¹ A vo qai cava o keya I Tapi qei niya o Lisitiria: a daniya, a vo nokoto ke e kiya e vo lotu, o Timoci e yaca, na I luve ni lewa mai Jutia e vabaujiya; e kwai I na matanitu kani kiya o tamaya: ² a vo rogo oka oya keya I kwe vuwadru na vi wekani mai Lisitira qei niya o Ikoniona. ³ A vo oka jiya o Paula meru la vata: a meiya re a ciliviya, eru vuku na Jiu eru nokoto e yasa igi: eru vo kila jiya taucoko ga ni kwai matanitu kani kiya o tamaya. ⁴ Ni ru vo yatoviya na vi rara, eru kwa vuwadru, meri vabau jiya na kwa lai kwai vuwadru, meri vabaujiya kwa a lesiya vuwadru na I apositolo qei nidru na qase eru nokoto mai Jerusalemi. ⁵ A ru va tudeitaki tale ga ke na vi soqosoqo ni lotu I na vabaujiya, eru tale ga I na vi siga meru levu. ⁶ Ni ru vo yatoviya o Firijia qei niya na vanuwa o Kalatia, a tarovidru na yalo tabu meru kuwa ni vunautaki niya na tata mai Esia, ⁷ niru vo cava I Misia, aru va tovoliya sara me la I Picinia: a tasi dei nidru e yalo o Jisu. ⁸ A ru vo sivi jiya o Misia, a la bale I Tiroa. ⁹ A tolaviya o Paula vei bogi na tola yadra: e vo no e kiya na kwai Masitonia, o keya e va masu jiya, a kwa, la mai I Masitonia, no vuke iko madou. ¹⁰ Ni vo daniya devu na leya tola yadra o keya, madu vo tovoliya sara me madu la I Masitonia, ni madu vanumiya ni djina sara ni coviko madou na Turaga me madu vunautaki niya nai tukutuku oka. ¹¹ Ni madu vo va rewa niya mai Tiroa, madu vo la yaji I Samoceresa, a vai I vei qwata i Niapoli; ¹² mai kei gi I Filipai,na rara levu I na yasayasa va Masitonia, na rara va Roma: madu nokoto I na rara igi me bogi vica. ¹³ Na siga ni vava cegu a madu la I na I bili ni rara I na baji ni uciwai, e tavo madu kilajiya ni dau vai ke na lotu masumasu; a madu no I ra, madu tata sara vuwadru na lewa ni ru dau soqo vata ke. ¹⁴ A varogo jiya e kiya na lewa o Litia e yaca, I na rara o Ceataira, e dau volitaki niya na kalokalo, o keya e dau lotu vuwa na Kalou: a dolaviya e yalo na Turaga, e vabau jiya ke o keya na vi kwa e kwa o Paula. ¹⁵ Ni vo va vavitaisotaki o keya, o rau muni na leya vu were, a va mamasu o keya, a kwa, kodaki mutu vo lewa iya niqu vo djina vuwa na Turaga, unu I na lequ were, nokoto ke, a mare jiko madou sara o keya. ¹⁶ A vo cava, ni madu vo la e tavo e vai ke na masumasu, a madu sota qei niya e kiya na yada a nokoto vuwa e yalo o Paiconi, o keya e dau va vutuniyautaki nidru va levu na leya turaga I na leya parofisai vakai lasu; ¹⁷ a ru tekuciya o Paula qei nidru o rau I kwe, a kulakula, a kwa, a jiya talatala ni Kalou yawa I yata o rau na tamata I kwe, a ru vo vatakeya vuwako mutou na calevu ni I cola. ¹⁸ A vo levu na bogi aru vaveya no ke na kwa I kwe. A qai rarawa ke e yalo o Paula, a vuki me tola, a kwa vuwa na yalo, qu vo varojiya vuwako e yaca o Jisu Karisito mo ladai mai vuwa.A go ladai sara vuwa na jiki ni siga no ga igi. ¹⁹ Ni ru vo daniya