¹ Ni ru vo cava mai I Ikoniona, ni ru la vata I na ledru were ni lotu na Jiu, aru tata, aru qai vabau jiya ke eru levu na Jiu qei nidru na matanitu kani kiya. ² O rau na Jiu eru va jijiqa, e va uqejiya eru yaloga vuwadru na vi wekani. ³ A ru no balavu no ke aru tata bolebole balejiya na Turaga, e vata keya na djina ni leya tata ni loloma, e soliya me vai rewa ve ru lima e yavalu na keya I varaitaki,qei niya e yavalu na kwa e vatakeya. ⁴ A ru vo tawase I ruwa o rau na lewe levu I rara; e yavalu eru tataki nidru na Jiu, e yavalu e to qanedru na I apositolo. ⁵ Ni ru vo la va kaikai mai na matanitu kani kiya, qei nidru muni na Jiu, qei nidru na ledru Turaga, meru vabura nidru meru va virikidru ve na vatu, ⁶ niru kila jiya I mata, aru tuba I Lisitira qei niya I Tapi, eru rara I Likeonia, I na vanuwa muni e voleka jiya: ⁷ eru vunautaki niya tale ga mai kei gi na I tukutuku oka. ⁸ A nokoto mai Lisitira e kiya na tamata, e malumalumu e la, o keya e lokiloki na gauna e sucu mai ke, a vo tasi la rewa e kiya na siga: ⁹ a varogo o Paula ni tata no; no vo vadaniya makuga o keya, a qai daniya ni no vuwa na vabaujiya me va colai ke, ¹⁰ a tata e na domo levu, Tu va dodonu cake. A rido o keya, a la vali. ¹¹ Ni ru vo daniya o rau na tamata na kwa e vaveya o Paula, aru qai toso niya cake eru domo, aru kwa na tata va Likeonia, o rau na Kalou eru vo lia tamata mai, e vo labale mai vuwako datou. ¹² A ru vo tokoniya o Panapasa, me Jupita; qei niya o Paula me makuri, ni vo jiya dau tata o keya. ¹³ O keya muni na bete I Jupita, e nokoto I na mata ni rara na leya bure kalou a meiya mai I na matamata ni rara e yavalu na bulumakau qei niya na salusalu, a ru oka jiya na lewe levu meru va cabo I soro. ¹⁴ Ni ru vo varogo o rau na I apositolo o Panapasa qei niya o Paula, a ru qai dresu laki niya na ledru I sulu, aru wavu sara vuwadru na tamata, aru kulakula, ¹⁵ a kwa, o mutou na turaga, na cava mutu vaveya ke na kwa I kwe? e du tamata vata dui tovo vata qaneko mutou, Maru vo vunautaki niya vuwako mutou me mutu saumaki mai na vi kwa I kwe e tasi yaga, vuwa na kalou cola, o keya a biliya o lomalagi qei niya o vuravura, qei niya na wasawasa, qei niya na kwa taucoko ga e mo ke: ¹⁶ o keya vosojiya na lewe ni vanuwa taucoko ga na gauna I mata meru la ga I na ledru calevu. ¹⁷ E jikai ga ni dei niya jikai na I vatakilakila, ni vo vai oka no o keya, no vo solia mai o keya na .luvu mai lomalagi, qei niya na yabaki e levu ke na vuwa ni kai, a va tawa niya ke du yaloga na cawa qei niya na marau. ¹⁸ A vo va lailai meru jikai ni tarovidru na lewe levu I na tata I kwe, meri kuwa ni va cabo I soro vuwadru. ¹⁹ A ru la mai e yavalu na Jiu mai Anitioki qei niya o Ikoniona, aru va uqejidru na tamata, no vo va virikiya o Paula I na vatu, aru yaratakiniya I na tutu ni rara, niru vo numiya ni vo mate o keya. ²⁰ Ni ru vo no wavoki jiya o rau na lotu a vo tucake o keya, a la I rara. Ni si qwata aru la qei niya oPanapas I Tapi. ²¹ Ni ru vo vunautaki niya devu na I tukutuku oka I na rara igi, aru va kalougatataki nidru na lewe levu, aru qai suka tale i Lisitira, qei niya o Ikoniona, qei niya oAnitioki, ²² aru vo va deitaki niya eru yalo na vo lotu, no ru vovarojidru meru no dei I na vabaujiya, a kwa ni kilikili me levu na kwa rarawa du unu viya I na matanitu ni Kalou. ²³ vo lesidru e yavalu me ledru qase ni soqosoqo lotu taucoko ga, aru masu muni aru lolo,aru go tatautaki nidru vuwa na Turaga, o keya eru vabau jiya. ²⁴ Ni ru vo yatoviya o Pisitia, aru cava i Pamifilia. ²⁵ Ni ru vo vunautaki niya na tata maiPefika, aru la i Atalia: 26 ²⁶ aru soko dai mai I Anitioki, aru va toonami ke me ledru na loloma ni Kalou na vuku ni cakacaka aru qai va devuniya. ²⁷ Ni ru vo cava ke, aru soqoni jidru vata na I soqosoqo lotu, aru kwa na kwa taucoko ga e vaveya na Kalou naleya vukeidru, a dolaviya na mata ni were ni vabaujiya vuwadru na vi matanitu kani kiya. ²⁸ A ru no vata va balavu qei nidru na lotu.