1
Ia avo layaji o Jisu i na uluni yataga ni violive.
2
Ia ena qwata lailai avo lesu tale yaji i na werenisoro, aru vo layaji vuwa na tamata taucoko ga, avo no qanedru me vavulicidru.
3
O rau na vunivola qanedru na Farisi eru meiya mai vuwa e kiya na yalewa e laidani ni dauteigwane vaveya no.
4
Aru kwa vuwa vavuvuli, e lai tolavi ni yalewa ikwe e dauteigwane e vaveya no.
5
Evo kwa vuwako o datou o Mosese i na i vunau, meru lai vadava i na vatu o rau na kodaki ikwe, ia na cava o vo kwa?
6
Eru vo kwakwa kodaki ikwe meru vorajiya ke, meru beitakiniya rewa ke. Ia avo cuva bale o Jisu, eya volaiya na dada ve jiji ni lima.
7
Ia eru vo vuki vatarogiya no ga, a tucake o keya, a kwa vuwadru, ''O kiya vuwako mutou e jikai ni valavala ca, me virikiya i mata na vatu.
8
Avo cuva bale tale o keya, a volaiya na dada.
9
Ia niru vo rogociya, eru vo unu yakiya i rara, teimata na qase ru qai bere yaji na tamata, a no takiya ga o Jisu, avo no ga na lewa ve mata.
10
Nivo tucake o Jisu, avo jikai ni daniya e kiya, na lewa takiyaga, a kwa vuwa, lewa ivei o rau iqoi? E jikai ni kiya e lewaiko mo lai ocaji?
11
Avo kwa o keya. E jikai ni kiya, Turaga, a kwa vuwako o Jisu. Aqu vo jikai ni lewa iko mo lai ocati, mo layati mo kuwa ni vaburabura tale.
12
A qai kwa tale vuwadru o Jisu, o yau na kakarama i vuravura o keya e teku cikoyau ena jikai ni yato ina gilogilo, ena no tuga vuwa na kakarama ni cola.
13
O rau na Farisi aru qai kwa vuwa, ovo tukuniko, evo jikai ni djina na lemu i tukutuku.
14
Avo tata o Jisu kwa vuwadru, ''Ia kodaki qu tukuniko au, e djina na lequ i tukutuku, niqu vo kilajiya no na vanuwa qu lamai ke, qu layaji ke, ia mutu jikai ni kilajiya se qu lamai va, se qu la noke.
15
Mutu vo lewaiya me kodaki nakwa e lai dani, aqu jikai ni lewaiya e kiya na tamata.
16
Ia kodaki aqu lewaiya, evo djina na lequ lewa, niqu tasi no takiya no, ia o au qaneya o Tamaqu, o keya eya vatalajiko au mai.
17
E volai muni na lemutu vunau, ni djina na i tukutuku ni tamata e lewe ruwa.
18
E kiya o au aqu vo tukuniko au, avo tukuniko au o Tamaqu, o keya eya vatalajiko au mai.
19
Eru qai kwa vuwa, ''I vai o Tamamu? A kwaya o Jisu, ''Mutu vo jikai ni kilajiko au seo Tamaqu, kodaki mutu kilajiko au, mutu na qai kilajiya o Tamaqu.''
20
A cavujiya na tata ikwe o Jisu i na were ni yau, niya vai vuli no i na werenisoro, e jikai ni kiya e qulumiya, ni sibere ni yaco na leya gauna.
21
A qai kwa tale vuwadru o keya, ''Aqu vo layaji, ia mutu na dau vadaniko au, ia mutu na mate i na lemutu i valavala bura. Ia na vanuwa qu layaji ke, mutu na jikai ni la rewa ke.''
22
Eru qai kwa na kwai Jutiya, '' Ena vamateniya ga vainiya o keya? Nivo kwa, Na vanuwa qu na lake, mutu na jikai nirewa ni lake?''
23
A kwa vuwadru o keya, ''Mutu vo lama i ra, aqu a lamai yata, mutu vo vavuravura, aqu vo jikai ni vavuravura.
24
O kiya ikwe, qu vo kwa ke vuwako mutou, Mutu na mate i na lemutu i valavala bura, kodaki ni mutu jikai ni vadjina jiya ni o au, mutu na mate i na lemutu i valavala bura.
25
Eru qai kwa vuwa, ''O cei o iko?'' A kwa vuwadru o Jisu, o keya ga qu vo tukuniya vuwako mutou mai na i vatekivu.
26
Evo levu na kwa mequ tatataki niya mequ lewaiko mutou ke, ia e djina o keya e vatalajiko au mai, ia aqu vo kwa vuwadru na kwai vuravura na vikwa aqu rogociya mai vuwa.
27
Eru jikai ni kilajiya nivo tata o Tamaya vuwadru o keya.
28
A qai kwa vuwadru o Jisu, ''Ni mutu a lavejiya cake oji na i luve ni tamata, mutu na qai kilajiya niyo au ga, niqu jikai ni vaveya e kiya na kwa me niko au ga, ia na vikwa ga e vavuliciko au ke o Tamaqu, o keya igi qu vo tata takiniya ke.
29
Ia e no qaneko au no o keya a vatalajiko au mai, e jikai ni biujiko au o Tamqu mequ no takiya ga, niqu vaveya no ga na kwa e okajiya me qu vaveya vuwa.
30
Ni cavujiya no na tata ikwe o keya, eru vo lewe levu eru vabaujiya.
