¹ Ia nivo layaji o keya, eya tolaviya e kiya na tamata a sucu mataboko. ² Aru tarogiya o rau na leya jisaiveli aru kwa, ''Vavuvuli, o cei vuwadru ikwe e valavala bura, o kiya ikwe se o leya momo qaneya la nene, vuni leya sucu mataboko o keya?'' ³ A kwaya o Jisu, e jikai ni valavala bura o kiya ikwe, se o tamaya qaneya la nene, me vadjinadjina taki ga vuwa na cakacaka ni Kalou e vuku. ⁴ E dodonu medu na vaveya na leya cakacaka o keya a vatalajiko au mai, ni si siga no, evo voleka muni mai na bogi, ena jikai na tamata me cakacaka rewa ke. ⁵ Niqu vo nokoto no i vuravura qu vo jiya kakarama i vuravura. ⁶ Nivo tata no kodaki ikwe o keya, a katasivi jiya na qwele, a uliya vata na dada vata na qwele, a borojiya ke e mata na tamata mataboko. ⁷ A kwa vuwa, ''Mo layaji lai draliya mu mata na vanuwa ni sisisli o Sailoama'' ( na keya i balebale, evo lavele). Avo layaji me draliya, a lesu mai avo tola rewa. ⁸ Aru qai vikwa yakiniya vuwadru na lewe ni rara, qaneya o rau na dautolaviya i mata na daukerekere, tasiniya ga o keya ikwe a daukerekere? ⁹ Aru kwa eru yavalu, o keya ga ikwe, eso tale, e jikai, ia e kodaki ga o keya, A kwa o keya, o au ga. ¹⁰ Eru qai kwa vuwa, ''Evo tola rewa vacava mu mata?'' ¹¹ A kwaya o keya, ''Na tamata e vatokai o Jisu, a uliya na dada, a borojiya vequ mata, a kwaya vuwako au, 'layaji i na vanuwa ni sisili i Sailoama,' Mo draliya mu mata, ia aqu lai draliya qu mata qu rewa ni tola tale. ¹² Eru qai kwaya vuwa, ''I vei o keya?'' A kwaya o keya, ''Aqu jikai ni kilajiya.'' ¹³ A qai meiya o keya na mataboko tu i mata vuwadru na Farisi. ¹⁴ Ia vo jiya siga ni vacecegu eya uliya ke o Jisu na dada, qai basukiya e mata. ¹⁵ Eru qai tarogiya tale na Farisi, se avo tola rewa vacava. A kwa vuwadru o keya, ''A borojiya qu mata na dada, Aqu lai draliya qu qai tola rewa.'' ¹⁶ E yavalu vuwadru na Farisi eru qai kwaya, ''Na tamata ikwe e tasi jiya tamata ni Kalou, ni vatabuniya na siga ni vacececgu.'' Eso tale eru kwa, ''E vaveya vacava na cakacaka mana ikwe e kiya na tamata valavala bura?'' Aru jikai ni yalo vata. ¹⁷ Eru kwa vuwa tale na tamata mataboko, ''E cava o kwaya ke o keya niya basukiya mu mata?'' A kwa o keya vuwadru, e parofita o keya.'' ¹⁸ Ia o rau na kwai Jutiya eru jikai ni vabaujiya, niya mataboko tu i mata o keya, avo tola rewa, aru lai coviya mai la momo qaneya na leya nene o keya avo tola rewa. ¹⁹ Aru vo tarogidru, aru kwa, O luvemuru ikwe, muru vo kwaya niya sucu mataboko? ²⁰ E a qai tola rewa vacava o keya? ²¹ Eru qai tata qaneya la momo qaneya la nene, aru kwa, maru kilajiya nio luvemaru ikwe e ya sucu mataboko. ²² Ia maru jikai ni kilajiya e tola rewa vacava, se o cei a basukiya e mata, maru tasi kilajiya, evo jiya tamata colo o keya tarogiya ga ena kwaya vuwako mutou. Eru tata kodaki ikwe o rau na leya momo qaneya la nene, niru vo matakucidru na kwai Jutiya, niru qai yalo vata na kwai Jutiya meru vatabui mai na were ni lotu o keya yakiya e tusanaki niya nijiya Karisito o keya ikwe. ²³ Na kwa ikwe eru kwa ke o leya momo qaneya la nene, evo jiya tamata colo o keya tarogiya ga. ²⁴ Eru qai coviya tale na tamata mataboko, aru kwaya vuwa, varokorokotaki niya na Kalou, madu kilajiya na tamata valavala bura o keya iqoi. ²⁵ A qai tata o keya, a kwa, aqu jikai ni kilajiya, se jiya tamata i valavala bura o keya se jikai.E kiya ga na kwa qu kilajiya niqu a mataboko i mata, aqu qai tola rewa. ²⁶ ru qai kwaya tale vuwa, Na cava eya vaveya vuwako o keya? E basukiya vacava mu mata? ²⁷ A kwa vuwadru o keya, aqu vo kwaya wale vuwako mutou ikwe, ia mutu tasi varorogo! mutu mata varogo tale i na vuku ni cava? mutu vo okajiya no mo mutu jiya leya jisaiveli? ²⁸ Eru qai varivariva ciya aru kwa, O iko muni na leya jisaiveli, ia o madou la jisaiveli o Mosese. ²⁹ Madu kilajiya ga niya tata na Kalou vo Mosese, ia na tamata ikwe, madu jikai ni kilajiya e lamai i vai o keya. ³⁰ A tata o keya na tamata a kwa vuwadru, ''E qai kiya na kwa vivakurabuitaki ikwe, ni mutu vo jikai ni kilajiya e lamai i vai o keya, ia eya basukiya qu mata o keya. ³¹ E du vo jikai ni rogociya na Kalou na tamata valavala bura, ia kodaki e dau lotu vuwa na Kalou e kiya na tamata, me vaveya leya lewa e rogociya o keya ikwe o keya. ³² E jikai ni rogo mai na i vatekivu ni vuravura ni kiya e basukiya ni kiya e sucu mataboko. ³³ Kodaki e jikai ni lamai vuwa na Kalou na tamata ikwe e na jikai ni rewajiya e kiya na kwa. ³⁴ Evo tata eru kwa vuwa, o iko ga re o wa sucu mai i na valavala bura ia ovo vavuliciko madou? A ru qai vatabuniya. ³⁵ A qai rogociya o Jisu niru vatabuniya, ia nivo daniya o keya , a kwa vuwa, o vabaujiya na luve ni Kalou? ³⁶ A tata o keya, ''O cei o keya na Turaga mequ vabaujiya?'' ³⁷ A qai kwa vuwa o Jisu, ovo tolaviya devu, ia o kiya ga ikwe muru vo vitataki vata. ³⁸ A tata o keya a kwa, O cei o keya, ''Turaga mequ vabaujiya. ³⁹ A vo kwa o Jisu, aqu vo lamai ikwe i vuravura mequ lewaiya, meru tola rewa o rau na jikai ni tola rewa, ia meru mataboko o rau na tola rewa. ⁴⁰ O rau na Farisi eru nokoto no i keigi eru rogociya na vikwa ikwe, eru kwa vuwa, madu vo mataboko muni o madou? ⁴¹ A kwa vuwadru o Jisu, kodaki mutu vo mataboko, e jikai ni lemutu cala ia mutu qai kwa, madu vo tola, o kiya ikwe evo nokoto ga ke lemutu cala.