loloma vuwadru na ledru qase, me numiya no na leya viyalayalaji tabu, ⁷³ na bubului e bubului ke o keya vo Aparama o tamaya. ⁷⁴ Me soliya mai vuwako datou, medu va colai mai e ru lima na ledu meca, medu qwaravidru medu kuwa ni mataku. ⁷⁵ Na yalo savasava qeiniya na kwa dodonu e mata, na visiga taucoko ga i na ledu cola. ⁷⁶ O iko na i luve, o na vatokai mo parofita vo keya e cecere sara; o na simata vuwa na Turaga mo caramaki niya na leya calevu; ⁷⁷ me vatakei vuwadru na leya tamata na kwa meru cola ke, ni vo boko na ledru i valavala ca. ⁷⁸ E vuku na leya loloma levu na ledu Kalou, e kida mai ke vuwako datou na kakarama mai i yata, ⁷⁹ me va kakarama takinidru o rau eru nokoto no i na gilogilo qeiniya na yalo e vo mate, me qai tuberiya du la i na calevu e oka. ⁸⁰ A vo tucake na i luve, a vo yalo makuga sara, a nokoto no i na yaloga ni vikai me yaco re na siga me vata keya ke vuwadru na Isireli.