¹ Nivo devu na vikwa ikwe, a vatakeya tale o Jisu vuwadru na leya jisaiveli mai na ruwai o Taiperiya, ia e varaitaki niya kodaki ikwe. ² Eru nokoto vata no o Saimoni Pita, vata o Tomasi eya vatokai o Titimo, vata o Nacanieli na kwai Kena i Kalili, qaneya o rau lai luve o Sepete, eru lewe ruwa talena leya jisaiveli. ³ A kwaya vuwadru o Saimoni Pita, ''Aqu na lai qoli.'' Eru qai kwaya vuwa, ''Madu na la qaneko. Eru vo layaji, ru vodo sara vena waqa, a tasi rewa mai e kiya na kwa ena bogi igina. ⁴ Ia nivo qwata mai, avo nokoto no mai matacawa o Jisu, ia aru jikai ni kilajiya o rau na jisaiveli nio Jisu. ⁵ A qai kwaya vuwadru o Jisu, ''Railuve, e no kiya vuwako mutou na cawa, se jikai? Eru kwaya vuwa, E jikai.'' ⁶ A kwaya vuwadru o keya, ''Mutu viritaki niya na lawa i na i matau ni waqa, me mutu rewa ni rewajiya ke.'' Eru qai viritaki niya ke, aru jikai ni yaviya rewa, nivo levu sara na ika. ⁷ Na kwa ikwe a kwaya ke vuwa o Pita na jisaiveli igina a lomaniya o Jisu, ''Na Turaga ga ikwe.'' Ni rogociya o Saimoni Pita ni o keya ga ikwe na Turaga,a vasulujiya o keya na leya i unuunu vagonedau, (nivo luvawale), eya rido yaji i waitaci. ⁸ Ia o rau na vo jisaiveli, eru layaji i na waqa lailai,(e jikai ni yawa mai vanuwa, me kodaki ga e katu limasagavulu), aru yarakiya na lawa evo vuqa ke na ika. ⁹ Niru vo vila yaji i vanuwa, eru tolaviya ni vu vitaki tu na quto, e mudre tu, na ika vo notu ke vata na madrai. ¹⁰ A kwaya vuwadru o Jisu, ''Kau mai vuwako au e yavalu na ika mutu rewajiya mai.'' ¹¹ A lacake yaji o Saimoni Pita, a yaviya mai na lawa i vanuwa, evo vuqa na ika kwa yalevu, e kiya na drau limasagavulu ka tolu, ia nivo levu kodaki ikwe, e jikai ni kwabasu na lawa. ¹² A kwaya vuwadru o Jisu, '' Mutu lamai medu somu ji.'' Ia e jikai ni kiya vuwadru na jisaiveli me doudou me tarogiya o Jisu, '' O cei o keya?'' ni ru vo kilajiya nio keya na Turaga. ¹³ A qai lamai o Jisu, a qulumiya na madrai, vata na ika, a soliya vuwadru. ¹⁴ Ikwe vo jiya katolu ni gauna me varaitaki niya ke o Jisu vuwadru na leya i jisaiveli, nivo tucake tale mai na mate o keya. ¹⁵ Ni vo devu na ledru somu ji, a kwaya vuwa o Saimoni Pita o Jisu, ''Saimoni, la i luve o Jona, ovo lomaniko au valevu, e valailai ga o rau ikwe, se jikai?'' A kwaya o Pita vuwa, '' Io Turaga, o vo kilajiya oka niqu lomaniko muru, A kwaya vuwa o keya, ''Vakana nidru na lequ lami.'' ¹⁶ A kwaya tale varuwa vuwa, ''Saimoni la i luve o Jona, o lomaniko au se jikai? A kwaya vuwa o keya, Io na Turaga, o vo kilajiya niqu lomaniko. A kwaya vuwa o Jisu, ''vatawanidru na lequ sipi.'' ¹⁷ A kwaya vatolu vuwa, Saimoni la i luve o Jona, o lomaniko au se jikai? E rarawa e yaloga o Pita e kwaya vatolu vuwa o keya, ''O vo lomaniko au se jikai?'' A kwaya vuwa, Turaga o kilajiya oka na kwa taucoko, o vo kilajiya niqu lomaniko. A kwaya vuwa o Jisu vakana nidru na lequ sivi. ¹⁸ E djina e djina aqu kwaya vuwako, Nio jiya i luve, o dau vesukiko, o yato vavitaliya tu, ia ni na yaco mo qase mai, o na dodokiya mu lima, ena meiko dai e kanikiya tale, ena meiko dai e kiya na vanuwa o na jikai ni okajiya. ¹⁹ Ia vo tata kodaki ikwe o keya me vatakeya ke vuwadru na mate e na varokorokotaki niya ke o keya na Kalou. Ni vo tata devu kodaki ikwe o keya, a kwaya vuwa, ''Tekuciko au mai.'' ²⁰ Eya qai vuki o Pita, o tolaviya na jisaiveli a dau lomaniya o Jisu niya tekucidru, o keya a dau vararavi muni vuwa e vuni yaloga i na i vayakavi, a kwaya, ''Turaga, o cei re e na soliko yaji? ²¹ Ni vo tolaviya o keya o Pita, a kwaya vo Jisu, ''Turaga, na cava ena vaveya na tamata ikwe?'' ²² A kwaya vuwa o Jisu, ''Kodaki qu okajiya me na cola no ga me yacoviya na siga qu lesu mai ke, e cava vuwako? tekuciko au mai.'' ²³ A rogo yaji vuwadru na lewenivanuwa na leya tata, ni na jikai ni mate na jisaiveli igina. Ia e tasi kwaya vuwa o Jisu, ena tasi mate o keya, a kwaya, ''Kodaki equ okajiya me cola no ga o keya me yacoviya na siga qu na lesu tale mai ke, ena kwa ni cava i vuwako?'' ²⁴ O kiya ikwe na jisaiveli a kwa na vikwa ikwe, a volaiya na na vikwa ikwe, ia edu vo kilajiya ni djina na leya i tukutuku. ²⁵ E levu muni na vikwa kanikiya eya vaveya o Jisu, ia kodaki e volai taucoko tu, aqu vakasamataki niya ni na oso o vuravura i na vola e volaiya tu.