1
Niru vo yatoviya 0 Amifipoli qei niya oApolonia, aru vo cava I Cesolonaika, a vo nokoto ke e kiya nà ledru were ni lotu na kwai Jutia:
2
a unu ke vuwadru o Paula, me kodaki na ley I varau, a vo tolu na siga ni vavacegu a vavulicidru ke mai I na I vola tabu,
3
ni vo vakila hiya qei niya ni o va djinadjina, no vo kilikili vuwa na Karisito me vosojiya na mate, me qai tu cake tale mai na mate; me kodaki, ni o keya na Karisito, o Jisu I kwe, o keya a qu vunautaki niya vuwako mutou.
4
A ru vabaujiya eru yavalu, aru lai vi tokoni qa neya o Paula vata o Sailasa; qei niya e ru wara na kwai Kirisi eru lotu va Jiu, qei nidru na lewa eru tasi lailai.
5
A ru qai toko mata o rau na Jiu, aru kau e yavalu na kwaisi botoboto, aru va soqonidru na lewe levu, aru va tubu mauwe I na rara; aru qai wavu va kaikai i nla were o Jesoni, aru sagaiya meru meidru vuwadru na lewe ni rara.
6
Niru vo tasi danidru, aru vo yarataki niya o Jesoni qanedru na vi wekani vuwadru na turaga ni rara, aru coco, o rau I kwe eru vukiciya o vuravura me bura, eru vo cava muni mai I kei;
7
a vo meidru o Jesoni I la were; aru vo tasi dau varorogo o taucoko ga I kwe I na leya I vunau o Sisa, aru vo kwa e vo kiya tale na tui, o Jisu.
8
A ru va karacidru na lewe ni rara qei nidru na turaga, no ru vo varogo vi kwa igi.
9
Ni ru vo vabaujiya na leya yalayala o Jesoni qei nidru na kani kiya, aru vo serekidru me ru vo la.
10
O rau vi wekani eru va gugu meru vatala jiya o Paula qei niya o Sailasa I Peria vai bogi; ni ru vo cava ke, aru la I na ledru were ni lotu na kwai Jutia.
11
A ru oka cake sara mai vuwadru na kwai Cesolonaika o rau I kwe I na yalo va turaga, niru va rogo jiya na tata I yaloga e oka jiya sara, eru dau vadaniya I na I vola tabu I na vi siga, se kodaki ke na kwa I qoi, se jikai.
12
O keya ga I kwe eru levu ke eru vabaujiya; o rau muni na lewa ni Kirisi, qei nidru na teigwane, eru tasi lewe lailai.
13
Ni ru vo kila jiya o rau na Jiu mai Cesolonaika ni vo vunautaki niya na tata ni Kalou o Paula mai Peria, aru la tale ga ke, aru va savuli jidru na lewe levu.
14
A ru va gugu ke na vi wekani meru vatala jiya o Paula me la kodaki I wasawasa: aru vo no dai no ga mai kei gi o Sailasa qei niya o Timoci.
15
O rau na vadaniya o Paula aru meiya I Yaceni: ni vo tau vuwadru na I varo vuwadru o Sailasa qei niya o Timoci meru la va watoto mai vuwa, aru qai la.
16
Ni vo wacidru no mai Aceni o Paula, a vo katakata va levu e yaloga, ni vo daniya ni oso va levu na rara na vi matakau.
17
O keya a vi leji ke qai nidru na kwai Jutia I na ledru were ni lotu, qei nidru muni na kani kiya eru lotu, o rau muni na sota qei nidru I vanuwa ni vivoli I na visiga.
18
A qai vi leji qa neya, e yavalu na ledru vuku na leya I tokani I Epikuro, qei nidru na Sitoike. A ru kwa eru yavalu, Na cava re e mata kwa na dau tata I qoi? e yavalu tale, o keya I kwe e kodaki e kiya e vata keya mai na Kalou vou: ni vo vunautaki niya o Jisu vuwadru o keya I kwe, qei niya na tu cake tale mai na mate.
19
A qai qulumiya, a tuberiya e kiya na vanuwa yawa I yata vuwa o Arisi, a kwa, e rewa me madu kila jiya se cava na I va vuvuli vou I kwe o la mai kwa?
20
ni o vo kau mai e yavalu na kwa vi va karaciya I madu bebe: madu qai mata kila jiya ke, se cava na keya I balebale na vi kwa I kwe.
21
( Ni vo jikai nakwa kani kiya eru vaveya o rau taucoko ga na kwai Aceni, qei nidru na vunilagi eru nokoto ke, meru vi kwa yaki niya se meru varogo, e kiya na kwa vou.)
22
A qai la tu ò Paula I na yaloga ni vanuwa yawa I yata na leya o Arisi, a kwa, O mutou na kwai Aceni, qu vo daniya na kwa taucoko ga ni o mutou mutu dau soro valevu.
23
Io ni qu vo la vali, qu daniya na vi kwa mutu dau soro ke, qu vo daniya muni na I cabocabo ni soro e volai ke,Vuwa na Kalou e tasi lai Kilai. O keya mutu dau soro ke ni mutu tasi kila jiya, a qu qai kwa vuwako mutou.
24
Na Kalou a buliya o vuravura qei niya na kwa taucoko ga e no ke, e vo Turaga ga o keya mai lomalagi qei niya I vuravura, e tasi no I na were ni lotu e vai I na lima;
25
e tasi qwaravi muni I na lima ni tamata, me kodaki e yaga vuwa e kiya na kwa, no vo soliya ga o keya vuwako datou taucoko ga na cola, qei niya na I cegu, qei niya na kwa taucoko ga;
26
a bulidru, eru dra vata, na lewe ni vanuwa taucoko ga, meru no e yataga o vuravura taucoko, a lesiya na vi gauna a djigitaki niya I mata, qei niya na ledru yalayala na vi vanuwa ;
27
meru vadaniya na Kalou, me ru va yamociya vuwa,aru daniya, io e tasi vayawa ga o keya vuwako datou yakiya;
28
nidu vo cola vuwa, du savuli, medu rewa jiya mai vuwa na ledu cola; me kodaki tale ga ke aru kwa na lemu dau ni vucu, a vo niya la kawa muni o datou.
29
I kwe, no du vo jiya kawa ni Kalou, e tasi dodonu medu numiya e tautauvata na Kalou qei niya na koula, se na Siliva, se na vatu, e ceujiya matai se na tamata vuku.
30
Io na gauna ni lialia a vo vosojiya devu na Kalou; a vo varojiya na gauna ni kuwa vuwadru na tamata taucoko ga I na vi vanuwa taucoko ga meru vi vutuni;
31
ni vo tekuciya o keya na siga, e na lewaiya ke o vuravura I na lewa dodonu, vuwa na tamata e lesiya o keya; a vo va djinadjina ke o keya vuwadru na tamata taucoko ga, I na leya va tu ni iya cake tale mai na mate.
32
Ni ru vo varogo na leya tucake tale mai na mate, aru va rivarivaciya e yavalu; e yavalu eru kwa, madu na varogo jiko tale I na kwa I kwe.
33
A qai ladai yaji I na kedru vimama o Paula.
34
A ru kanikiya e yavalu na tamata aru vabaujiya; e kiya vuwadru o Taionisio I na matavilewai na vanuwa yawa I yata vo Arisi, qei niya na lewa eru toko iya me niya oTamarisi o rau qei nidru tale e yavalu.