¹ Aqu tatatakiniya na vikwa ikwe vuwako mutou mo mutu kuwa ni vataucabe. Eru na vatabuniya vuwako mutou na viwerenilotu. ² Ia ena yaco mai na gauna eru na numiya o rau na mata vamateniko mutou ni ru qwaraviya no Kalou. ³ Ia na vikwa ikwe eru vo vaveya vuwako mutou niru vo tasi kilajiya o Tamaqu se o au. ⁴ Ia na vikwa ikwe qu na kwa vuwako mutou nivo yaco mai keya gauna, mutu na vanumiya ke niqu kwa vuwako mutou. Niqu a jikai ni kwa i mata vuwako mutou, balejiya ga niqu a nokoto vata qaneko mutou. ⁵ Ia ikwe qu vo na layaji vuwa o keya a vatalajiko au mai, ia e jikai ni kiya e tarogiko au, 'I vai o lake?' ⁶ Ia niqu vo kwa vuwako mutou na vikwa ikwe, e luluvu valevu mutu yaloga. ⁷ Ia aqu na kwa vaidjina vuwako mutou, ena oka vuwako mutou kodaki mequ na ladai yaji. kodaki aqu na jikai ni ladai yaji, na daunivivacegui ena jikai ni lamai vuwako mutou, ia kodaki mequ na ladai, Aqu na vatalajiya mai vuwako mutou. ⁸ Ena lamai o keya, na daunivivacegui ena varaitakiniya i vuravura balejiya na valavala bura, qaneya na valavala dodonu, vata na lewa, ⁹ nai valavala bura, balejiya eru jikai ni vabaujiko au, ¹⁰ qaneya na kwa dodonu, niqu na layaji vo Tamaqu, mutu na jikai ni daniko au tale, ¹¹ vata na lewa, ni na lewaia na turaga ni vuravura ikwe. ¹² E levu sara na kwa mequ na kwa vuwako mutou, ia mutu na jikai ni rewajiya nikuwa. ¹³ Ia nina lamai na Yalo Tabu na vuni kwadjina, ena tuberiko mutou ina vikwa e djina, ena jikai ni kwakwa vainiya ga. Ia ena kwa ga na kwa e rogo, ena kwa muni vuwako mutou na vikwa e sibere ni yaco. ¹⁴ Ena varokorokotaki niko au o keya, ni na kau no na lequ ena kwa muni vuwako mutou. ¹⁵ Na vikwa taucoko e leya o Tamaqu e lequ. Na kwa ikwe aqu vo kwa ke, nina kau o keya na lequ, ena varaitakiniya vuwako mutou. ¹⁶ E vo valailai ga mutu na jikai tolaviko au, ia ena valailai ga mutu na tolaviko tale, niqu na layaji vo Tamaqu. ¹⁷ E yavalu na leya jisaiveli eru kwa vainidru, "Na cava la vuni kwa ke, E na valailai ga mutu na jikai ni daniko au ia ena valailai tale mutu na daniko au, balejiya niqu na lacake vo Tamaqu?" ¹⁸ Na vikwa ikwe, eru na kwa ke, Na cava ikwe e kwa no, Ena kiya na gauna lekaleka? Madu jikai ni kilajiya na cava e kwa no. ¹⁹ E kilajiya o Jisu niru mata tarogiya no, a qai kwa vuwadru, "Mutu vo vitarogi takiniya na vikwa aqu kwa, Evo valailai ga mutu na jikai ni tolaviko au, ena vo tale valailai mutu na tolaviko au tale? ²⁰ E djina, e djina, aqu vo kwa vuwako mutou, mutu na tagi tagi ina domo levu, ia o vuravura ena marau. Ena rarawa, mutu yaloga, ena vuki me reki. ²¹ Nina vasucu na lewa ena rarawa, nivo yaco mai la siga, ia nivo sucu nai luve, ena jikai nina numiya tale na leya rarawa balejiya na leya marau nivo sucu mai e kiya na tamata i vuravura. ²² Ia evo rarawa mutu yaloga, ia aqu vo tolaviko mutou tale, e marau mutu yaloga, ena jikai ni kiya ena kau dai na lemutu marau. ²³ Ina siga igi mutu na jikai ni tarogiko au e kiya na kwa. E djina, e djina, aqu vo kwa vuwako mutou, mutu na kereviya e kiya na kwa vo Tamaqu vequ yaca, ena soliya vuwako mutou. ²⁴ Mutu wa jikai ni kereviya e kiya nakwa iqu yaca, mutu kerekere mutu na rewajiya me levu sara ke na lemutu marau. ²⁵ Aqu wa kwa vuwako mutou ina tata vatautauvata, ia ena yaco na gauna aqu na jikai ni kwa tale vuwako mutou na tata vatautauvata, ia aqu varaitakiniya me macala vuwako mutou na vikwa e leya o Tamaqu. ²⁶ Na siga igi mutu na kerekere e vuku qu yaca ia e tasi yaga mequ tukuniya vuwako mutou niqu na masujiya o Tamaqu me balejiko mutou, ²⁷ nivo lomaniko mutou o Tamaqu, ni mutu vo lomaniko au mutu vo vadjina jiya niqu vo lamai vuwa o Tamaqu. ²⁸ Aqu lamai vo Tamaqu, mequ layaji i vuravura. aqu vo biubiu tale i vuravura mequ layaji vo Tamaqu. ²⁹ Aru kwa vuwa o rau na leya jisaiveli, tolaviya, ovo qai tata vamatata, o jikai ni tata takiniya na tata vatautauvata. ³⁰ Madu vo kilajiya niyo kilajiya na kwa taucoko, e tasi yaga ve kiya me tarogiko e kiya na taro, na kwa madu vo vadjina jiya ke niyo ladjina mai vuwa na Kalou. ³¹ A kwa vuwadru o Jisu, "Mutu vo qai vabaujiya? ³² Tolaviya, vo yaco mai na gauna, io, evo yaco mai, mutu na visebayaki, na tamata yakiya ina leya vikala werewere, mutu na dainiko au takiya no. Ia aqu na jikai ni no takiya no, maru no vata no o Tamaqu. ³³ Na vikwa ikwe qu vo kwa ke mo mutu rewajiya na vacegu iqu vuku. Mutu na sota qeya i vuravura na rarawa, ia mutu vacegu no aqu vo vamalumalumu takiniya devu o vuravura.