¹ E kiya na tamata mai Sisaria, o Kolinio e yaca, na ledru turaga na mata somiya e yaca va Itali. ² Na tamata dau lotu, e matakuciya na Kalou, o keya, o rau taucoko ga na leya matavuwere, e dau soliya valevu na kwa ni loloma vuwadru na tamata, e dau masu valevu vuwa na Kalou ina visiga. ³ A daniya o keya na leya tola yadra, ina kaciwa ni yauwa, e kiya na agilosi ni Kalou ni unuviya, a kwa vuwa, ⁴ "I Kolinio"! Nivo vadaniya, a matakuciya, a kwa, "I vei e kodaki na lequ Kalou? A kwa vuwa o keya, na lemu masu qeiniya na lemu kwa ni loloma e vo la cake ina mata ni Kalou mo lai numi ke. ⁵ Mo vatalajiya eru yavalu na tamata i Jopa, meru lai meiya mai o Saimoni, e yaca muni o Pita. ⁶ Aru no vata no o Saimoni na matai ni taba ni manumanu, e no i matacawa lawere: ena kwa vuwako o keya na kwa e dodonu mo vaveya. ⁷ Nivo ladai vuwa na agilosi a tata no vuwa o Kolinio, a qai coviya eru ruwa na leya matavuwere, e kiya na sojiya e dau lotu, e kiya vuwadru e dau qwaraviya: ⁸ no vo kwa vuwadru na kwa taucoko ga, a vatala jidru i Jopa. ⁹ E kiya na qwata, niru vo la tu i calevu, a ru toro voleka yaji i rara, a vo la cake i yataga ni were o Pita me masu ina i ka ono ni auwa. ¹⁰ Avo mata kana sara, e garoviya na kwa me kaniya; niru vo varau no, a daniya sara e kiya na tola, ¹¹ a daniya o lomalagi nivo wasetaki ruwa, a kiya na kwa a la mai vuwa, e kiya nai taboi levu e buku e tutu vava, a lai vatuku bale mai i vuravura. ¹² Avo nokoto ke na manumanu ni vanuwa e no e la ena vi mataqwali taucoko ga, qeinidru na manumanu kila, qeiniya na kwa e qaniwavu qenidru eru vuka. ¹³ A qai rogo mai vuwa na tata, tucake Pita; no vamateniya, no kaniya. ¹⁴ A kwa o Pita, mequ kuwa na lequ Turaga; niqu tasi kaniya na kwa e tabu se tasi savasava. ¹⁵ A varuwa tale vuwa nai tukutuku, na kwa e vasavasava takiniya na Kalou,a me kuwa ni kodaki na tabu. ¹⁶ A vai va tolu na kwa kwe: a qai kau tale na kwa i lomalagi. ¹⁸ Aru coco, aru tarogiya, e nokoto kei qoi o Saimoni, e yaca muni o Pita, se jikai. ¹⁹ Ni vo vanumiya no leya tola yadra o Pita, a kwa vuwa na YaloTabu, daniya, eru tolu na tamata eru vadaniko. ²⁰ Mo ke mo la bale, io no la qanedru, me kuwa ni viba mu yaloga: niqu vo vatala jidru mai. ²¹ A qai la bale o Pita vuwadru na tamata; a kwa,daniya, o au ga I kwe mutu vadaniko au no: na cava na vuni lemutu la mai? ²² A ru kwa, e kiya na agilosi yalo savasava e vata keya vo Kolinio, e kiya na turaga ni valu, e tamata yalo dodonu, e mat the ku ciya na Kalou, e rogorogo oka jidru na kwai Jutia, meru yato viko, mo la I la were, me varogo vuwako na tata o keya. ²³ A qai covidru mai o keya, a va cegu nidru. Io na qwata a la qanedru ke o Pita, a vo la qanedru o wekaya mai Jopa. ²⁴ Na bogi ruwa ni ru unu I Sisaria. A vo kanidru o Kolinio, a vo soqoni jidru devu na kwai leya qei nidru o wekaya djina. ²⁵ Ni vo unu o Pita, a vo yabaki niya o Kolinio, a vo cuva bale ve la, a va rokoroko vuwa. ²⁶ A va tuniya cake o Pita, a kwa, tu cake; aqu jiya tamata muni ga o au. ²⁷ A ru vi tataki sara, aru qai unu I yaloga, a danidru e levu eru vo soqo vata