¹ E vo e ono na bogi me qai vai na kana vata ni lako siviya, a qai la mai o Jisu I Pecani, e nokoto ke o Lasarusa, a mate i mata o keya a va tu ni tale mai na mate. ² A ru vaveya ke na keya i vai yavi! a qwara viya o Marica! e kiya vuwadru e kana qaneya o Lasarusa. ³ A qai kau mai o Meri e kiya na paudi waiwai talei sara, na naira djina, a walicia ke e la o Jisu, a quwalaki niya ve rau ni ulu! e devu ciya na yaloga ni were na leya i garu ni waiwai. ⁴ A qai kwa vuwadru e kiya la tisaiveli, o Jutasa Isikarioti, o keya a soliya yaji. ⁵ Na cava e tasi volitaki ke na waiwai kwe i na pene e tolu na drau, se me soli vuwadru na dravudravua? ⁶ Ni tasi numidru ke na dravudravua, a tata ke kodaki kwe o keya! e vuku ga na dau driva, a qulu na Tata i lavo, a kau na kwa e dau dai ke. ⁷ A qai kwa o Jisu, daniya ga a maroroi jiya na kwa ikwe o keya, i na siga qu na bulu ke. ⁸ A qai no vakiya qaneko mutou na dravudravua o au, qu tasi no vakiya qaneko mutou. ⁹ levu sara na kwai Jutia, niru kila jiya ni no mai ke o keya, a ru vo lamai, e jikai e vuku ga o Jisu, Meri daniya o Lasarusa tale ga,o keya a va tu niya mai na mate o keya. ¹⁰ O rau na bete levu e ru bose vata meru va mate niya muni o Lasarusa ! ¹¹ ni ru vo levu na kwai Jutia e ru la yaji e vuku, a vabau jiya o Jisu. ¹² Ni vo qwata e vo levu sara e ru la mai i na kana vata, ni ru vo varogo ni vo la mai Jerusalemi o Jisu, ¹³ aru kau na rau ni niu, aru vo la yaji meru sota qaneya, a ru kula vaki nita, Osana e vo kalougata na ledru Tui na Isireli, o keya a la mai na yaca ni Turaga. ¹⁴ Io o Jisu, e vo daniya e kiya e kiya na luve ni asa a vodo kiya! e kodaki ni vo volai. ¹⁵ O mutou na no mai Saioni, kuwa ni mataku daniya, e vo la mai na lemutu tui, e vodo tu mai na luve ni asa. ¹⁶ Na kwa, ikwe e ru tasi kila jiya re na leya tisaiveli! a vo varokorokotaki devu o Jisu, a ru qai numiya ni vo volai o keya ina vi kwa ikwe, a ru vaveya vuwa na vi kwa ikwe. ¹⁷ O rau na lewe levu a ru no qaneya ni lai covi o Lasarusa mai na i bulubulu, a va tu niya tale mai na mate, a ru kwa. ¹⁸ Na vuku ni kwa ikwe a ru sota muni ke na lewe levu, niru varogo ni vaveya na kwa mana o keya. ¹⁹ O rau na Farisi aru qai kwa vai nidru, mutu vo kila jiya ni mutu tasi rewa jiya e kiya na kwa? daniya, e ru vo tekuciya na kwai vuravura taucoko ga. ²¹ O rau ikwe a ru la mai vo Filipi, e kwai Peciseita i Kalili, a tarogiya a kwa, madu mata daniya o Jisu, saka. ²² Avo la o Filipi, a kwa vuwa o Adriu o rau o Adriu qei niya o Filipi, a ru kwa vo Jisu. ²³ tata vuwadru o jisu, a kwa, e vo cava mai na gauna me varokorokotaki ke na luve ni tamata. ²⁴ E djina, e djina, a qu vo kwa vuwako mutou, kodaki e tasi mate na vuwa ni sila ni vo lutu i na qwele e na takiya ga! kodaki e mate, e vuwa va levu. ²⁵ O keya e lomaniya la cola,e na lavele! o keya e bura jiya la cola I na vuravura I kwe e na maroroi jiya I na cola tawa mudu. ²⁶ Kodaki a qwara viko au e