¹ Ia i na i matai ni siga ni wiki, a lamai ve qwata lailai o Meri na lewa ni Makitala, ni si gilogilo tu i na bulubulu, a tolaviya nivo kaudai mai na vatu i na bulubulu. ² A drusa yaji o keya vuwadru o Saimoni Pita qanedru o rau na jisaiveli, o rau a dau lomanidru o Jisu, a kwaya vuwadru, ''Eru vo meiya dai mai na Turaga i na bulubulu, ia madu vo jikai ni kilajiya na vanuwa eru vo lai vadaro niya ke. ³ Eru qai layaji o Pita qaneya e kiya tale na jisaiveli, aru layaji i na i bulubulu. ⁴ Eru wavu yaji ruwaruwa, a sivijiya o Pita na jisaiveli igina, a teimata yaji i na i bulubulu. ⁵ A kaere bale o keya ni tola yaji i yaloga, a tolaviya na vivivi sulu lineni eru koro vata no, ia a jikai ni unu o keya. ⁶ A qai bere yaji o Saimoni Pita, a unu i yaloga ni bulubulu, a tolaviya na vivivi sulu lineni ni koro vata no, ⁷ qaneya na i tavoi a vivi no ke e ulu,ia eru jikai ni biu vata no na i sulu lineni, e lobi takiya no ga a biu dai no i na kiya tale na tavo. ⁸ A jiunu muni yaji o keya tale vuwadru na jisaiveli, o keya a teimata i na i bulubulu, a tolaviya o keya eya qai vadjinjiya. ⁹ O rau eru jikai ni kilajiya na i Vola Tabu, e dodonu me tu cake tale mai na mate o keya. ¹⁰ O rau na jisaiveli eru qai ladai tale i na ledru were. ¹¹ Ia a vo tu o Meri i daku ni bulubulu, a qai tagi ia nivo tagi no, a cuva no a tola yaji i yaloga ni bulubulu. ¹² A tolaviya e ruwa na agilosi eru vaisulu bucobuco, eru nokoto no, e kiya ve ulu, ekiya tale ve la, i na vanuwa a va daro ke e yago o Jisu. ¹³ Eru qai kwaya vuwa, ''Lewa, na cava o tagicaki niya no?'' A qai kwaya vuwadru o keya, ''Balejiya niru meiya dai na lequ Turaga, ia aqu jiaki ni kilajiya na vanuwa cava ru la vadaroniya ke.'' ¹⁴ A qai tat kodaki ikwe, a vuki yalobo, a tolaviya o Jisu ni vo tu cake, ia a jikai ga ni kilajiya ni o Jisu. ¹⁵ A qai kwaya vuwa o Jisu, ''Lewa, na cava o tagicaki niya? O cei o vo vadaniya? A vo numiya o keya ni jiya i vatawa ni were, a kwaya vuwa, Kodaki o vo meiya dai, kwaya saka mai na vanuwa o lai vadaro niya ke, mequ na qai meiya dai.'' ¹⁶ A qai kwaya o Jisu, ''I Meri a vuki yaji no keya, o kwaya vuwa ''Raponai'' (na keya i balebale, ''Vavuvuli'') ¹⁷ A qai kwaya vuwa o Jisu kuwa ni dereiko au, niqu sibere ni lacake vo Tamaqu, ia mo layaji vuwadru o wekam, kwaya vuwadru, Aqu si lacake re vo Tamaqu, o Tamamutou muni, vuwa na lequ Kalou, e lemutu Kalou. ¹⁸ Avo layaji o Meri na lewa ni Makitala, a kwaya vuwadru na jisaiveli niya tolaviya na Turaga, niya kwaya vuwa na vikwa ikwe o keya. ¹⁹ Ina siga igina, i na i matai ni siga ni wiki, ni vo yaviyavi mai, avo sogo tu na mata ni were eru vo soqoni vata ke o rau na jisaiveli, niru vo matakucidru na kwai Jutiya, a unu mai o Jisu a notu na kedru maliwa, a kwaya vuwadru, ''Mutu Vacegu.'' ²⁰ Ia nivo tata kodaki ikwe, a vatakiya vuwadru e lima qaneya e sanisani. Aru qai marau na jisaiveli niru tolaviya na Turaga. ²¹ A qai kwaya tale vuwadru o Jisu, ''Mutu vacegu. me kodaki niya vatalajiko au mai o Tamaqu, aqu vo vatalajiko mutou muni.'' ²² Nivo tata devu kodaki ikwe o keya, a ceguvidru, a kwaya, Me unuviko mutou na Yalo Tabu. ²³ Na i valavala bura ni tamata yakiya mutu vo bokociya,ena bokoci, na i valavala bura ni tamata yakiya mutu tasi serekiya, ena jikai ni sereki, ²⁴ E kiya vuwadru na lewe jinikaruwa, o Tomasi, e vatokai me o Titimo, a tasi vata qanedru no na gauna a lamai ke o Jisu. ²⁵ O keya eru qai kwaya ke vuwa o rau na jisaiveli, ''Madu a tolaviya na Turaga.'' A kwaya vuwadru o keya, ''Kodaki qu tasi tolaviya na mawe ni vako ve lima, mequ dereiya vequ lima e sanisani, aqu na tasi vadjina jiya.'' ²⁶ Oji e bogi walu, aru nokoto no i yaloga ni were o rau na leya jisaiveli, o rau vata o Tomasi. A unu yaji o Jisu, eya sogo tu na mata ni were, a tu cake tu na kedru vimama, a kwaya, ''Mutu vacegu.'' ²⁷ A qai kwaya vuwa o Tomasi o keya, ''Dodokiya mai mu jiji ni lima, mo tolaviya qu lima. Ia dodokiya mai mu lima mo dereiya qu sanisani.ia mo kuwa ni vajijiqa, mo vadjina jiya ga.'' ²⁸ A qai kwaya o Tomasi vuwa, ''Lequ Turaga, na lequ Kalou.'' ²⁹ A qai kwaya vuwa o Jisu, ''Ni kodaki o vo tolaviko au, Tomasi, ovo vadjina jiya, eru kalougata o rau eru tasi tolaviya, eru vadjina jiya ga. ³⁰ E levu muni na cakacaka vivakurabuitaki a vaveya djina o Jisu eru mata na leya jisaiveli, eru jikai ni volai i na i vola ikwe, ³¹ ia evo volai ikwe me mutu vadjina jiya nivo Karisito o Jisu, na i luve ni Kalou, ia mo mutu rewajiya na cola e vuku e yaca, ni mutu vo vabaujiya.