1
A ru la bale mai Jutia eru yavalu, a va vulicidru na vi wekani,Kodaki mutu tasi cili me kodaki lai varau o Mosese, mutu tasi va colai rewa.
2
Ni ru vo vi leji va levu aru viba qei nidru o Paula qei niya o Panapasa, qei nidru vata tale eru yavalu, meru la cake I Jerusalemi vuwadru na I apositolo, qei nidru na qase, na vuku ni kwa I kwe.
3
A ru talatala vuwadru na I soqosoqo lotu, a ru laviya o Filinaisi qei niya o Samaria, kwa no niru vo saumaki mai o rau na matanitu kani kiya: aru va marautaki nidru valevu na vi wekani taucoko ga.
4
Ni ru vo cava I Jerusalemi,a vacegu nidru o rau na I soqosoqo lotu, o rau na I apositolo, qei nidru na qase, eru kwa na kwa taucoko ga e vaveya na Kalou niru vukiciya qanedru.
5
A ru tu cake eru yavalu na Farisi eru vabau jiya, a kwa, e dodonu meru cilivi o rau I qoi, me lai kwai vuwadru meru talai rewarewa I lai vunau o Mosese.
6
A ru soqo vata mai na I apositolo, qei nidru na qase meru bose jiya na kwa I kwe.
7
Ni vo levuna vi leji, a vo tu cake o Pita, a kwa vuwadru, O mutou na vi wekani, mutu kila jiya ni vo djigitaki niko au na Kalou, na gauna vo devu makawa yaji, meri varogo ke na I tukutuku oka vuwadru na vi matanitu kani kiya, meri vabaujiya.
8
Na Kalou igi e kila jiya d yalo, e va djinadjina vuwadru, no vo soliya vuwadru na Yalo Tabu, me kodaki ga vuwako datou;
9
a vo tasi oka jiko datou sara mai vuwadru,e va savasavataki niya I na vabaujiya.
10
Na cava me mutu va tovoliya ke na Kalou me mutu va tava nita ke na I vuwa veru domo o rau na lotu,du tasi dagiya rewa o datou se o rau na ledu qase?
11
Du vadjina jiya nidu na cola I na loloma ni ledu Turaga o Jisu Karisito, me kodaki muni ke o rau iqoi.
12
A ru qai galu o rau yakiya ga na lewe levu meru varogo jiya o Panapasa qei niya o Paula, niru kwa na vi va takilakila, qei niya na kwa e va karacidru, e vo vaveya na Kalou ve ru lima, I na kedru vi mama na vi matanitu kani kiya.
13
Ni ru jiniya na ledru I tukutuku, a tata o Jemesa,a kwa, o mutou na vi wekani, mutu va rogo mai:
14
A vo kwa devu o Saimoni a vo lai kau va cava mai I mata na Kalou e yavalu na tamata mai I na vi matanitu kani kiya, me nokoto vuwa e yaca.
15
Io na kwa I kwe e balejiya na ledru tata na parofita; me kodaki na kwa e volai,
16
Ni vo devu navi kwai kwe qu na qai la mai, na va tu tale la were o Tevita, o keya a reba bale; qu na va tuniya tale na kwa a rusa, qu na va tuniya tale mai:
17
Meru vadaniya na Turaga o rau na tamata e si vo, o rau taucoko ga na vi matanitu, e ru va tokoniya e yaca,
18
A kwa na turaga, o keya vatakeya na kwa taucoko ga I qoi mai na I vatekivu qei niya o vuravura.
19
O keya qu levu ke, medu kuwa ni va wale nidru, e ru vo saumaki mai vuwa na Kalou, mai vuwadru na vi matanitu kani kiya:
20
medu volavola vuwadru, me tabu vuwadru na qwaraviya na matakau, na dau dara muni, qei niya na kuna qei niya na dra.
21
Ni ru no makawa I na vi rara taucoko ga o rau na vunautaki niya o Mosese, eru vo wilikiya I na vi were ni lotu I na vi siga ni vavacegu.
22
A ru qai oka jiya o rau na I apositolo qanedru na qase, qai nidru taucoko ga na I soqosoqo ni lotu, me djigitaki niya na tamata e yavalu tale vuwadru, qai vatala jidru meru la vata o Paula qei niya o Panapasa I Anitioki; o rau o Jutasa e yaca muni Parisapa, qei niya o Sailasa, na tamata aru simata vuwadru na vi wekani:
23
aru volavola kodaki I kwe meru kau: O madou na apositolo qei nidru na qase madu vo loloma yaji vuwako mutou na vi wekani se na matanitu kani kiya mai Anitioki qei niya I Siria qei niya o Silisia:
24
Ni madu vo varogo, ni vo ladai vuwako madou e yavalu eru tautau vatataki niko mutou I na ledru tata, aru vukiciya dai mutu yalo, a madu votai vatala jidru:
25
qai oka vuwako madou ni madu soqo vata madu loma vata, me djigitaki niya na tamata, me lai vatala meru la vata o rau na dau lomani o Panapasa qei niya o Paula,
26
o rau na tamata eru boleiya na mate e vuku e yaca na ledu Turaga o Jisu Karisito :
27
o keya madu vatala jiya ke o Jiutasa qei niya o Sailasa, e ru na kwa tale ga na kwa I kwe ve ru gusu.
28
Ni vo oka vuwa na Yalo Tabu vuwako madou muni, me maduwa ni tauciya vuwa,o mutou na I dagidagi. levu I kwe ga e kwa doudou:
29
Me tabu vuwako mutou naq kwa e cabo I na vi matakau, na dra muni, qaneya na kuna,qarauniko mutou na kwa I qoi, mutu vaveya oka.qu go loloma.
30
Ni ruve lai vatala, aru vo la I Anitioki; niru vo soqo vata na lewe vuqa, eru vo soliya nai vola:
31
niru vo wilikiya devu, eru marau na levu ni va cegu.
32
O Jutasa qei niya o Sailasa, o rau na I va vuvuli muni, eru vavulicidru na vi wekani I na tata e wara, a va tudeitaki niya.
33
Ni ru nokoto me bogi vica, aru qai vatala jidru o rau na vi wekani Ina vacegu vuwadru na i apositolo.
34
A vo oka jiya o Sailasame nokoto no ga mai keigi.
35
Io o Paula qei niya o Panapasa, eru nokoto mai Anitioki eru va vulici aru vunautaki niya natata ni Turaga, qei nidru na kani kiya eru wara.
36
E bogi vica, a qai kwa o Paula vo Panapasa, me daru la tale me daru daniya se ru vo kodaki tu I vai o rau o wekadaru i na vi rara taucoko ga daru vunautaki niya ke na tata ni Turaga.
37
A vo numiya o Panapasa meru meiya o Joni, e yaca mu mata i o Marika.
38
A vo tasi oka jiya o Paula meru meiya, ni vo dei nidru tu I mata mai Pamifilia o keya, a tasi la qanedru I na cakacaka.
39
A vo katakata ke na ledru vi leji, a ru vo vi kalala ke: a vo meiya o Marika o Panapasa, a ru soko sara I Kipiro:
40
a vo djigitaki niya o Sailasa o Paula, a vo la yaji, avo tatautaki nidru i na loloma ni Kalou o rau na vi wekani.
41
A vo la vali o keya I Siria qei niya o Silisia, avo vatudeitaki niya ke na I soqosoqo lewe ni lotu.