¹ O mutou na vi wekani, qei niko mutou na qase, mutu va rorogo mai ni qu vo tukuniko au vuwako mutou: ² Ni ru vo varogo na tata igi vuwadru na tata va Ipiriu, aru vo nolo sara, a kwa o keya: ³ O au djina na Jiu, aqu sucu mai Tarisu mai Silisia, qau ssusu mai na rara igi, a vavulici ko au o Kamalieli me kodaki na ledru I vunau na qase, aqu gumaikali I na vuku ni Kalou, me kodaki taucoko ga ke o mutou I na siga I igi: ⁴ aqu vabura nidru na lotu kodaki I kwe meru mate qai vesu kiya qu dainiya I were ni vi vesu e yavalu na teigwane qei nidru na lewa. ⁵ Na lequ I va djinadjina na bete levu, qei nidru taucoko ga na qase: aqu a qulu nq ledru I vola vuwadru na vi wekani,a la I Tamasiko, mequ meidru o rau na nokoto ke I Jerusalemi niru vesu tu, meru lai ocaji. ⁶ Ni vo cava, ni qu la yaji, aqu toro voleka I Tamasiko I na siga levu tutu, e kiya na kakarama levu e la vasuri mai I lomalagi a wavoki jiko au. ⁷ Aqu qai reba I na qwele,a aqu varogo e kiya na tata e kwa voko au,I Saula I Saula, o vaburabura niko au balejiya na cava? ⁸ Aqu qai tarogiya, o cei o mutou na Turaga? a kwa voko au o keya,O au o Jisu na kwai Nasareci, o keya o vaburabura niya. ⁹ Aru tolaviya djina na kakarama o rau na la qaneko au: aru tasi varogo na leya tata o keya tata mai vuwako au. ¹⁰ Aqu qai tarogiya na cava mequ vaveya na Turaga?A kwa mai vuwako au na Turaga, cavu tu, no la I Tamasiko: e na lai kwai ke vuwako na kwa taucoko ga e lesi vuwako mo vaveya. ¹¹ Ni qu vo tasi tola rewa balejiya ni vo remoremo na kakarama igi, aru tuberiko au o rau na la qaneko au, a qu cava ke I Tamasiko. ¹² E kiya o Ananaiasa, e tamata lotu djina me kodaki na I vunau, e rogo oka vuwadru taucoko ga na Jiu eru nokoto no mai ke, ¹³ A la mai vuwako au, a no tu, a kw Aq vuwako au, I wekaqu Saula, no tola oka mai. Na jiki ni siga igi,a aqu tola cake ke. ¹⁴ A kwa o keya, aru vo djigitaki niko na ledru Turaga qei nidru na qase, no kilajiya e yalo, no tolaviya I na yalo dodonu, no varogo na tata ve gusu: ¹⁵ o na dau kwa vuwadru na tamata taucoko ga na kwa o daniya qei niya nq kwa o varogo. ¹⁶ O qai vaberebere tale balejiya na cava? tu cake, mo vavitaisotaki, ok vaveya dai na lemu I valavala ca, no o vo masu jiya e yaca na Turaga. ¹⁷ Ni vo cava, ni qu vo lesi tale mai I Jerusalemi: ni qu masu no I were ni lotu, a qu daniya e kiya na tola: ¹⁸ niqu vo daniya ni kwa vuwako au vawatoto mo la dai I Jerusalemi: niru tasi vabaujiya na lemu I tukutuku balejiko au. ¹⁹ A qu qai kwa,o mutou na Turaga, eru kila jiya niqu dai nidru I were ni vi vesu e ru vabaujiko a ru va kuwita jidru na vi were ni lotu taucoko ga: ²⁰ ni vo dave na leya dra o Sitiveni o keya e duwa kwa balejiko mutou, a qu no voleka tale ga ke, mequ oka jiya na leya mate, mequ maroroi jiya na ledru I sulu eru va mate niya. ²¹ A qai kwa voko au o keya, ladai yaji: niqu vatala jiko vayawa vuwadru na vi matanitu kani kiya. ²² A ru vo varogo jiya me yacoviy re na tata I kwe, aru qai kula I yata eru domo a ru kwa, me ladai I vuravura na tamata e kodaki i kwe: e tasi dodonu me cola. ²³ Ni ru vo kulakula, aru qai vvi deiyaki niya na ledru I sulu, aru deiniya na kulu ni qwele I na cagi, ²⁴ a kwa na Turaga levu ni valu meru meiya I na bure ni valu, a kwa me tarogi e vo kanakuita, me kila jiya o keya na cava eru kulaviya ke kodaki I kwe. ²⁵ Ni ru vesukiya no ve na wa, a tarogiya o Paula vuwa na Turaga e nokoto ke, e bara vai vuwako mutou me mutu kuwitajiya na kwai Roma, e jikai re ni lewai? ²⁶ Ni vow varogo na Turaga igi, a lai kwa vuwa na turaga le u ni valu, a kwa, no lewaiko oka na kwa o vaveya: ni jiya kwai Roma o kwa I kwe. ²⁷ A qai la mai na Turaga levu ni valu, a kwa vuwa, kwa mai vuwako au, o jiya kwai Roma se jikai. A kwa o keya io. ²⁸ A qai kwa vuwa na Turaga levu ni valu, e kwa levu na I lavo qu soliya ke mequ jiya kwai rara igi.A kwa o Paula, io o au, aqu a sucu ke. ²⁹ A ru qai la dai sara o rau aru lesi meru tarogiya; a vo mataku muni na Turaga levu, ni vo kilajiya ni jiya kwai Roma o keya, balejiya muni na leya vesukiya. ³⁰ Na qwata e mata kilajiya ke o keya na keya djina na kwa eru bilitaki niya ke na Jiu, a serekiya kai vesu o keya, a kwa vuwadru na bete levu qeinidru na matavilewai taucoko ga meru la mai; a qI meiya bale o Paula, a vatuniya very mata.