1
Ni vo devu na vi kwa i kwe, a qai la o Jisu e kiya na tavo ni wasawasa i Kalili, i Taiperia.
2
Eru levu sara e ru tekuciya, e ru daniya na vi kwa mana e vaveya o keya vuwadru na tauvi mate.
3
A vo cabe jiya na yataga o Jisu, a no mai ke qei nidru na leya tisaiveli.
4
A vo voleka na kana vata ni lako siviya a ru dau vaveya na kwai Jiutia.
5
Me qai mata cake o Jisu, e vo daniya ni ru levu sara e ru la mai vuwa, a kwa o Filipi.
6
Du voliya mai vai na madrai, meru kana ke o rau o kwe?E kwa na kwa i kwe me tovoli vuwa; e vo kila jiya o keya na kwa e kilajiya.
7
A kwa vuwa o Filipi, e tasi rau jidru na madrai e voli i na pene e ruwa na drau, meru yakiya va yalai ga.
8
E kiya vuwadru na leya tisaiveli, o Adriu, la tacini o Saimoni Pita, a kwa vuwa
9
E nokoto i kei e kiya na i luve teigwane e no vuwa e lima na i buli madrai parile, e ruwa na ika; e yaga va cava i kwe vuwadru na lewe levu i kwe?
10
A kwa o Jisu, kwa vuwadru na tamata meru no. A vo levu na mau na vanuwa igi.
11
A ru no bale na tamata e ru bara lima na udolu. A qulu miya na i buli madrai o Jisu,
12
A va okaoka, a votaiya vuwadru na tisaiveli, o rau na tisaiveli, vuwadru na no bale; e kodaki muni ke na ika me raujidru.Ni ru vo bori, a kwa o keya vuwadru na leya tisaiveli, koro niya vata e jiki yalai e vo, me kuwa ni lavele e kiya na kwa.
13
A ru qai lugiya vata, a ru va vuqa niya na sova e jini ruwa e jiki yalai na madrai parile e lima, e vo vuwadru na kana.
14
O rau na tamata niru vo daniya na cakacaka mana e vaveya o J isu, e ru kwa, o keya djina i kwe na parofita igi e dodonu me la mai vuravura.
15
Ni vo kila jiya o Jisu e ru naki jiya me la mai me qulumiya va kaikai meru buliya me tui, a la takiya tale i na ulu-ni-yataga.
16
Ni vo yavi mai, a ru vo la bale o rau na leya tisaiveli i matacawa,
17
A vodo i na waqa, a la viya na wasawasa i Kepanaumi. A vo gilogilo mai na vanuwa, a tasi cava vuwadru o Jisu.
18
A vo tubu mai na wai balejiya ni vo liwa na cagi.
19
Ni ru vo voce yaji e tolu na maile ka va caca, e ru vo doniya o Jisu e vo la mai i na yaloga ni wai, a taroviya na waqa; a ru vo mataku.
20
A kwa vuwadru o keya, o au i kwe; kuwa ni mataku.
21
E ru qai oka jiya me vodo i waqa o keya; a qai vuki vasuri na waqa na vanuwa me ru la ke.
22
E kiya na qwata, o rau na vuqa tu a ru vo no e kiya e tavo na ruwai, ni ru vo daniya e vo jikai mai kei gi e kani kiya na velovelo, o keya ga a ru vodo kiya na tisaivele, o Jisu, o rau na leya tisaiveli a ru soko yaji vai nidru ga;
23
[ni ru vo la mai e yavalu na velovelo mai Taiperia, e voleka i na vanuwa a ru kana madrai ke, a vo va okaoka devu na Turaga:]
24
Ni ru vo daniya na lewe levu ni vo tasi no mai kei gi o Jisu, se o rau na leya tisaiveli, a ru vodo muni i na waqa, a la yaji i Kepanaumi, me vadaniya o Jisu.
25
Ni ru vo daniya ina wai igi, aru kwa vuwa, vavuvuli, o la mai i kei ni gica?
26
A tata vuwadru o Jisu, a kwa, E djina, e djina, aqu vo kwa vuwako mutou, mutu tasi vada niko au ni mutu daniya na vi kwa mana, ni mutu kaniya ga na i buli madraim a mutu bori ke.
27
Mutu kuwa ni wale me me kemutou na cawa e vo devu rewa, io me kemuuutou ga na cawa e no tu i na cola tawa mudu, o keya e na soliya vuwako mutou na luve ni tamata: o keya a va djinadjinataki niya na kalou o Tamaya.
28
A ru kwa vuwa, na cava me madu va veya, medu vaveya na cakacaka e oka vuwa na Kalou?
29
A tata o Jisu a kwa vuwadru, o keya i kwe na cakacaka e oka vuwa na Kalou me mutu vabaujiya a vatala jiya mai o keya.
30
Aru qai kwa vuwa na cava nai va djinadjina o vaveya, me madu daniya me madu vabaujiko?
31
na ledu qase eru kaniya na mana i na vikai; e kodaki ni vo volai, a vo soliya vuwadru o keya na madrai mai lomalagi meru kaniya.
32
A qai kwa vuwadru o Jisu, E djina e djina, qu kwa vuwako mutou, e jikai o Mosese a soliya vuwako mutou na madrai mai lomalagi, o Tamaqu ga a soliya vuwako mutou na madrai djina mai lomalagi.
33
O keya ikwe na madrai mai vuwa na Kalou, o keya a la bale mai lomalagi, a soliya na cola vuwadru na kwai vuravura.
34
Aru qai kwa vuwa, o mutou na Turaga soliya no ga mai vuwako madou na madrai iqoi.