mai. ²⁸ A kwa vuwadru o keya, mutu vo kila jiya ni vo tabu vuwa na kwai Jutia me no vata,se meri vi riji qanedru na kwai ni matanitu kani kiya,a vo kwa voko au na Kalou me kuwa nitokoniya e kiya na tamata me tabu se jikai ni savasava. ²⁹ O keya ga I kwe qu la mai ke mequ kuwa ni vi leji, no qu lai yatovi yaji;qu tarogiya ke na cava mutu yato viko au ke. ³⁰ A kwa o Kolinio, e qai devu ga e va na bogi a qu lolo me yaco viya na auwa I kwe; I na I ka ciwa ni auwa a qu masu I na lequ were, qu daniya, e kiya na tamata e ru cake tu ve qu mata e vai sulu lumilumisa, ³¹ a kwa, I Kolinio, e vo rogo na lemu masu, e lai numi na lemu kwa ni loloma I na mata ni Kalou: ³² o keya I kwe lai vatala I Jopa lai meiya mai o Saimoni, e yaca muni o Pita; e nokoto I la were o Saimoni na matai ni taba ni manumanu I baravi: no vo la mai o keya, e na tataki jiko. ³³ O keya ga I kwe a qu lai vatala ke vuwako; niko vo vai oka na lemu la mai.Madu qai no taucoko1 ga I kei I na mata ni Kalou, me madu varogo na kwa taucoko ga e varo jiya vuwako na Kalou. ³⁴ A qai tata o Pita, a kwa.E djina qu qai kila jiya ni tasi djigitaki nidru va vitaliya na tamata na Kalou; ³⁵ io I na vi vanuwa taucoko ga e oka vuwa o keya e mataku ciya, e vai dodonu. ³⁶ Na I vavuvuli e kwa o keya vuwadru o luveya o Isireli, no vo vunautaki na vi okaji e vuku o Jisu Karisito:(o keya ga e Turaga vuwadru taucoko ga:) ³⁷ na I va vuvuli I gi, mutu kila jiya, e vunautaki mai Jutia taucoko, e tekivu mai Kalili, no vo devu na vavitaiso a vunautaki niya o Joni; ³⁸ no vo walicia devu o Jisu na kwai Nasareci na Kalou I na Yalo Tabu qei niya na kaikai: o keys e dau la vali e dauvaveya na kwa oka, e va cola nidru taucoko ga na va kaikai nidru na nitu; no vo no qaneya na Kalou. ³⁹ Madu vo dau tukutuku I na kwa taucoko ga e dau vaveya o keya I na ledru vanuwa na kwai Jutia, I Jerusalemi tale ga; o rau eru va mate niya e ru va rube niya I na kiya na kai: ⁴⁰ a qai va tuniya na Kalou I na I ka tolu ni siga, a vata keya ke; ⁴¹ e jikai vuwadru na tamata taucoko ga, vuwadru ga na djigitaki nidru I mata na Kalou, meri dau kwa,io vuwako madou, o madou madu kana madu somu qaneya ni tu cake tale mai na mate o keya. ⁴² A varojiya vuwako madoume madu vunau vuwadru na tamata, me va djinadjina o keya ga a lesiya I mata na Kalou me lewaidru na cola qei nidru na mate. ⁴³ O keya eru dau kwa o rau taucoko ga na parofita, e na boko e vuku e yaca na ledru I valavala ca na tamata taucoko ga eru vabaujiya. ⁴⁴ Ni vo kwa no na tata I kwe o Pita, a lutu na yalo tabu vuwadru taucoko na varogo na tata. ⁴⁵ O rau na cili na vabaujiya, aru la vata mai o Pita, e karacidru, ni vo sova na yalo tabu vuwadru muni na matanitu kani kiya. ⁴⁶ Ni ru vo varogo ni vo tatataki niya na tata ni vanuwa kani kiya, aru va rokorokotaki niya na Kalou a qai kwa o Pita, ⁴⁷ e kiya na tamata e sarataki niya na wai, meru kuwa ni vavitaiso ke o rau na tamata I kwe, e ru rewa jiya na yalo tabu me kodaki o datou? ⁴⁸ A qai kwa meru vavitaisotaki e yaca o Jisu Karisito. A ru qai masu jiya me no re qanedru e yavalu na siga.