kiya, me tekuciya au ga! na vanuwa qu no ke, e na no muni ke o keya e qwara voko au! kodaki e qwara voko au e kiya, e va varokorokotaki niya o Tamaqu. ²⁷ E qai vutu qu yalo!na cava mequ kwa? I Tamaqu, va cola niko au mai na gauna ikwe! na kwa I kwe qu na la mai ke i na gauna ikwe. ²⁸ I Tamaqu, varokorokotaki mu yaca. A qai rogo mai e kiya na tata mai lomalagi, a qu vo varokorokotaki niya, qu na varokorokotaki niya tale. ²⁹ O rau na lewe levu a ru nokoto a ru varogo, aru kwa e kurukuru! aru kwa e yavalu tale, e kiya na agilosi e tata vuwa. ³⁰ A tata o Jisu a kwa, e tasi la mai na i tukutuku i kwe bale jiko au, bale jiko mutou ga. ³¹ A ru qai lewai na kwai vura vura ikwe! a qai dai i rara na turaga ni vuravura ikwe. ³² Ni vo laveji mai vuravura qu na qai va yarayarataki, na tamata taucoko vuwako au. ³³ Ni vo tatataki niya na kwa ikwe o keya, me vata keya na mate a mate ke o keya. ³⁴ Ru kwa vuwa na lewe levu, Madu varogo mai na i vunau ni no vakiya na Karisito! o kwa va cava, e na lave cake na luve ni tamata? o cei na luve ni tamata ikwe? ³⁵ A qai kwa vuwadru o Jisu, e no va lailai vuwako mutou na kakarama! ³⁶ Mutu la ni vo no vuwako mutou na kakarama, ke la mai vuwako mutou na gilogilo! e tasi kilajiya evo lai vei. ³⁷ E djina ga a vaveya o keya ve ru mata e levu na vi kwa mana, a ru tasi vabau jiya ga! me vai ke na kwa a kwa o Aisea na parofita, a kwa, ³⁸ I Jiova o cei e vabau jiya na lemadu i tukutuku? a vata kei vuwa o cei o Jisu? ³⁹ Na kwa I kwe eru tasi vabau jiya rewa! ni vo kwa tale o Aisea. ⁴⁰ A vo va matabokotaki nita e ru mata, a va kaikaitaki nita e ru yalo o keya! me kuwa ni tola eru mata se meru kila jiya eru yalo, meri saumaki mai, mequ va cola nidru. ⁴¹ vo kwa na kwa I kwe o Aisea, ni vo daniya na leya serau, a tokoniya. ⁴² A ru levu vuwadru muni na Turaga e ru vabau jiya, io e ru vuku na Farisi, e ru tasi kwa ke ni ru va tabu nidru mai were ni lotu, ⁴³ Ni ru oka jiya va levu me va rokorokotaki nidru o rau na tamata, me va lailai ga na ledru varokorokotaki niya na Kalou. ⁴⁴ A qai coco o Jisu, a kwa o keya e vabau jiko au, e tasi vabau jiko ga e vabau jiya tale ga o keya e vatala ji,o au mai! ⁴⁵ o keya e daniko au, e daniya muni o keya e vatala jiko au mai. ⁴⁶ Aqu vo lamai I vuravura mequ keya kakarama, me kuwa ni no i na gilogilo o keya e vabaujiko au. ⁴⁷ Kodaki e kiya e varogo na lequ tata, e tasi qai vabaujiya, aqu vo tasi lewaiya niqu tasi lamai mequ lewaidru na kwai vuravura, mequ vacola nidru ga na kwai vuravura. ⁴⁸ E kiya evo lewaiya evo deiniko au, e tasi vabaujiya na lequ tata, na i tukutuku qu vo tata takiniya, o keya ikwe e lewaiya ina siga mai bere. ⁴⁹ Ni qu tasi tata vai niko au, O Tamaqu a vatalajiko au mai, a varojiko au na kwa mequ kwa qeiniya na kwa mequ tukuniya. ⁵⁰ Io qu vo kilajiya nivo vuni cola tawa mudu na leya i varo, o keya ga, na kwa taucoko ga qu tata takiniya me kodaki na kwa e kwa vuwako au o Tamaqu.