¹ O Saula e kwa na tata ni oca qeiniya na vivamate vuwadru na lotu vuwa na Turaga, a la vuwa na bete levu, ² a tarogiya vuwa nai vola i Tamasiko qeiniya na viwere ni lotu, kodaki e daniya o keya e yavalu eru tekuciya nai varau igi, eru jiya teigwane se ru jiya lewa, me vesu kiya me kau i Jerusalemi. ³ Ni vo latu, a vo voleka i Tamasiko; a mudre wavokijiya vasauri e kiya na kakarama mai lomalagi, ⁴ a reba bale ina qwele, a varogo e kiya na domo e kwa vuwa, "I Saula i Saula, ovo vabura niko au ina vuku ni cava?" ⁵ A kwa o keya o cei o iko, na Turaga? "A kwa o keya, O au o Jisu," o keya o vaburaburataki niya. ⁶ A saqanini o keya a karaciya, a kwa, o mutou na Turaga na cava o okajiya mequ vaveya? a kwa vuwa na Turaga, cavu tu, mo lai rara, ena lai kwai vuwako na kwa e dodonu mo vaveya . ⁷ O rau na tamata aru lavata eru no tu ga eru vayavalu tu ga; eru varogo ga na domo, eru tasi daniya e kiya. ⁹ E bogi tolu e tasi tola rewa, e tasi kana se somu. ¹⁰ E kiya na tisaiveli mai Tamasiko, o Ananai as e yaca; a kwa vuwa na Turaga na leya tola yadra, "I Ananaiasa. A kwa o keya, daniya, o au Turaga. ¹¹ A kwa vuwa na Turaga, notu mo la ina calevu e yaca o dodonu, tarogiya na kwai Tarisu, o Saula e yaca, i la were o Jiutasa; io daniya, e masu o keya. ¹² E daniya ina leya tola e kiya na tamata, o Ananaiasa e yaca, e unu mai, e tavaniya ve lima me tola rewa o keya." ¹³ A qai kwa o Ananaiasa, o mutou na Turaga, eru levu qu varogo ke nai tukutuku ni tamata iqoi, na levu ni bura e vaveya vuwadru na lemu tamata yalo savasava mai Jerusalemi. ¹⁴ Ikei ga a vo lesiya ke o rau na bete levu me vesu ke na tamata taucoko ga e ru masu jiya mu yaca. ¹⁵ A kwa vuwa na Turaga, "Mo la ga; o keya Ikwe na tamata djigitaki vuwako au, me kau qu yaca veru mata na vi matanitu kani kiya, qeinidru e yavalu na tui qeinidru nai luve ni Isireli: ¹⁶ no qu na vatakeya vuwa na levu ni kwa e na voso jiya balejiya qu yaca." ¹⁷ Avo la o Ananaiasa a unu iwere, a tabakiya ve lima, a kwa, i wekaqu Saula, na Turaga o Jisu, o keya a tolaviko i calevu o lamai ke, e vatala jiko au mai, mo tola rewa, no vavuqa ina Yalo Tabu. ¹⁸ A lutu vasauri mai vemata e kiya na kwa kodaki nai varo ni ika: avo tola rewa sara o keya; a vo tu cake a vavitaisotaki. ¹⁹ Nivo kana devu, avo kaikai mai. Avo no o Saula me bogi vica qeinidru na vo lotu mai Tamasiko. ²⁰ A vo vunautaki niya sara ina viwere ni lotu, na luve ni Kalou na Karisito. ²¹ E karacidru taucoko ga na varogo, a ru kwa bara niya o keya ikwe se jikai a vaburabura nidru mai Jerusalemi eru masujiya na yaca ikwe, a lamai ikei me mai vaveya kodaki tale ga ke, me meidru na vesu tu vuwadru na bete levu? ²² Avo kaikai mai o Saula, a vamataku cidru na Jiu eru no mai Tamasiko, nivo vadjinadjina ni Karisito o keya ikwe. ²³ Devu na visiga wara, aru qai bose jiya na Jiu meru vamateniya. ²⁴ Avo kilajiya o Saula na ledru vukujiya ka bere. aru va tawa niya na matamata ni rara na siga na bogi meru vamateniya. ²⁵ Aru qai meiya vai bogi o rau na tisaiveli, a ru va tukuciya bale ina lobo ni ba. ²⁶ Nivo cava Jerusalemi o Saula, avo mata lai no qanedru na lotu: aru mataku ciya taucoko ga, aru tasi vadjinajiya nivo lotu o keya. ²⁷ A qai meiya o Panapasa, a meiya vuwadru nai apositolo, a kwa vuwadru na leya daniya a Turaga i calevu, o keya a tata muni vuwa, qeiniya la i vunau doudou mai Tamasiko e yaca o Jisu. ²⁸ Aru no vata aru la vali qeinidru o keya mai Jerusalemi. ²⁹ A tata doudou e yaca na Turaga o Jisu; a tata a viba qeinidru na vunilagi mai na vimatanitu kani kiya; eru sagaiya meru vamateniya. ³⁰ Niru vo kilajiya na viwekani, aru meiya i Sisaria, aru qai vatala jiya i Tarisu. ³¹ Vo qai cegu nai soqosoqo lewe ni lotu mai Jutia taucoko qei niya i Kalili qeiniya i Samaria, aru vo vatoro nidru cake; na ledru i varau meru dau mataku ciya na Turaga, e vacegu nidru na Yalo Tabu, aru vo tubu meru levu. ³² Nivo vayatoviya na vivanuwa taucoko ga o Pita, avo labale muni vuwadru na tamata lotu eru nokoto mai Litia. ³³ A daniya ke e kiya na tamata o Inia e yaca, e daro no ina i mocemoce me yabaki walu, e tauciya na mate saqanini, ³⁴ A kwa vuwa o Pita, Inia, o vivia na lemu i mocemoce. Avo tucake sara o keya. ³⁵ Aru daniya o rau taucoko ga na no mai Litia qeiniya o Sarona, aru saumaki mai vuwa na Turaga. ³⁶ A nokoto mai Jopa e kiya e lotu Tapaica e yaca, na keya i balebale o Tokasa: e dau oga na lewa ikwe ina cakacaka oka, qei niya na cakacaka loloma e vaveya no. ³⁷ Avo yaco ina gauna igi, e tauvimate o keya, a ciba: niru vo vasili niya devu, aru vadaraniya e kiya na taba ni were i yata. ³⁹ Ni vo cava o keya, aru meiya ina taba ni were i yata: aru no voleka vuwa na yada taucoko ga meru tagi, meri vatakeya na i unuvi e yavalu qei niya nai sulu a culajiya o Tokasa, ni cola vata qeinidru. ⁴⁰ Avo vatalajidru yaji o Pita, a jikituru, a masu; a vuki na yago, a kwa, Tapaica, tucake. A cerejiya e mata: nivo daniya o Pita, a qai tucake o keya. ⁴¹ A dodokiya vuwa e lima, a tuberiya cake; nivo covidru na tamata lotu qeinidru na yada, avo vata keya nivo cola. ⁴² Na kwa ikwe e kilai mai Jopa taucoko; aru levu aru vabaujiya na Turaga. ⁴³ Avo me bogi levu o keya mai Jopa qeiniya o Saimoni na matai ni taba ni manumanu.