na leya Turaga ni vo lavele na kwa aru dau vararavi no ke me dau rewa no ke na ledru I yau, a ru qulumiya o Paula qei niya o Sailasa, ru yarataki niya I na rara ni vi voli vuwadru na turaga; ²⁰ aru meidru I na matavilewai, a kwa, o rau na tamata I kwe, eru kwai Jutia, eru va karacidru na ledu rara, ²¹ e varo jiya na I valavala e jikai ni dodonu vuwako datou medu vabaujiya,m se medu tekuciya nidu jiya kwai Roma. ²² A ru qai tucake va kaikai vuwadru na lewe levu: aru luva jiya sara na ledru I sulu o rau na matavilewai, aru kwa meru ravulaki. ²³ Ni ru vo ravulaki nidru va levu, aru qai dai niya I were ni vivesu, a ru varojiya na I vatawa me qulu nidru sara no va makuga; ²⁴ o keya, ni vo varojiya kodaki I kwe, e bilidru I na were nivivesu I yaloga, a vesukiya makuga sara eru la I na kai. ²⁵ Ni vo bogi levu mai na vanuwa, a sere vuwa na Kalou; aru varogo jidru na tamata eru vesu tu. ²⁶ A votevuli vasauri na vanuwa, a savuli ke na yavu ni were ni vivesu: a vo tadola vasauri na I sogo n I mata ni were ni vivesu, a vo tasere yakiya na kedru I vesu na tamata. ²⁷ yadra na moce na I vatawa ni were ni vivesu, ni vo daniya ni tadola tu na mata ni were ni vivesu, a vo ucuniya na leya I sele I wau, e nakijiya me va mate niya, e numiya ni ru vo tuba na tamata eru vesu tu. ²⁸ A coco I na domo levu o Paula, a kwa, kuwa niko va burabura njiko; o madou madu nokoto taucoko no ga I kwe. ²⁹ A qai coco o keya me kau mai e kiya na si a, a rido I yaloga, a saqanini mai, a vo cuva bale vo Paula o Sailasa, ³⁰ a meidru I rara, a kwa, o mutou na turaga, na cava mequ vaveya mequ cola ke? ³¹ A ru kwa, vabaujiya na turaga o Jisu Karisito, o na cola ke, o rau muni na lemu vu were. ³² Aru kwa vuwa na tata ni Turaga, vuwadru taucoko aru nokoto I la were. ³³ A meidru o keya I vai bogi, a quwajiya na mawe ni kuita; a vavitaisotaki sara, o keya qei nidru na kwai leya. ³⁴ Ni vo meidru I na leya were a takiniya na cawa ve ru mata, a marau valevu, ni vabaujiya na Kalou, qei nidru taucoko ga na leya mata vu were. ³⁵ Ni vo siga mai, aru vatala jiya na ovisa o rau na matavilewai, a kwa, sere kidru na tamata I qoi meru la. ³⁶ A kwa vuwa o Paula na tata I kwe nai vatawa ni were ni vivesu, e vo lai vatala mai na matavilewai me muru sere: muru qai la, I na va cegu. ³⁷ A kwa vuwadru o Paula, aru ravulaki niko maru I mata aru tasi vilewaitaki niko maru I mata, maru vo jiya kwai Roma o maru; niru vo dai niko maru I were ni vi vesu; aru qai cilo niko maru, oi? me kuwa sara; meri la ga mai maru meraiko maru yaji I rara. ³⁸ A ru kwa na tata I kwe o rauna ovisa vuwadru na matavilewai; ni ru vo qai varogo niru jiya kwai Roma. ³⁹ A ru la mai aru vamamasu jidru, a meidru I rara, aru vamamasu meru lai I na rara, ⁴⁰ A ru vo la dai I were ni vi vesu, aru unu I la were o Litia; niru vo danidru na vi wekani, aru va cegu nidru, aru qai la yaji.