¹ A vadanidru makuga na matavilewai o Paula, a kwa, o mutou na vi wekani, aqu tekuciya no me yacoviya na siga I kwe na kwa qu numiya e vo donu I na matani Kalou. ² A kwa o Ananaisana na bete levu vuwadru na no voleka vuwa, meri taviya e gusu. ³ A qai kwa vuwa o Paula, e na taviko na Kalou, o iko qei niya na vulala boro bucobuco: o bara nokoto mo lewaiko au me kodaki nai vunau, a kwa mequ tavi, e vo tasi kodaki na I vunau? ⁴ A ru qai tarogidru na no voleka, o tata vaburaburataki niya na bete levu ni Kalou?A qai kwa o Paula, a qu tasi kila jiya o mutou na vi wekani, ni jiya bete levu o keya: no vo volai, ⁵ mo kuwa ni tata buraburataki niya e lewaidru na kwai lemu. ⁶ Ni vo daniya o Paula ni niya na leya I tokani o Setoki e yavalu vuwadru, e yavalu tale eru jiya Farisi, a coco o keya veru mata na matavilewai, o mutou na vi wekani o au na Farisi, na luve ni Farisi: na vuku niqu vo va djina jiya ni vo tu cake tale na mate a qu na tarogi ke. ⁷ Ni vo tata devu kodaki I kwe o keya, a vo tubuna vi ocaji vuwadru na Farisi, qei nidru na leya I tokani o Setoki; aru tawase ruwa ke o rau na lewe vuqa. ⁸ Ni ru dau kwa na leya I tokani o Setoki e jikai na tu cake tale mai na mate, se agilosi, se na yalo; eru dau kwa na Farisi e djina ruwaruwa. ⁹ A vo levu na kulakula, aru vo tu cake na vuni- ni- vola aru jiya tokani na Farisi; aru gumaikali, a kwa, o madou madu tasi daniya e kiya na kwa bura vuwa na tamata I kwe; io kodaki e tata vuwa e kiya na agilosi se na yalo? ¹⁰ Ni vo tubu e kiya na viba levu, e mataku na Turaga levu ni valu, ke ru basulaki niya o Paula, a tata vuwadru na sojia, meru la bale meru kwaliraki niya va kaikai mai vuwadru, meru kau I na bure ni valu. ¹¹ I vai bogi a tekuciya ano voleka vuwa na turaga, a kwa, mo vacegu ga, Paula: e dodonu mo kwa balejiko au mai Roma tale ga, me kodaki na lemu tukuniko au mai Jerusalemi. ¹² Ni vo siga mai, aru buliya e kiya na vere o rau na Jiu, a ru vo vi va dretaki I na bubului, a kwa meru kuwa ni kana se somu me rewa re na ledru va mate niya o Paula. ¹³ A ru vo vasagavulu va caca a ru vo buliya na vere I kwe. ¹⁴ A ru vo la mai vuwadru na bete levu qei nidru na qase, a kwa, madu vo vadrejitaki niya na bubului levu, me madu kuwa ni kaniya e kiya na kwa, me rewa re na lemadu va mate niya o Paula: ¹⁵ o mutou qei nidru na matavilewai, mutu kwa vuwa na Turaga levu ni valu me meiya bale mai vuwako mutou, ni si bere ni cava o keya, madu vo varau tu me madu va mate niya. ¹⁶ A vo varogo na vere I kwe o luveya teigwane o gwaneya o Paula, a vo la a unu I na bure ni valu, a kwa vuwa o Paula. ¹⁷ A qai coviya e kiya vuwadru na turaga ni valu o Paula, à kwa, meiya na suravou I kwe vuwa na turaga ni valu; e kiya na kwa e nokoto vuwa me kwa vuwa. ¹⁸ A qai meiya vuwa na Turaga levu ni valu, a kwa, a coviko au o Paula na tamata a vesu no, a kwa mequ meiya mai vuwako na suravou I kwe, e kiya na kwa e no vuwa me kwa vuwako. ¹⁹ A qai qulu e lima na Turaga levu ni valu, a ru la va jikijiki vai nidru; a tarogiya, na cava re e no vuwako mo kwa vuwako au? ²⁰ A qai kwa o keya, a ru vo yalovata na Jiu meru masu jiko mo meiya bale o Paula vei qwata vuwadru na matavilewai, me kodaki ni o tarogiya va dodonu e yavalu na kwa bale jiya; ²¹ no kuwa ni varogo jiya na ledru va mamasu; no ru lewe vasagavulu va caca e ru lawa vakiniya, a ru vo vi va dreji vai nidru I na bubului, meri kuwa ni kana se somu meru va mate niya re I mata:a ru qai varau tu, a ru waciya ga mo yalataki niya vuwadru. ^{22 23 24} A qai dei niya na Turaga levu ni valu me la na suravou, a va ro jiya, no kuwa ni kwa vuwa e kiya na kwa o la mai kwa vuwako au na kwa I kwe. A covidru o rau na ruwa na turaga ni valu igi, a kwa, varautaki niya na sojiya e ru ruwa na drau, qei niya na tamata e vitu sagavulu eru vodo ose, qei niya na tamata eru lewe ruwa na drau e ru vai yataga I na sa, meru la I Sisaria na I ka tolu ni bogi; e varutaki niyatale ga na ose,me vodo ke o Paula, me mei oka I Sisaria vuwa o Filikesa na kovana. ²⁵ A volaiya nai vila o keya e kodaki I kwe: ²⁶ O au o Kilotiu Laisiasa vuwa na turaga oka sara o Filikesa, e dau loloma! ²⁷ Na tamata i kwe eru qulumiya na Jiu, voleka meru va mate niya; aqu qai meidru na sojiya, qu va cola niya, niqu vo kila jiya ni jiya kwai Roma o keya. ²⁸ Ni qu vo mata kilajiya na cava eru bilitaki niya ke, a qu meiya I na jiya yaji matavilewai: ²⁹ io ni qu vo daniya ni vo bilitaki o keya I na kwa e niya yavalu e vi lejitaki na ledru I vunau, e jikai na kwa e bilitaki vuwa e dodonu me mate ke se vesu. ³⁰ Ni vo lai kwai mai voko au eru lawakitaki niya o rau na Jiu, a qu vo va watoto mequ vatala jiya yaji vuwako aqu vo tata tale ga vuwadru eru bilitaki niya meru kwa ve mu mata na kwa e bilitaki ke vuwa. sa loloma. ³¹ A ru qai meiya o Paulu o rau na sojiya, me kodaki ni vo varojitaki niya vuwadru, aru meiya I Adipatiri. ³² Ni vo qwata eru vo dai nidru meru vodo ose meru la qanedru, aru vo la tale I na bure ni valu. ³³ Ni ru vo cava I Sisaria o rau I qoi, aru soliya na I vola vuwa na turaga, aru vatakeya tale ga vuwa Paula: ³⁴ ni vo wilikiya devu na turaga, a tarogiya o cei la vanuwa. a vo qai kila jiya ni kwai Silisia, ³⁵ a kwa,qu na varogo jiko, ni ru vo cava mai o rau a ru bilitaki niko.A go va tarotaki niya me vatawa I na were ni vilewai na leya o Eroti.