35
A kwa vuwadru o Jisu, o au na madrai ni cola, o keya e la mai vuwako au, e tasi mata kana, o keya e vabaujiko au, e tasi mata somu tale.
36
Aqu kwa vuwako mutou, mutu tolaviko au, a mutu tasi vabaujiya.
37
O rau taucoko ga a soliya mai o Tamaqu e ru na la mai vuwako au, o keya e na la mai vuwako au, qu na tasi deiniya dai.
38
Ni qu tasi la bale mai lomalagi mequ vaveya qu yalo, mequ vaveya ga e yalo o keya a vatala jiko au mai.
39
O keya ikwe e yaloga o keya a vatala jiko au mai,
40
mequ kuwa ni valavele niya e kiya vuwadru a soliya mai vuwako au o keya, mequ va tu niya cake tale i na siga mai bere
41
A ru qai vele gudrugudrutaki nita o rau na kwai Jutia, a kwa, o au na madrai a la bale mai lomalagi.
42
A ru kwa, e tasi niya o Jisu o keya I kwe, o luveya o josefa, o tamaya qei niya la nene edu kila jiya, a qai kwa va cava mai o keya, a qu la bale mai lomalagi.
43
A tata o Jisu a kwa vuwadru, mutu kuwa ni vele gudrugudru.
44
E tasi la rewa mai vuwako au e kiya na tamata, kodaki e tasi va yarayarataki nita o Tamaqu a vatala jiko au mai, qu na va tu niya cake tale I na siga mai bere.
45
A voliya na parofita, e na va vuli cidru taucoko ga na Kalou. a ru vo la mai ke voko au o rau yakiya e ru varogo vuwa o Tamaqu, a vi vavulici.
46
E tasi daniya o Tamaqu e kiya na tamata, o keya takiya ga e la mai vuwa na Kalou, e daniya.
47
E djina,e djina, qu vo kwa vuwako mutou o keya e vabaujiko au e rewa jiya na cola tawa mudu.
48
O au na madrai ni cola.
49
A ru kaniya na mana mai na vikai o rau na ledu qase, a ru mate ga.
50
O keya I kwe na madrai, a la bale mai lomalagi, Meri kaniya na tamata e ru tasi mate.
51
O au na madrai ni cola a la bale mai lomalagi, kodaki e kiya e kaniya na madrai I kwe e na cola me tawa mudu, qu na soliya me cola ke o rau na kwai vuravura.
52
A ru qai vileji vai nidru na kwai Jutia, a ru kwa, e soliya rewa va cava na tamata I kwe e lewe medu kaniya.
53
A qai kwa vuwadru o Jisu, "E djina, e djina, a qu vo kwa vuwako mutou, kodaki mutu tasi kaniya e lewe na luve ni tamata se somiya e dra, e jikai vuwako mutou na cola.
54
O keya e kaniya qu lewe, se so iya qu dra, e rewa jiya na cola tawa mudu, qu na va tu cake niya I na siga mai bere.
55
Ni jiya cawa djina qu lewe, a jiya kwa ni somu djina qu dra.
56
O keya e kaniya qu lewe, se somiya qu dra, e no voko au, o au muni qu mo vuwa.
57
E kodaki e cola no o tamaqu a vatala jiko au mai, a qu cola muni e vuku o Tamaqu, e kodaki muni ke o keya e kaniko au, e na cola balejiko au.
58
O keya I kwe na madrai a la bale mai lomalagi e tasi tautauvata na mana a ru kaniya na lemutu qase, a ru mate ga,o keya e kaniya na madrai I kwe, e cola me tawa mudu.
59
A tataki niya na vi kwa I kwe o keya I na vi were ni lotu, no vo va vulicidru mai Kepanaumi.
60
E ru levu vuwadru na leya tisaiveli ni ru varogo e ru kwa, na tata dredrei I kwe, o cei e vabau jiya rewa?
61
Ni vo kila jiya o Jisu e yaloga, a ru vele gudrugudru o rau na leya tisaiveli I na kwa I kwe, a kwa vuwadru, e va tarabe niko mutou na kwa I kwe
62
E na kodaki I vai kodaki mutu daniya na luve ni tamata e la cake I na vanuwa a no ke I mata.
63
Na yalo e soliya na cola, e lewe e tasi yaga, na tata z qu kwa vuwako mutou e va yalo, e vuni cola.
64
E yavalu vuwako mutou e tasi vabau jiya. E kila jidru mai nai va tekivu o Jisu e ru tasi va baujiya B qei niya e soliya yaji.
65
A kwa, o keya I kwe qu kwa ke vuwako mutou, e jikai e kiya na tamata e la rewa mai vuwako au, kodaki e tasi soliya rewa vuwa o Tamaqu.
66
Na kwa I kwe e ru sula dei ke e ru levu vuwadru na leya tisaiveli, a ru vo tasi la vata qaneya.
67
A qai kwa o Jisu vuwadru na lewe jini karuwa, mutu vo mata dei muni o mutou?
68
A qai kwa vuwa o Saimoni Pita, o mutou na Turaga, madu na la vo cei? e no ga vuwako mutou na tata ni cola tawa mudu.
69
madu vo vabau jiya madu kila jiya, O mutou na Karisito, na luve ni Kalou cola.
70
A kwa vuwadru o Jisu, a qu tasidjigitaki niko mutou na lewe jini karuwa, io e kiya vuwako mutou la I to na nitu?
71
A tataki jiya o Jiutasa Isikarioti, o luveya o Saimono, o keya I kwe e na soliya yaji a kiya na jini karuwa o keya.