¹ A kwa muni o keya vuwadru na leya jisaiveli, e kiya na tamata vutuniyau, e kiya na leya dauniyau, a bilitakiniya ni dau valaveleniya na leya i yau. ² A coviya o keya, a kwa vuwa, 'Na cava ikwe qu varogo vuwako? kwa mai na lemu cakacaka vadauniyau, e dredrei mo dauniyau no.' ³ A qai vanumiya ve yaloga na dauniyau, 'Na cava mequ vaveya nivo kau dai vuwako au na lequ turaga na lequ cakacaka vadauniyau? Qu vo tasi rewajiya na bumajiya na i teitei, qu maduwa na kerekere. ⁴ Aqu vo qai kilajiya na kwa mequ vaveya, meru meiko au ke na tamata ina ledru viwere, niqu vo sivo ina lequ cakacaka vadauniyau.' ⁵ A qai covidru na tamata taucoko ga o rau eru tasi saumiya na ledru i djinau vuwa na leya turaga, a tarogiya o keya a simata mai, e vica na lemu i djinau vuwa na lequ turaga? ⁶ A kwa o keya, e kiya na drau na i varau waiwai. "A kwa vuwa, qulumiya na lemu i vola, no sara i ra, 'volaiya me lima saga vulu.' ⁷ "A qai tarogiya tale e kiya, e vica na lemu i djinau?" "A kwa, e kiya na drau na i varau sila.' A kwa vuwa, 'Qulu na lemu i vola, volaiya me walu saga vulu.' ⁸ Avo dokaiya na dauniyau tasi dodonu na Turaga, balejiya ni varau vavuku. Niru vo vuku valevu ga na i luve ni vuravura na kwa e balejiya, eru vuku valailai ga na i luve ni kakarama. ⁹ Aqu vo kwa vuwako mutou, mutu vaveya e yavalu o wekamutou ina i yau e tasi djina, meru meiko mutou ke ni mutu na mate ina nono e tasi devu rewa. ¹¹ Kodaki mutu vo tasi djina ina i yau e tasi dodonu, o cei e vararavi vuwako mutou ina vuku ni yau evo djina? ¹² Kodaki mutu tasi djina ina i yau e leya e kanikiya, o cei na soliya vuwako mutou na kwa e lemutou? ¹³ E jikai e kiya na tamata e qwara viya rewa e ruwa na turaga, e burajiya e kiya, a lomaniya kei karuwa, e kabijiya e kiya, a beciya e kai karuwa. Mutu tasi rewa ni qwaraviya vata na kalou qeiniya na i yau. ¹⁴ Io na Farisi, eru dau lomaniya na i lavo, niru vo varogo na kwa taucoko ga ikwe, eru varivariva ciya. ¹⁵ A kwa vuwdru o keya, o mutou mutu vo vadoniko mutou ve ru mata na tamata, evo kilajiya mutu yaloga na Kalou. Evo bura sara ve mata na Kalou na kwa e oka sara vuwadru na tamata. ¹⁶ Evo yacovidru na gauna i Joni na i vunau qanedru na parofita. Mai na gauna igi a vunautaki ke na matanitu ni Kalou, aru gu meru unu ke o rau na tamata taucoko ga. ¹⁷ Evo rewarewa ke me takwali ke o lomalagi qeiniya o vuravura, e dredrei me lutu e kiya na jiki ni vunau lailai sara. ¹⁸ O keya yakiya e daniya la yalewa, e lai viwajini tale e kiya tale, e dau yalewa, o keya eru viwajini e dainiya la yalewa, e dau yalewa. ¹⁹ E kiya na tamata vutuniyau, e vai sulu na i sulu lokaloka qeiniya na lineni mata yalai e dau marau valevu i na vi siga taucoko ga. ²⁰ E kiya na tamata dravudravuwa, o Lasarusa e yaca, e lai vadara ina leya mataniwere, e devuciya tu e lala na vidjikoso, ²¹ e okajiya me kaniya na vovo ni cawa e lutu mai na teveli na tamata vutuniyau, e lamuni mai na tui e dramiciya na leya vidjikoso. ²² Avo mate o keya na dravudravuwa, aru qai meiya o rau na agilosi ve saro o Eparama. Avo mate muni o keya na vutuniyau, avo bulu; ²³ avo tu mai Etesi, avo vararawataki tu, avo daniya o Eparama vayawa, qeiniya o Lasarusa ve saro. ²⁴ A coco a kwa, 'I Tamaqu i Aparama, lomaniko au, vatalajiya mai o lasarusa, me toniya mai vejijini lima vena wai, me lamai vadriwadriwa niya qu ma, niqu vo vararawataki vuwa na quto ikwe.' ²⁵ A kwa o Eparama, I luvequ, numiya na lemu rewajiya na lemu vikwa oka ni o si cola no, e kodaki muni ke o Lasarusa na vikwa bura. Nikuwa e qai vacegu o keya, o iko o qai vararawataki. ²⁶ Ikwe evo no muni i na kedu vimama e kiya na i keli loqiloqi sara o rau eru vo la ai i kei vuwako mutou, eru vo tasi rewajiya, o rau eru nokoto mai kei qoi, eru vo tasi la rewa mai vuwako madou. ²⁷ A qai kwa o keya, 'Qu masujiko ke tamaqu, mo vatalajiya i la were na lequ momo, ²⁸ nivo lima madu vitacini, me lai vasalataki nidru, keru la muni mai na vanuwa rarawa ikwe. ' ²⁹ A kwa vuwa o Eparama, evo no vuwadru o Mosese qainidru na parofita, meru varogojidru. ³⁰ "A kwa o keya, E jikai, momo Eparama kodaki e kiya vuwadru e maye me la vuwadru, ru na qai vivutuni.' ³¹ "A qai kwa vuwa o keya, kodaki eru tasi varogo na kwa e kwa o Mosese qeinidru na parofita, eru tasi varorogo, kodaki e tucake e kiya mai na mate."