¹ Avo tata takiniya na tata ikwe o Jisu, a tola cake i lomalagi, I Tamaqu, avo yaco mai na gauna, varokorokotaki niya lemu i luve, me rewa ni varokoroko takiniko muni lemu i luve. ² Me kodaki niyo soliya vuwa me lewaiya vuwadru na tamata taucoko ga, me soliya o keya vuwadru na cola tawa mudu, vuwadru yakiya o soliya vuwa. ³ Ia o kiya ga ikwe na cola tawa mudu, ⁴ Meru kilajiko muru niyo jiya Kalou djina takiya ga, qaneya o Jisu Karisito o keya o vatalajiya mai. ⁵ A qu a dauvarokoroko takiniko mutou i vuravura, niqu na vaoji niya na cakacaka ovo soliya vuwako au mequ vaveya. ⁶ Aqu vo vatakiya mu yaca vuwadru na tamata o soliya mai vuwako au i vuravura ikwe, eru vo lemu, ia ovo solidru mai vuwako au, aru vo mamakutu i na lemu tata. ⁷ Eru vo qai kilajiya nivo taka ga mai vuwako muru nakwa taucoko ga ovo soliya mai vuwako au, ⁸ niqu vo soliya vuwadru na tata ovo soliya mai vuwako au, aru vo vabaujiya, eru kilajiya muni niqu a la djina mai vuwako. ⁹ Aqu a masulakinidru, Aqu a tasi a masulaki niya o vuravura. o rau ga ovo solidru mai vuwako au, niru vo wili me lemu. ¹⁰ Avo lemu na lequ vikwa taucoko ga, e lemu muni na vikwa taucoko ga, ia aqu vo varokorokotaki eru vuku. ¹¹ Ia aqu na tasi nokoto i vuravura, ia o rau ikwe eru noko no i vuravura, ia o au aqu na layaji vuwako muru. Na tamata na yalo dodonu, maroroijidru i na vuku mu yaca, o rau ovo soliya mai vuwako au, meru kiya ga me kodaki o daru. ¹² Niqu no qanedru vata no i vuravura, aqu a daumamaroroi jidru e vuku mu yaca, o rau o wa solidru mai vuwako au qu a maroroijidru, e jikai ni kiya vuwadru e lavele mai, o keya ga e dodonu me rusa, me vayacori djina ke na i vola tabu. ¹³ Aqu vo layaji vuwako muru, ia na vikwa ikwe aqu vo tata takiniya i vuravura, me levu ke na ledru marau qu vu ga. ¹⁴ Aqu vo soliya vuwadru na lequ tata, ia aru vo burajidru o vuravura, niru jikai ni vavuravura no, me kodaki ga niqu jikai ni vavuravura no. ¹⁵ Aqu jikai ni masulaki nidru mo meidru dai i vuravura, mo maroroi jidru ga mai vuwa na vuni ca. ¹⁶ Eru vo jikai ni vavuravura no, me kodaki muni niqu tasi vavuravura no. ¹⁷ Vatabu nidru i na lemu i vavuvuli djina. E kwadjina taucoko na lemu tata. ¹⁸ Me kodaki na lemu vatalajiko au mai i vuravura, aqu vo vatalajidru yaji i vuravura. ¹⁹ Ia aqu vo vatabui niko au eru vuku, meru vatabui muni i na i vavuvuli djina. ²⁰ Ia aqu jikai ni masu wale me balejidru o rau ikwe, eru vuku muni na vabaujiko au i na vuku ni ledru tata. ²¹ Meru kiya taucoko ga, Ni kodaki ga ni daru kiya vata ga, Tamaqu meru kiya ga vata qaneniko daru, me rewa ni vadjina jiya o vuravura nio a vatalajiko au mai. ²² Ia na varokoroko owa soliya mai vuwako au, aqu a soliya vuwadru, meru kiya vata ga me kodaki ni daru kiya vata ga. ²³ Mequ no vata qeinidru, mo tu ravi jiko au no, meru na vayacori sara meru kiya vata ga ia meru kilajiya ke o vuravura niyo vatalajiko au mai, niyo lomanidru me tautauvata ga na lemu lomaniko au. ²⁴ Ia Tamaqu, aqu vo okajiya meru no qaneko au muni, qaneko au na vanuwa qu nokoto no ke aru vo soliya mai vuwako au, me ru tolaviya na lequ i ukuuku owa soliya mai vuwako au ni sibere ni tauyavu taki na vuravura. ²⁵ I Tamaqu na Yalo dodonu eru jikai ni kilajiko muni o rau i vuravura. ²⁶ Ia aqu a varaitakiniya vuwadru mu yaca, ia qu na varaitaki niya vuwadru, me no vuwadru na loloma ovo lomaniko au ke, mequ no qanedru muni.