31
A qai kwa vuwadru o Jisu na kwai Jutiya eru vabaujiya, kodaki mutu vatekuciya no na lequ tata, mutu na qai lequ jisaiveli djina.
32
Ia ni mutu na kilajiya na kwa djina, ia na kwa djina ena qai serekiko mutou.
33
Eru qai kwa vuwa, oi o madou na leya kawa o Epaarama, e jikai ni kiya madu bobula ke i na kiya gauna, avo kwa vacava, mutu na sereki?
34
A qai kwa vuwadru o Jisu, ''E djina, e djina aqu vo kwa vuwako mutou, o kiya yakiya e valavala bura evo bobula i na valavala bura.
35
Evo jikai ni no vakiya ga i na were na bobula, o luveya ga e no vakiya.
36
Ia kodaki ena serekiko mutou la i luve, mutu na qai sereki djina ke.
37
Aqu vo kilajiya ni mutu leya kawa o Eparaama, ia mutu vo vamate niko au, ni jikai ni nokoto no mutu yaloga na lequ tata.
38
A qu vo kwa na vikwa aqu wa tolaviya, aqu vo tolaviya vo Tamaqu ia mutu vo vaveya na vikwa mutu vo rogociya mai vo keya na tamamutou.
39
Eru vo tata, aru kwa vuwa, ''Na tamamadou o Eparaama.'' A kwa vuwadru o Jisu, kodaki mutu jiya la i luve o Eparaama mutu na tekuciya leya i valavala o Eparaama.
40
Ia mutu vo mata vamateniko au, na tamata e kwa vuwako mutou na kwa djina, o keya aqu a varogo mai vuwa na Kalou. e jikai ni vaveya na kwa kodaki ikwe o Eparaama.
41
Mutu vo vaveya o tamamutou, eru qai kwa vuwa, madu vo tasi sucu ina dauyalewa, e kiya ga o Tamamadou na Kalou.
42
A qai kwa vuwadru o Jisu, kodaki e tamamutou na Kalou, mutu na lomaniko au, niqu a tubu mai vuwa na Kalou, aqu a lamai vuwa, aqu a jikai ni laga mai vainiko au ga, ia vo niya ga eya vatajiko au mai.
43
E cava mutu jikai ni kilajiya ke na lequ tata? ni mutu vo tasi vabaujiya rewa na lequ tata.
44
O tamamutou na nitu, ia mutu mata vaveya na leya gagano bura o tamamutou. O keya na dauvivamatei mai na i vatekivu, a jikai ni vabaujiya na kwa djina, ni jikai ga vuwa na kwa djina.N i dau kwa ga na kwa e giritaki, e dau kwa ga na kwa e nokoto no vuwa, ni dau girigiri o keya, na kwa vuni ikwe.
45
Ia o au, i na vuku ni qu vo tukuniya vuwako mutou na kwa djina, mutu vo jikai ni vadjina jiko au.
46
O cei vuwako mutou e vadjinadjina takiniya ni qu cala? Ia kodaki aqu kwa na kwa djina, mutu jikai ni vadjina jiko au i na vuku ni cava?
47
O keya e leya na Kalou ena rogociya na leya tata na Kalou, ikwe mutu vo jikai ni varorogo ni mutu jikai ni leya na Kalou.
48
Eru qai tata na kwai Jutiya, aru kwa vuwa, evo jikai li ni ko madou madu kwajina, niyo jiya kwai Samariya, niya unuviko e kiya na nitu?
49
A kwa o Jisu, e tasi unuviko au e kiya na nitu, ia aqu na varokoroko takiniya ga o Tamaqu, ia mutu vo varivariva ciko au.
50
Ia aqu tasi vadaniya mequ varokoroko taki, e kiya e vadaniya e lewaiya muni.
51
E djina, e djina, aqu vo kwa vuwako mutou, kodaki e kiya e vabaujiya no ga na lequ tata, e na jikai ni rewa ni mate.
52
Eru qai kwa vuwa na kwai Jutiya, madu qai kilajiya djina niya unuviko e kiya na nitu. Avo maye o Eparaama vata o rau na parofita, ia ovo kwaya, kodaki e kiya e vabaujiya no ga na lequ tata, e na jikai ni rewa ni mate.
53
Ovo levu cake, mara vo lailai bale o Eparaama o tamamutou, o keya avo mate? aru vo mate muni o rau na parofita, ovo kwakwa me niko o cei?
54
A kwaya o Jisu, ''Kodaki aqu varokoroko taki niko au, e kwa wale na lequ vivarokorokotaki, ia o keya o Tamaqu e varokoroko jiko au, o keya mutu kwa me lemutu Kalou.
55
Ia mutu jikai ga re ni kilajiya, ia aqu kilajiya no o au, ia kodaki qu kwa, aqu jikai ni kilajiya, aqu vo girigiri muni me kodaki o mutou, ia aqu vabaujiya no ga mequ kilajiya na leya tata.
56
A okajiya valevu saraga o tamamutou o Eparaama meya tolaya na lequ gauna, a tolaviya ena qai marau.''
57
Eru qai kwa vuwa na kwai Jutiya, e jikai ni lima sagavulu na lemu yabaki, ia o bau tolaviya o Eparaama?
58
A kwa vuwadru o Jisu, Edjina. e djina, aqu vo kwa vuwako mutou, ni sibere ni sucu o Eparaama, aqu vo cola tu.
59
Eru qai tomikiya e yavalu na vatu, meru vavirikiya ia a cilomaki niya o Jisu, a unuyaji ina were ni soro