¹ A ru lamai eru yavalu ina gauna igi aru kwa, niru jiya kwai Kalili vuwa, a vadave niya vata na kedru dra o Pailato qeiniya na ledru i soro. ² A tata o Jisu, a kwa vuwadru, mutu vakasamataki niru oka taucoko na kwai Kalili ina i varau bura o rau na kwai Kalili iqoi, evo cava yaji vuwadru na vikwa iqoi? ³ Aqu kwa vuwako mutou, e jikai kodaki mutu tasi vivutuni, mutu na mate taucoko ga ke. ⁴ O rau na jini ka walu, a reba cidru na were levu mai Sailoama, a vamate nidru, mutu vakasamataki niya niru oka ina cola vuwadru taucoko ga na tamata eru no mai Jerusalemi? ⁵ Aqu kwa vuwako mutou, E jikai. Kodaki mutu tasi vivivutuni, mutu na mate taucoko ga ke. ⁷ A qai kwa vuwa na i vatawa ni vaini, daniya, e qai yabaki tolu aqu vo lamai mequ vadaniya vuwa na lolo iqoi, qu tasi daniya; musukiya; eva buraniya ga ina vanuwa i na vuku ni cava? ⁸ A qai tata o keya, a kwa vuwa, o mutou na turaga, deiniya ga re ka yabaki muni ikwe, mequ carajiya wavoki ga re, mequ deiniya ke na ta ni manumanu. ⁹ Ke qai vuwa, kodaki e jikai, mutu qai mai musukiya bale. ¹⁰ A vavuvuli no o keya i na kiya na were ni lotu i na siga ni vavacegu. ¹¹ Daniya, e kiya na lewa e unu viya e kiya na malumalumu ke na yabaki jini kawalu, avo va kalakala no ga, e tasi tu dodonu rewa sara. ¹² Avo daniya o Jisu, a coviya, a kwa vuwa, yalewa, o vo sereki mai ina lemu malumalumu. ¹³ A taba kiya ve lima a va dodonu takiniya va sauri ke, a varokoroko taki niya ke na kalou. ¹⁴ A qai tata ocaoca na turaga ni were ni lotu, nivo vai na vivacolai o Jisu i na siga ni vavacegu. ¹⁵ A tata vuwa na Turaga, a kwa, na dau vi vakwaisini, mutu tasi serekiya o mutou yakiya, na leya bulumakau qeiniya na leya asa ina siga ni vavacegu mai na leya vanuwa, me meiya me vasomiya? ¹⁶ Na lewa ikwe, o luveya o Eparama a vesukiya o setani, daniya e jini kawalu na yabaki, e tasi dodonu me sere mai ina i vesu ikwe mai na siga ni vavacegu? ¹⁷ Ni vo kwa na tata o keya ikwe, eru vo maduwa taucoko ga na leya meca, eru vo marau taucoko na lewe levu i na vuku ni kwa e vaidjina ga e vaveya o keya. ¹⁸ A qai kwa o keya, eru na tautauvata qaneya na cava na matanitu ni Kalou? se cava mequ va tautauvata taki niya? ¹⁹ E tautauvata qaneya e kiya na wiri ni mosita, e kau e kiya na tamata, e lai dainiya ina leya i teitei, e tubu i yata, a yaco me kai levu, eru mai ro ke e katula na manumanu vuka. ²⁰ A kwa tale o keya, mequ va tautauvata takiniya i na cava na matanitu ni Kalou? ²¹ E tautauvata qaneya na leveni, e meiya e kiya na lewa e cilo niya i na yaloga ni madrai droka e tolu na i varau, me va leveni taki taucoko ke. ²² A la vali o keya i na virara qeiniya na vi rara yalai, a vavuvuli ke, a la sara tu i Jerusalemi. ²³ A qai kwa ve kiya, o mutou na Turaga, eru vo lailai na cola? a kwa vuwadru o keya, ²⁴ Mutu gumaikali sara me mutu unu i na matamata ni rara e lailai, ni quvo kwa vuwako mutou, eru levu eru na tasi rewajiya. ²⁵ Nivo tu nai taukei ni were, a sogojiya na matani were, du vo no i rara, du tukituki i mata ni were, mo kwa o mutou na turaga, mutou na turaga, mutu dolaviya mai vuwako madou, e qai kwa o keya, a kwa vuwako mutou aqu tasi kilajiya mutu lamai vai. Mutu qai kwa, o madou madu kana madu somu ve mu mata, o dau vavuvuli tale ga ina vi calevu. ²⁷ E qai kwa o keya, aqu vo kwa vuwako mutou, aqu tasi kilajiya mutu lamai vai mutu ladai vuwako au, o mutou taucoko ga na dau vaveya na i varau bura. ²⁸ Mutu na dau tagi ka vaquruquru baji, ni mutu na daniya o Eparama, qeiniya o Aisake, qeiniya o Jekope, qeinidru taucoko ga na parofita, ina matanitu ni Kalou, o mutou mutu vo lai rovi i rara. ²⁹ Eru na lamai o rau i na tui cake, mai ra muni, mai na tokalau muni, qeiniya mai na ceva, aru vo no ra na matanitu ni Kalou. ³⁰ Daniya, eru yavalu eru bere eru na qai simata; eru yavalu eru simata eru na bere ³¹ Na siga igi aru lamai e yavalu na Farisi, a kwa vuwa, mo lai taudaku, mo ladai ikei evo vamate niko o Eroti. ³² A kwa vuwadru o keya, mutu lai kwa vuwa na fokise igi, daniya, aqu vo rovidru na nitu, a vai na vivacolai nikuwa qeiniya na qwataqwata, qu na vadevuniya ga ina i katolu ni siga. ³³ E dodonu ga mequ layaji ni kuwa, qeiniya na qwataqwata, qeiniya na bogi ruwa; nivo dredrei me mate e kiya na parofita ina rara kanikiya, mai Jerusalemi ga. ³⁴ Isa Jerusalemi, Isa Jerusalemi, o iko o va mate nidru na parofita, a va viri kidru i na vatu a ru lai vatala vuwako e levu na siga a qu mata va soqoni jidru ke ora o luvemu, me kodaki eva soqonijiya na to yalewa ve ruku ni kakava, ia mutu vo tasi okajiya. ³⁵ Daniya, a qai dai tu vuwako mutou na lemutu were e lala tu, aqu vo kwa vaidjina vuwako mutou. Mutu na tasi daniko au tale, maluwa me cava mai re na siga mutu na kwa ke, eva kalougata o keya e lamai ina yaca ni Turaga.