¹ Ni vo devu na vikwa ikwe, avo layaji i Kalili o Jisu, avo tasi mata layaji i Jutiya balejiya niru okajiya no meru vamateniya na kwai Jutiya. ² Avo voleka na ledru soqoni levu na kwai Jutiya, na solevu ni were vacevaceva. ³ Aru qai kwaya vuwa la tacini, ''Ladai ikei, mo layaji i Jutiya, meru tolaviya muni o rau na lemu jisaiveli na lemu cakacaka. ⁴ Nivo jikai ni kiya e okajiya me kilai, mo vaveya no na vikwa ikwe, vatakeko yaji vuwadru na kwai vuravura.'' ⁵ Eru jikai ni vabaujiya na leya tacini. ⁶ A qai kwaya vuwadru o Jisu, ''E sibere ni yaco mai na lequ gauna, ia na lemutu gauna e vu tautauvata ga na gauna ikwe. ⁷ Eru jikai ni burajiko au ga, niqu varaitaki niya na keya bura na ledru i varau. ⁸ Mutu lacake i na solevu ikwe, ni qu sibere ni lacake i na solevu ikwe, ni sibere ni yaco mai na lequ gauna. ⁹ Ia ni vo tata devu vuwadru, a nokoto no ga i Kalili. ¹⁰ Ia niru vo lacake na leya i tacini, a qai lacake muni o keya i na solevu, e jikai ni vatakiya e cilo no ga . ¹¹ E ru qai vadaniya na kwai Jutiya i na solevu, aru kwa, E nokoto no i vai o keya? ¹² A ru vo tata takiniya lo valevu o rau na tamata, eru kwa eso, ''E tamata oka o keya.'' Eru kwa eru yavalu, ''E Jikai, e lawaki jidru no na tamata.'' ¹³ E jikai ni kiya e kwaya vuwa vadodonu vuwa na kwa, niru vo matakuciya o rau na kwai Jutiya. ¹⁴ Ia ina vimama ni gauna ni solevu, avo lacake o Jisu i na werenisoro me lai vavuvulijidru. ¹⁵ Aru kurabuitaki niya na kwai Jutiya, aru kwa, ''E kilajiya vacava na i vola na tamata ikwe? Ni jikai ni vavulici ga re.'' ¹⁶ A qai tata vuwadru o Jisu a kwa, ''E jikai ni lequ i vavuvuli, e leya ga o keya a vatalajiko au mai.'' ¹⁷ kodaki e kiya okajiya me vaveya e yaloga o keya, e na kilajiya e lamai vuwa na Kalou na i vavuvuli, se aqu kwa no ga o au. ¹⁸ O keya e kwaya vainiya ga, e okajiya me dokai, ia o keya e okajiya me dokai o keya e vatalajiya no mai, e djina, evo jikai vuwa na cala ¹⁹ A jikai ni soliya vuwako mutou o Mosese na i vunau, e jikai ni kiya vuwako mutou me tekuciya na i vunau? Mutu vo mata vamateniko au ina vuku ni cava? ²⁰ Eru qai kwaya vuwa o rau na tamata, ''Bara unuviko mai e kiya na nitu, O cei e mata vamateniko?'' ²¹ A kwaya vuwadru o Jisu, ''E kiya ga na cakacaka aqu vo vaveya, ia mutu vo kurabui taucoko ke. ²² Avo soliya vuwako mutou o Mosese na cilivi (ia eya jikai ni vavuniya o Mosese eya vu ga mai vo rau na qase), ia mutu vo cilivi ina siga ni vacecegu. ²³ Kodaki e cilivi na tamata na siga ni vacecegu me kuwa ni basuki na leya lawa o Mosese, mutu vo ocajiko au balejiya ni qu vacolaniya na tamata i na siga ni vacecegu? ²⁴ Kuwa ni lewaiya me kodaki na kwa e lai dani cece, mutu lewaiya oka ga.'' ²⁵ A qai kwaya vuwadru mai Jeruisalemi, Tasiniya ga ikwe o keya eru mata vamateniya? ²⁶ Ia tolaviya, e tata doudou, aru vo jikai ni kwa vuwa e kiya nakwa. ²⁷ E ru vo kilajiya djina na Turaga nivo niya na Karisito djina se jikai? Ia na tamata ikwe edu kilajiya oka na vanuwa e lamai ke, evo jikai ni kiya e kilajiya na vanuwa e lamai ke o keya. ²⁸ A qai coco o Jisu niya vaivuli no i na werenisoro, a kwaya ''Mutu kilajiya na vanuwa qu lamai ke ia aqu jikai ni laga mai vainiko auga, ia e djina o keya a vatalajiko au mai, ia mutu jikai ni kilajiya. ²⁹ Ia aqu kilajiya o au niqu lamai vuwa, eya vatalajiko au mai, o keya.'' ³⁰ Eru vo mata qulumiya ia e jikai kiya e qulumiya rewa, ni sibere ni yaco mai leya gauna. ³¹ Ia eru lewe levu na tamata eru vabaujiya na leya tata eru kwaya, Ni vo lamai na Karisito, ena vaveya na cakacaka mana e levu cake mai vilewa ikwe e vaveya o keya ikwe?'' ³² O rau na Farisi eru rogociya ni vo tata takiniya lo kodaki ikwe o rau na lewe levu, ia o rau na Farisi qanedru na bete levu eru vatalajidru eru yavalu na ovisa meru vesukiya. ³³ A qai kwaya vuwadru o Jisu, ''Aqu na no qaneko mutou ga valailai, aqu na qai layaji vuwa o keya vatalajiko au mai. ³⁴ Mutu na vadaniko au ia mutu na tasi na daniko au, ia na vanuwa qu nokoto no ke, mutu na tasi daniko au, ia na vanuwa aqu no ke, mutu na jikai ni rewa ni layaji ke.'' ³⁵ Aru vikwa yakiniya na kwai Jutiya, E na lai vai o keya medru jikai daniya rewa? mara na layaji vuwadru na dauviyatoyaki vuwadru na kwai Kirisi, me vavulicidru na kwai Kirisi? ³⁶ Na tata cava re ikwe e kwaya o keya, Mutu na daniko au, mutu na tasi daniko au, ia na vanuwa aqu nokoto no ke, mutu na jikai ni rewa ni layaji ke?'' ³⁷ I na visiga mai bere, o keya e levu i na solevu, avo tu o Jisu a coco, a kwaya, ''E kiya e mata somu me lamai vuwako au me somu. ³⁸ O keya e vabaujiko au, me kodaki e kwaya na i Vola Tabu, ena roro bale mai e kete na vimata ni wai ni colo. ³⁹ Ia na vikwa e tatatakiniya o keya, a vo niya egina na Yalo Tabu, o keya ena yaco vuwadru na vabaujiya, ni sibere ni soli na Yalo Tabu, ni sibere ni varokorokotaki o Jisu. ⁴⁰ Eru lewe levu vuwadru na tamata niru vo rogociya na tata ikwe, ''E ru vo kwa ikwe, ''E djina vo niya ikwe na parovita o keya. ⁴¹ Aru kwa na yavalu tale, o keya ikwe na Karisito, ia eru kwa eru yavalu oi, ''Ena lamai iKalili na Karisito? ⁴² Evo jikai ni kwa na i Vola Tabu ni lamai na Karisito na leya kwa o Tevita, mai Peceliema, na rara e nokoto ke o Tevita? ⁴³ Aru vo vicoqacoqa qaneya na lewe levu. ⁴⁴ Aru vo qulumiya e yavalu na tamata, ia e jikai ni kiya e dereiya rewa. ⁴⁵ Eru qai lamai na ovisa vuwadru na bete levu qanedru na Farisi, aru kwa vuwadru, ''Mutu vo tasi meiya mai ina vuku ni cava?'' ⁴⁶ Aru kwa o rau na ovisa, e jikai ni kiya na tamata me tata kodaki na tamata ikwe. ⁴⁷ Eru qai kwa na Farisi vuwadru, "Mutu vo vacalai muni o mutou? ⁴⁸ Mutu vo vabaujiya e kiya vuwadru na turaga se vuwadru na Farisi, se jikai? ⁴⁹ Ia eru vo rusa na tamata ikwe ru vo tasi kilajiya na i vunau. ⁵⁰ A kwa vuwadru o Nikotimo, o keya a lamai i mata e vo kiya vuwadru. ⁵¹ ''Mara mata ocajiya na tamata na ledu vanuwa, nivo jikai ni rogociya re i mata, me kilajiya nakwa e vaveya. ⁵² Eru vo kwa vuwa, o iko muni na kwai i Kalili, mo vadaniya mo kilajiya ni vo jikai ni kiya na parovita e tubu mai Kalili. ⁵³ Aru vo dui layaji i na leya were.